日本有好多出名的動畫漫畫作品，係由日本家傳戶曉嘅傳說或者童話改編而成，但其實日本嘅說好多，仲有好多大家未必咁熟悉嘅故事。日本兩大宗教—神道教和佛教、再融合中國、印度、韓國等故事，創造出日本民間故事，入面嘅世界觀非常不可思議，亦會包含咗一啲發人心醒嘅教誨，呢類型嘅內容多數收錄於《今昔物語集》，可追溯至平安時代，當時呢本作品收錄咗超過1000篇故事。上次喺【日本文化】日本的神話故事與民間傳說(上)為大家介紹白鶴報恩、竹取物語、桃太郎、七夕以及金太郎嘅故事，今次FUN! JAPAN編輯部將為大家介紹更多作品，介紹一啲日本人一定聽過嘅經典故事。
1. 浦島太郎
代表日本童話之一「浦島太郎」。呢個童話，最原始嘅故事創作於8世紀，故事內容經過不斷演變成為現今小朋友耳熟能詳嘅童話故事，更被收錄於小學教課書內，甚至出現喺校歌裡面，亦曾被改編成動畫。
浦島太郎嘅故事大綱
有一日，出去釣魚嘅浦島太郎救咗一隻被小朋友欺負嘅海龜之後，將海龜放返去大海。幾年後，海龜再次去到浦島太郎身邊，向浦島太郎講自己係龍宮公主乙姬嘅寵物，為咗答謝浦島太郎救命之恩，邀請浦島太郎去龍神宮殿—龍宮城作客。
浦島太郎坐上海龜背，去到龍宮城，龍宮國王和乙姬仲專程出門迎接，浦島太郎對乙姬一見鐘情，雖然同乙姬相愛，但喺龍宮嘅日子一日一日地過去，浦島太郎擔心陸地上嘅親人，就同乙姬講想返屋企。臨走前乙姬將一個玉手箱，交畀浦島太郎，並同浦島太郎講，絕對唔可以打開玉手箱。
浦島太郎返到去陸地之後，發現物換星移，事物變遷，認識嘅人都已經唔再存在，先至發現原來喺龍宮城幾日，地上就已經過咗幾十年，失去屋企人、朋友嘅浦島太郎，無聽從乙姬忠告，打開咗玉手箱，瞬間變成白髮蒼蒼嘅老人。
2. 花開爺爺
據聞係五大童話之一嘅「花開爺爺」，故事中登場嘅2位主角，分別係正直善良嘅老伯，同埋住喺隔離屋嘅壞心腸嘅老伯，兩人成對比，喺故事發展中會傳遞出一啲教誨。
讓花提早盛開嘅老爺爺
話說喺某個地方，住咗一對正直善良嘅老夫妻，而佢哋隔離屋，就住咗一對壞心腸嘅老夫妻。
正直善良嘅老夫妻膝下無子，養了一隻狗仔。而呢隻狗仔係被隔離屋壞心腸嘅老夫妻追趕，逃跑去正直善良嘅老夫妻處，因而被收養。正直善良嘅老夫妻非常愛錫呢狗仔，而狗仔亦越養越大。
有一日，正直善良嘅老伯帶狗仔去後山散步，狗仔突然吠起上嚟，吠到就好似叫老伯過嚟掘一下呢邊，老伯照著狗仔嘅指引嘅地方往下挖掘，居然掘出一堆小判金幣！
隔離屋壞心腸嘅老夫妻見到咁嘅情況，非常羨慕，於是就向正直善良嘅老伯借狗仔，帶著狗仔去後山，以為可以乘機掘到金幣，但係掘極都係蛇、怪物，壞心腸嘅老伯一氣之下就將狗仔殺死。
傷心嘅正直老伯去到後山，為狗仔起咗個墳墓去拜祭。而墳墓居然越變越大，仲變成一棵結實大樹。大樹同伯公講，想老伯用大樹製作成木臼，於是老伯就斬咗大樹一啲樹支製作木臼，用木臼搗麻糬。估唔到麻糬居然變成小判金幣，呢個時候又被隔離屋壞心腸嘅老夫妻撞見，兩人非常羨慕，之後照辦煮碗，走去斬大樹，以大樹嘅樹木製作木臼搗麻糬，但麻糬居然變成一粒又一粒嘅泥土球，激到壞心腸老伯將成個木臼砸爛，仲將木臼燒成灰燼。
幾日之後，正直老伯將木臼燒成嘅灰燼灑喺田裡面嘅時候，吹嚟一陣強風，灰燼吹到去枯木上，淋到黑灰嘅枯木瞬間發光，居然開出美麗嘅櫻花。歡天喜地嘅正直善良老夫妻兩個人又將黑灰灑喺其他枯木上頭，瞬間開出一片櫻花！
有一日，富有嘅主公聽見正直老伯令櫻花盛開嘅傳聞，前去拜訪。當主公見到正直老伯令枯木開滿櫻花，非常開心，賜咗非常多賞賜，而隔離屋壞心腸嘅老伯見到，又想要模仿，萬萬都估唔到本來應該灑喺枯木上頭嘅黑灰居然會倒咗去主公頭上面，最後嬲到爆嘅主公將壞心腸嘅老夫妻兩個人關入大牢。
3. 分福茶釜
日本童話中，故事裡面嘅動物主角會變身成其他事物，當中最具代表性就係狸貓和狐狸。呢個部分介紹嘅「分福茶釜」裡面登場嘅係狸貓，茶釜係日本煲茶用嘅器皿，而分福「ぶんぶく」係茶釜煲熱水，水滾嘅擬聲詞。同好多故事相似，呢個故事傳說都係描述善有善報，動物們去報答人類嘅好心。
何謂分福茶釜？
喺好耐好耐之前，有間寺廟嘅和尚獲得一件相當好嘅古董茶釜，但其實呢個並非真嘅茶釜，而係狸貓所變。某日和尚拎呢個茶釜去煲熱水，點火嘅時候聽到茶釜發出「好熱」嘅慘叫聲，覺得唔太對路嘅和尚就將呢個茶釜免費轉讓畀古董二手店。二手店老闆將茶釜帶返屋企，發現茶釜係由狸貓所變，但當時狸貓已經無辦法變回原狀，於是提議喺舖頭入面賣藝，展示呢個會郁嘅茶釜，亦因此吸引咗非常多客人，賺咗好多錢。
最後狸貓生病，以茶釜姿態過世。二手店老闆將茶釜放喺寺廟供養，據聞茶釜至今仍然供奉喺寺廟裡面。
4.月兔傳說
每到中秋十五，各地就會售賣包裝上頭印有賞月為主題嘅商品，上面印有月亮嘅同時，亦會好常出現兔仔。呢段為大家介紹佛教故事由來嘅日本「月兔」物語。我哋而家就去簡單了解一下故事內容。
何謂月兔傳說
月兔傳說呢個故事，喺唔同地區有唔同版本。大概都係有一晚，月球上嘅人去咗地球，遇見三隻動物，分別係狐狸、馬騮同兔仔。月球人拜託三隻動物搵食物返嚟，動物們就照吩咐去搵食物去獻畀月球人。狐狸搵嘅食物係魚、馬騮係水果，而兔仔居然係拎草返嚟。兔仔發現自己嘅供品實在太不成體統，請求月球人點火。火起時，兔仔就投身火海，將自己獻畀月球人。月球人深受感動，變回原本嘅姿態，拯救身處火海嘅兔仔，並帶埋兔仔齊齊返月球。從此，月球表面就會見到兔仔搗麻糬嘅姿態。
故事內容來自《今昔物語（卷5之13）》，其實喺來自一段印度故事，故事開頭係：「喺距離而家好耐好耐之前，天竺有三隻動物，分別係兔仔、狐狸和馬騮」，內容描述兔仔投身火海幫助飢餓嘅人們，呢個善舉令兔仔身影保留喺月亮上。喺未有電燈嘅年代，親子齊齊賞月時，父母會同小朋友講呢一段月兔傳說故事，再細看月亮上兔仔嘅身影。
5. 猴蟹大戰
螃蟹與馬騮嘅大戰，以動物為主題嘅童話故事，主要內容係講復仇。呢段故事最早紀錄係1885年，但大都認為口耳相傳嘅版本應該出現得更早。
猴蟹大戰故事大綱
某日，螃蟹散步嘅時候見到一個飯糰，於是執起個飯糰，馬騮見到表示自己都好想食飯糰，就提議用柿嘅種子同螃蟹交換飯糰。螃蟹將種子埋喺土裡面種植，生出一棵茂盛嘅柿樹，但螃蟹根本摘唔到樹上嘅柿。馬騮又提議，自己爬上樹，摘柿畀螃蟹食，但最後竟然係自己獨吞，仲將未熟嘅柿掉落螃蟹身上，螃蟹驚嚇過度，產完卵就去世。
由螃蟹卵孵化而成嘅蟹仔，就招集咗栗子、牛糞、蜜蜂、磨臼，一行人潛入馬騮屋企，各自匿埋等馬騮出現。返到屋企嘅馬騮要生火時，被栗子燙傷，跑去水桶度想用水沖傷口時被蜜蜂針，仲踩到牛糞跌倒。馬騮逃走，行出家門後，磨臼喺屋頂上面滑落，砸死馬騮。
Comments