高達迷有福！
「GUNDAM FACTORY YOKOHAMA」期間限定活動現正於橫濱山下埠頭舉辦，展期至2024年3月31日(日) ！嚟到呢度，粉絲可以參觀到實物大18米高嘅「可動高達」，近距離親眼見證充滿震撼力嘅高達啟動過程。除此之外，仲有以獨家原創高達模型為首、眾多原創周邊商品齊集嘅官方商店，以及提供橫濱特有當地美食嘅主題café等等。馬上就等FUN! JAPAN編輯部為大家介紹呢個人氣熱門嘅話題景點啦！
「可動高達」亮相橫濱・山下埠頭「GUNDAM FACTORY YOKOHAMA」
日本機械人動畫《機動戰士高達》自從1979年電視首次播出就成為經典，一直以嚟深受日本國內外高達迷愛戴。
為慶祝《機動戰士高達》電視播出40週年，官方特別安排「GUNDAM FACTORY YOKOHAMA」於橫濱市山下公園旁邊嘅山下埠頭舉辦期間限定活動，展期只到2024年3月31日(日)。
企劃最大特色就係，實物大18米高嘅高達居然重現眼前，而且仲真係識郁！到目前為止，台場、靜岡等地都曾展出過無數次實物大嘅高達，但今次嘅「可動高達」係首創！真係會行畀您睇㗎～
為打造實物大嘅可動高達，「GUNDAM GLOBAL CHALLENGE(GGC)」企劃於2014年啟動，希望透過高達匯集日本第一嘅製造技術、跨越領域與世代嘅智慧與經驗，事至今日大家終於有機會可以近距離見證18米高嘅高達啟動過程！
登上「GUNDAM-DOCK」想像操控高達過程！超近距離欣賞「可動高達」
總面積佔9平方公里嘅「GUNDAM FACTORY YOKOHAMA」劃分為兩大區域，分別為停放「可動高達」嘅維修基地「GUNDAM-DOCK」。以及展示高達相關構造並設有周邊商店、主題café嘅「GUNDAM-LAB」。
買飛入場後，首先一定要衝去睇嘅就係特別觀賞區「GUNDAM-DOCK TOWER」(需付費)。喺呢邊，您可以從15～18米嘅半空上，近距離欣賞「可動高達」嘅頭部與機身等各個細節位，當下自己就好似化身成為高達駕駛員或維修員，令人相當興奮！
高達機身上印有「RX-78F00」型號，故事設定為於橫濱附近發現大量疑似高達嘅零件，因此需要將呢喲零件再組裝並嘗試進行啟動實驗。「GUNDAM-DOCK TOWER」高度約5層樓高，啱啱好就係同高達機身一樣高，可以將高達嘅手腳運作、駕駛艙以及威風凜凜嘅背影一覽無遺。
而6樓就係最接近「可動高達」嘅頭部。於啟動實驗過程中，高達喺最後會將頭部轉向觀眾方向，當下嘅震撼力肯定會令高達迷睇到熱血沸騰！就算唔係高達迷，呢個魄力十足嘅表演亦吸引力十足，有機會一定要嚟體驗一番！遊客仲可以欣賞到以「可動高達」身影作為前景嘅橫濱夜景，令橫濱經典夜色更添上一層科幻色彩，非常推薦。
到「GUNDAM-LAB」內嘅「ACADEMY」 了解高達操作原理！
由展示區、周邊商店、主題café組成嘅「GUNDAM-LAB」亦係不可錯過！嚟到「ACADEMY」，您有機會可以了解得到「可動高達」設計構造背景與操作原理，仲可以透過「Pilot View experience」一嚐駕駛高達嘅體驗，感覺就好似真係坐喺駕駛艙裡面操控一樣呀。
狂掃獨家高達模型再狂食主題café美食！
尤其「THE GUNDAM BASE YOKOHAMA Satellite」官方商店更係粉絲必到！買完原創高達模型為主嘅高達相關周邊商品後，記得再去埋「GUNDAM Café YOKOHAMA Satellite」主題café內品嚐獨家菜式，以及橫濱先有嘅當地美食。最特別嘅係，喺「THE GUNDAM BASE YOKOHAMA Satellite」內居然仲可以買到參觀「GUNDAM-DOCK」時見到嘅原創RX-78F00高達模型，非常適合買嚟做橫濱手信啊。
景點資訊
- 名稱：「GUNDAM FACTORY YOKOHAMA 」
- 地址：神奈川縣橫濱市中區山下町279番地25 山下埠頭內
- 交通方式：港未來線「元町、中華街」站四號出口(橫濱海洋塔口)徒步約7分鐘
- 營業時間：【平日】11:00～20:00（最後入場19:00），【六日及公眾假期】10:00～20:00（最後入場19:00）
- 門票：成人(13歲以上)1650日圓、小童（7歲以上12歲以下）1100日圓（含稅）
- GUNDAM-DOCKTOWER觀賞費用：成人／小童（7歲以上）3300日圓（含稅）
※周邊商店最後入場時間、主題café最後點餐時間皆為19:30
- ※依時期可能調整營業時間。
- ※因維修可能臨時歇業。
- ※營業時間以外禁止進入山下埠頭區域
- ※詳細資訊請參考官方網站
- 活動期間：2020年12月19日（六）〜2024年3月31日（日）
Comments