如果您都係鍾意趁日本旅行時去唱卡拉OK嘅朋友，呢篇文章一定唔可以錯過！
相信會趁日本旅行唱K嘅，絕對唔只得小編一人！平時聽開J-POP、但香港卡拉OK又少日文歌揀（Neway而家仲要清埋盤…）；但當嚟到日本「正宗」卡拉OK時，又會身痕想點返幾首廣東歌，睇下用日文片假名標示嘅廣東話中文發音究竟有奇怪（笑）！而且重點係，喺日本唱K一個鐘只需要幾百yen，做「K歌之王」之餘荷包又唔會大出血，費用夠晒親民貼地！
時不時就想去唱K發洩一下壓力嘅小編．最近聽聞日本卡拉OK居然有前所未見嘅進化，推出「錄音試唱」之餘仲可以順便玩埋「節拍game」！於是小編就決定7月某日親臨東京流行聖地澀谷，一訪由「招財貓卡拉OK（澀谷本店）」打造出嘅百分之二百娛樂場所。下面就等「青衣陳奕迅（自稱）」為大家搶先體驗，介紹呢間K舖究竟有邊到好玩？又有乜必玩體驗？
7月某日 「青衣陳奕迅」降臨澀谷道玄坂！
一抵達JR澀谷站八公出口，小編首先朝著UNIQLO澀谷道玄坂店所在嘅澀谷PRIME前進。從澀谷站出發、爬過小小斜坡，抵達店舖所在大樓只需要1分鐘左右，非常近！再搭電梯嚟到4樓，第一眼發現店內裝潢望起上嚟同一般卡拉OK無大分別，心諗「呢間舖頭到底有乜咁勁呢？」！懷著雀躍興奮嘅心情，再睇睇價錢表…
咦？「遊戲卡拉OK」？！而且上面寫著「可以同friend一齊玩節拍game」…
就決定揀呢間啦！（基本收費之外，只要另外多加一間包廂費用1,000yen，5人攤分先200yen，同去便利店買嚿炸雞一樣咁平！）
可以唱K嘅遊戲中心？可以打「太鼓」嘅卡拉OK？
事不宜遲！立即登門入室！
入到房，第一時間會發現包廂內掛著兩幅牆大嘅投影布幕。原來喺唱K嘅同時，布幕上仲會投影出虛擬LIVE演唱會影像，一班虛擬觀眾會按歌者嘅歌聲或演奏炒熱氣氛，唱得唔好的話相反就會「靜過太空」！所以揸咪嗰個感覺就好似企喺舞台上，一償做歌手心願，一齊「在台上我覓理想～」。
另外，當其他人唱梗歌時，旁邊嘅人則可以利用枱上嘅樂器型遙控器， 同「歌手」一齊夾band大玩節拍game！樂曲播放時，畫面上會接二連三出現各種顏色記號圈圈，「band友」需要分別使用單一按鍵嘅「主控」（綠色）與三個按鍵嘅「副控」（紅、藍、黃）跟著節奏啪啪啪。成功次數越多，虛擬觀眾就會越來越high，一齊炒㷫個場！
兩面牆大嘅投影布幕上會投影著大大串歌詞與影像，無論坐喺邊個位都係紅館最前排。小編親身玩過之後就認為，同太鼓之達人有幾分相似…！？
小編到底身處可以唱K嘅遊戲中心定能夠打「太鼓」嘅卡拉OK呢？已經傻傻分不清楚⋯⋯
遊戲方式超嶄新！「廢中」黯然表示已經跟唔上時代⋯⋯
遊戲卡拉OK嘅曲目選擇截至2021年6月為止，收錄約1,500首歌曲。從近年來熱門曲目，例如YOASOBI《夜に駆ける(向夜晚奔去)》、LiSA《炎》、米津玄師《Lemon》，到日本人唱K必點經典曲目高橋洋子《残酷な天使のテーゼ(殘酷天使的行動綱領)》（《新世紀福音戰士》主題曲）、MONGOL800《小さな恋のうた(小小戀歌)》（日劇《求婚大作戰》主題曲）、HY《366日》等hit歌一籮籮，身為J-POP粉一定會超級興奮。
上圖就係當日小編所揀嘅rundown！！！3首歌分別係愛繆(Aimyon)《你不聽搖滾》、AKB48《Everyday、髮箍》以及西野加奈《Best Friend》。（順帶一提，小編係AKB48、西野加奈年代…）
系統會為音準與節奏兩方面評分，所以歌手同band友嘅合作就變得十分重要。基本上1人或2人擔當歌手，再加上負責打拍子嘅2人組成一隊，如此一來就唔會有人無嘢做，全場都可以投入唱K！講真，又要唱又要打拍子，其實真係有啲忙…
當小編唱完第一首歌後，虛擬觀眾表情就如您所見（上圖：全員死氣沈沈）⋯⋯完全係黑人問號嘅最佳演釋（哭L咗）。
沒事兒沒事兒（北京腔）！反正係第一次玩嘛，有咁嘅情況原本係預料之中！熟悉遊戲玩法之後，要拎高分完全不是夢（好似係），實際上唱到後面，觀眾表情亦從地獄折返人間～（下圖：每個人的表情十分生動）
快樂時光過得特別快，又係時候講byebye～去澀谷如同如旺角嘅小編後來先知道，招財貓卡拉OK澀谷本店嘅遊戲卡拉OK係東京首創，真不愧係走在時代尖端嘅澀谷！！！預計其他分店亦會陸續引進，鍾意唱K嘅讀者今後有機會嚟日本時，推薦您一定要安排朝聖(?)
番外篇：「ONEREC」令剪片手殘黨嘅您都可以一圓歌手YouTuber出道之夢！？
話說小編人生當中，屈指一算大約有8成時間都係睇梗YouTube，而經常睇嘅就包括「歌ってみた」系列。
實不相瞞，小編多年來都懷著一個心願，就係總有一日要拍片公諸同好！無奈屋企無器材設備又唔識剪片，因此最尾都係得個「講」字。但嚟到「招財貓卡拉OK（澀谷本店）」，估唔到就算係小編般同剪片完全無緣嘅手殘黨都有辦法拍出正宗專業影片兼錄音，一切都係多得以下呢部次世代娛樂系統！
同場加映嘅次世代娛樂系統就係呢部結合攝影、照明、必要器材嘅「ONEREC」服務，兩手空空就可以一次過完成拍片、剪片、錄音3個願望！
只要操控專屬平板裝置，就有3台攝影機Standy by從各種角度開始拍攝，更能夠拍出如MV風格短片，並由系統自動幫您編輯、自動輸出檔案。
首先，您能自由選擇背景或框架，再揀想唱嘅歌、戴上耳機，開口唱歌就OK！
拍攝好嘅影片當場就能下載，想要用手機自己再加工編輯亦得，或直接上傳至IG亦得喔！
最後大家請欣賞當日拍嘅片～由於小編怕被起底，所以強烈拜託職員為FUN! JAPAN處男下海！！！
※ONEREC服務預計於2021年9月上旬推出。
設施資訊
- 名稱：招財貓卡拉OK（澀谷本店）
- 地址：東京都澀谷區道玄坂2-29-5 澀谷PRIME 4F
- 營業時間：目前歇業中
最新營業狀況請上官網查詢 - 定休日：全年無休
- 體驗費用：一般卡拉OK費用+成人1,000日圓・小童500日圓（不含稅）
※依時段不追加體驗費用
Comments