【日本青森】東北賞楓攻略懶人包！青森必去5大紅葉景點

青森係日本東北地區嘅著名賞楓勝地，染上深橙色嘅山脈景致、倒映喺湖水中嘅火紅美景，青森縣內有無數景點可以畀您欣賞到秋葉喺凋零前所展現嘅絕美姿態，感受季節變化下令人驚嘆嘅美景。以下，就由編輯部為您介紹青森縣必去紅葉景點！

青森秋葉楓紅觀賞時期

青森縣係位於日本本州最北面嘅縣分，每年大約由10月開始迎接秋葉季節，確實時間會因應所在地點嘅海拔高度與當地樹木品種而有所唔同，但高峰期一般皆為10月底左右。趁呢段時期去青森旅行嘅話，保證可以欣賞到染上金黃、紅色與橙色嘅絕景，靚到令人難以置信！

可以欣賞青森縣秋葉楓葉嘅景點非常之多。無論係鍾意景致如畫嘅湖泊、抑或係高聳壯觀嘅山脈景觀，青森縣都可以滿足到遊客嘅各種喜好！

白神山地係橫跨青森與秋田之間嘅遼闊山地，被聯合國科教文組織列為世界遺產。位於北面嘅白神岳與暗門瀑布係當中最具人氣嘅行山景點，特別秋高氣爽嘅時候，吸收瀰漫於原始森林嘅芬多精，再飽覽山林間染上秋色景致，就係秋天東北之旅嘅最佳享受！

從瀑布出發步行約90分鐘即可抵達山谷。請注意，大部分行山步道都要有車先去得到；而位於西目屋嘅白神山地遊客中心，則係可以獲取相關資訊及計劃健行行程嘅好地方。

弘前城有三大景色令人驚嘆，分別係冬天雪燈籠祭、春天櫻花季以及秋天楓葉季。當中秋天楓紅嘅時候，城內漸層呈現嘅景色，簡直係靚到難以用言語去形容！

弘前城與弘前公園內設有幾十條小徑，遊客能夠穿越弘前城植物園，行過護國神社、紅橋、天守閣與護城河，沿路上仔細欣賞建築物與紅葉交織下嘅精彩絢爛絕景。賞楓旺季大概為10月中旬至11月中旬，楓葉季嘅時候仲會舉行夜間點燈，營造浪漫氣氛呢。

奧入瀨溪流係一處由大自然經過幾千年歲月打造而成嘅鬼斧神工迷人溪谷，從十和田湖子之口綿延長達14公里，先流經森林，最後抵達燒山。秋天時，區內染上整片橙色，5、6月時尚係一片翠綠嘅溪谷，去到10月就會慢慢產生變化，溪谷風景換上一片金、橙、紅暖色交錯，上演一場「秋天交響樂」。

沿著溪谷小徑步行嘅話，仲可以欣賞到多座奇岩怪石、小瀑布、以及風景如畫嘅景點，一幕幕景致猶如走馬燈般輪流上演，絕對係畢生難忘！

蔦沼「朝燒」係另一青森縣著名絕景，當朝陽直射山間秋葉時，山頭將呈現一片火燒般嘅豔紅再倒映至蔦沼，打造出一幅令人歎為觀止嘅大自然絕色靚景。蔦沼整個楓葉季都會吸引非常多遊客到訪，環繞湖畔嘅木板小徑非常適合悠閒散步，遊客可以喺唔同角度欣賞蔦沼楓紅。天然清澈嘅湖水，更有助清澈倒映出山頭美麗嘅景致！

位於十和田八幡平國立公園北部嘅八甲田山脈，一直都係鍾意秋天景色嘅人所嚮往嘅地方，有唔少遊客都會趁秋天時出發踏上一場賞楓之旅。除仲行山外，您可以選擇乘搭八甲田纜車從高空眺望美景，一大片由艷橙秋葉編織而成嘅絕景映入眼簾，簡直令人相當難忘。

田茂萢岳（八甲田山山岳之一）嘅最高點有一條大約1公里嘅步道，非常適合將一大片景色盡收眼底。您亦可以選擇行去上、下毛無岱兩片濕原，或者選擇去酸湯溫泉，嘆個溫泉放鬆一下。

十和田湖湖畔所種植嘅日本楓樹與山毛櫸，每逢一到10月就會轉換成秋色模樣。十和田湖係日本本州最大嘅火山口湖，湖上設有觀光船服務帶領遊客遊覽湖景，例喝係以休屋為起點嘅「御倉～中山半島航線」，或來回休屋與子之口之間嘅「休屋～子之口航線」。

湖上有兩個半島，分別係中山半島與御倉半島伸入湖泊，而夾喺兩者之間就係水深最深嘅中湖。十和田湖瞰湖台設於半島與半島之間嘅陡峭邊緣上，遊客能夠從上眺望中湖。難得一場嚟到十和田湖，不妨將十和田周邊景點與奧入瀨溪流一齊排入行程當中，把握機會將所有青森風景一網打盡！