計小編話，日本便利店簡直就係每次旅行嘅必去「景點」！而講到日本便利店，就不得不提三大巨頭7-ELEVEN、LAWSON以及FamilyMart，除咗會時不時推出新商品之外，店內熟食相信亦係各位朝早出發前或夜晚返酒店後必check目標，唔食唔安樂！日前，FUN! JAPAN TV就喺直播時介紹過三大便利店最新上架嘅多款商品，唔知下面出現嘅又會唔會大家嘅心水呢？
方便、好食又夠平！便利店飯糰
除咗最基本嘅三角形海苔飯糰之外，日本各大便利店亦會不定時推出特殊口味與包裝嘅款式。例如上圖由左至右，就分別係LAWSON小梅飯糰、FamilyMart鯖魚與高菜壽司以及7-ELEVEN Q彈糯麥枝豆鹿尾菜。其中，枝豆鹿尾菜更主打含有4.3克食物纖維，兼顧健康又可以填飽肚！
口痕最佳良伴 各家便利店自選品牌零食點心
經常去日本便利店嘅可能都會注意到，其實每間品牌都有推出自家原創品牌，款式豐富之餘，重點係款款都精緻好食，叫人選擇困難症發作！今次小編所挑選嘅，就係來自Family Mart「FamilyMart Collection」嘅「五花肉風零食 濃厚燒肉醬口味」，打開包裝嘅瞬間，燒肉醬味道馬上充滿辦工室，當然食落去都係滿滿燒肉醬味，還原程度超高！
而7-ELEVEN部分小編要分享嘅，就有相信大家都超級熟悉嘅牛油夾心餅乾「SUGAR BUTTER AND TREE」聯同7-ELEVEN推出嘅聯乘限定包裝。經典白朱古力夾心脆餅之外，而家仲推出咗紅茶牛奶口味，混合黑麥榖物麥香餅乾，入口瞬間紅茶香氣馬上於口中散開，餅乾與夾心融合得恰到好處，唔甜唔膩口感叫人食到唔停口。
最後LAWSON嘅部分，小編就揀選咗「濃厚布朗尼蛋糕」。包裝方面採用個別包裝夠晒方便，唔使驚打開之後要一次過食晒；打開後迎面飄來一陣濃醇朱古力香，口感扎實，如果想要食到熱辣辣嘅brownie，不妨打開包裝後放入微波爐叮吖。
懶人救星！便利店微波熟食
對「毒」自留日嘅小編嚟講，有時候放工後已經攰到虛脫，懶得煮飯嘅時候便利店微波熟食就成為救命恩人！只要買個主菜與沙律再配個白飯，就可以9秒9解決一餐。例如以下要推薦畀大家嘅，亦係陪小編度過多個寂寞夜晚嘅救星～
首先來自7-ELEVEN嘅Premium GOLD系列燉牛肉，唔單只牛肉份量十足，仲有大大粒馬鈴薯，滿足感100%；LAWSON入口即融豬肉角煮，簡單嚟講即係類近香港嘅腩肉，一碗白飯在手，淋上去就一食無停口！
最後係FamiyMart「母親食堂」嘅「Bokkake（ぼっかけ）滷牛筋」。「Bokkake」即係將牛筋、蒟蒻以糖、醬油紅燒成嘅料理，係一款關西神戶地區餐廳菜式中十分常見嘅菜式。場景換成便利店後，就成為一款拯救忙碌上班族嘅料理。
召喚「螞蟻人」！便利店招牌甜品
眾所周知，日本便利店水準高到一個點，簡直係令人懷疑香港便利店嘅存在價值。同樣地，甜品部門都係往往令人驚嘆不已，質素甚至比專門店毫不遜色～
LAWSON 「Uchi Café」系列蛋糕捲係小編大推嘅一款商品，上圖（左）黑鼆鼆嘅限定芝麻口味，只可以話食過嘅人就會知道香氣～超～濃～郁～又例如FamilyMart「Famima Sweets」新商品「牛油夾心三明治」，上圖（右）為冧酒提子口味（另有朱古力及芝士2款），食起嚟嘅口感與某某北海道知名甜品非常相似！
而7-ELEVEN「 THE SEVEN SWEETS」嘅「濃厚蛋懷舊布甸」，口感類近布甸蛋糕般紮實又濃郁，綿密質地各位小朋友都一定會鍾意！
減肥人士福音 減醣低卡商品
最後要同大家介紹嘅，有時下非常流行嘅減糖低卡商品特區！今次小編分別喺7-ELEVEN、LAWSON、FamilyMart搜羅到「ZERO kcal Cider Triple」（中上）、低糖系列pancake（右下）、與知名健身房聯名推出嘅低糖質咖啡窩夫（左下），以及各大藥妝店都買得到嘅知名健身房corssover高蛋白及高胺基酸餅乾（左上及右上）。
7-ELEVEN「ZERO kcal Cider Triple」汽水飲起上嚟同一般汽水無太大差別，但就能有效控制飯後容易飆升嘅血糖與中性脂肪，不妨買一支降低罪惡感！其他低糖質甜品就更加唔使講，味道與普通甜品可謂完全食唔出分別，請接受小編一拜！
小編私心推薦由知名健身房推出嘅牛排口味高蛋白餅乾與朱古力口味高氨基酸餅乾。一包就足夠補充蛋白質與人體必需氨基酸，既唔會食到口淡淡，又可以同時補充營養～實在係一舉兩得！
廣告時間：重溫便利店商品大比拚直播
讀者們嚟日本旅行時又最鍾意邊一間便利店嘅食物呢？以下開放留言討論～
Comments