日本民間故事與傳說，係現實與幻想嘅組合，故事講述愛情、背叛以及戰役，交織於人與人之間嘅愛恨情仇。民間故事傳統係指代代口耳相傳嘅故事，而日本傳說與民間故事則係書寫文章與口述故事嘅混合。多個故事可以追溯到西元14世紀，甚至更早。故事其後由民俗學家兼作家柳田國男率先彙整，並將民間故事與傳說稱為「昔話（むかしばなし）」，即係指好耐好耐以前嘅故事。
因應唔同地區，故事元素雖然維持不變，但人物與觀點會有所差異，當中最為人熟悉嘅包括《桃太郎》、《猴蟹大戰》、《開花爺爺》、《喀嚓喀嚓山》以及《剪舌麻雀》五大經典童話，有某部分故事甚至連外國人都會聽聞過！今次，FUN! JAPAN編輯部就會為大家介紹上述五大經典以外嘅神話故事與民間傳說。
1. 白鶴報恩
《白鶴報恩》係非常著名嘅日本童話，故事寓意人們應該感激與信守承諾。除白鶴以外，日本各地亦有好多類似故事，「主角」包括鵝、蜆、魚、甚至蛇等各種動物，為求報恩下嫁為妻，於是就以各式各樣技能或禮物回報恩情。《白鶴報恩》角色與故事情節亦經常被套用於現今流行文化之中，例如：《集合啦！動物森友會》仙仙、《ONE PIECE》或《飛翔的魔女》等等。
農夫與妻子背信故事
故事講述年輕農夫於耕田時遇見一隻中箭受傷嘅白鶴，農夫細心地拔走白鶴身上嘅箭，並細心照料白鶴嘅傷勢。等到白鶴痊癒之後，白鶴先係依依不捨地繞著農夫飛咗三個圈，先至重投大自然嘅懷抱。
當日農夫返到屋企嘅時候，遇見一位美麗女子，希望可以同農夫結婚，成為農夫妻子。農夫擔心自己微薄收入，唔足夠兩個人生活，遲遲唔肯答應，於是白鶴就拎出一袋細細包嘅米，話畀農夫知自己有辦法養活呢頭家，農夫先至被說服，娶白鶴為妻。而呢袋米食極都唔會減少，令兩個人過著幸福溫飽生活。
有一日，妻子將自己鎖喺織布房，要求丈夫喺佢準備好之前，唔可以入去織布房。過咗七日，妻子終於出現，變得非常瘦弱，妻子向丈夫遞上一件美麗嘅衣服，要丈夫拎去市場賣。丈夫高價賣出衣服，於是兩人嘅生活又過得相當舒適，
當妻子又再一次進入織布房，丈夫難以克制自己好奇心，心諗妻子明明冇線又點去編織呢。於是丈夫忍唔住偷睇，見到一隻鶴用自己嘅羽毛編織嘅情景。白鶴發現自己秘密已經曝光，向丈夫解釋白鶴係嚟報答農夫嘅恩情，但因為身份暴露，無法再留喺度、最終唯有離開…
2. 竹取物語
《竹取物語》係一個提及到富士山由來嘅神話故事，又稱《輝夜姬物語》。《竹取物語》被認為係現存最古老嘅物語，據聞創作於10世紀，名字最早出現於一篇詩中。故事經典程度，甚至被吉卜力工作室改編成為電影《輝耀姬物語》，更係多項作品靈感來源，如《美少女戰士》、《火影忍者》、《∀高達》等等。
學習永恆嘅愛
故事內容講述一位伐竹老翁去到竹林伐竹時，見到一根發光嘅竹。當佢將竹斬開之後，發現裡頭有一個拇指咁大嘅嬰兒。由於老翁與妻子膝下無子，於是就決定養育呢個嬰兒，並取名為「嫩竹輝夜姬」，即「嫩竹中閃亮發光嘅公主」。從此之後，伐竹老翁每次斬竹時，都會喺裡面發現金塊！
輝夜姬長大成為亭亭玉立嘅美人，吸引無數追求者，當中包括五位貴族。但輝夜姬卻不為所動，反而面對求婚者追求提出五道難題，只要可以搵到輝夜姬心儀嘅寶物，就會答應下嫁。五件寶物分別係佛陀石缽、龍首之玉、火鼠裘、 燕子子安貝、蓬萊玉枝。當中三人作弊，將帶假嘅寶物返嚟、一人棄權、一人死亡，而輝夜姬始終未嫁。即使輝夜姬後來遇見日本天皇，兩人雖然有書信來往保持聯絡，天皇亦向輝夜姬求婚多年，亦不斷被拒絕。
某日夜晚，輝夜姬賞月時深感哀愁，將收埋喺心裡面好耐嘅秘密話畀父母知，坦白講出自己並非地球人，係時候要返去月球。輝夜姬寫咗最後一封信畀天皇，並附上長生不老藥後就飛上月球，忘記所有與地球世界嘅聯繫。天皇派臣子登上最高嘅山，並喺山上焚燒天皇對輝夜姬嘅回覆信，希望天皇信中嘅話語，可以傳達畀輝夜姬知道，天皇拒絕長生不老，因為天皇唔希望活喺無輝夜姬存在嘅世界。
據聞佢哋喺駿河（關東古代行政區域）嘅高山燒呢封信，而呢座高山亦因此被稱為不死之山，自此漢字「富士山」就被解釋為山上充滿勇士，火山煙霧承載著天皇最後嘅訊息。
3. 桃太郎
桃太郎可能係最廣為人知嘅日本童話，以及日本家傳戶曉嘅英雄人物。桃太郎故事雖然遍佈全日本，卻成為岡山縣吉祥物，大概係因為桃太郎鍾意食當地名產吉備糰子（糯米糰子）。
男孩打敗惡鬼嘅故事
好耐好耐之前，一位老太太喺河邊洗衫時，見到一個巨型桃從上游飄落嚟，老太太急急忙忙地接住個巨型桃，帶埋返屋企，然後同老公分享呢件事。兩公婆喺切開巨型桃之後嚇咗一跳，因為裡頭竟然跳出一個細路仔，細路仔同膝下無子嘅老太太兩公婆講，自己係上天送畀佢哋嘅兒子，於是老太太兩公婆幫小男孩改名叫「桃太郎」。
多年過去，少年桃太郎請求父親允許桃太郎離開家鄉去打惡鬼並得到許可。喺旅途當中，桃太郎遇見狗、馬騮以及雉雞，只要桃太郎將母親喺出發時，畀桃太郎嘅吉貝糰子，分畀佢哋食，就會答應桃太郎一齊去打惡鬼。雖然最初呢批打鬼隊伍不停嗌交，喺桃太郎請求下，大家最終成功和睦相處，並成為可靠嘅隊伍，向惡鬼所在島嶼前進。
當桃太郎打鬼隊伍一行人嘅船接近島嶼時，雉雞先去分散惡鬼注意力，而桃太郎、馬騮和狗就潛入隧道，打敗惡鬼，獲得惡鬼嘅財寶，解放被惡鬼擄走嘅無辜人們。打敗惡鬼嘅桃太郎一行人返回故鄉，與桃太郎父母過著幸福快樂嘅生活。
4. 七夕
每年夏天，就快到七夕嘅時候，日本大街小巷都會處處掛滿許願紙條，慶祝天上牛郎織女一年一度相遇。日本大部分地區七夕係過西曆七月七日，某部分地區則按照農曆過七夕。日本人習慣喺紙條寫上願望並綁喺細竹上，然後放到河川裡或作為供品焚燒，以祭天上牛郎織女。
牛郎織女嘅故事
七夕傳統源自中國傳說，於西元8世紀傳到日本。日本七夕故事中，善於針織嘅織女係玉皇大帝女兒，而牛郎則係一名勤勞牧牛人。有一日玉皇大帝介紹兩人認識之後，感情發展融洽，於是玉皇大帝就準許兩人結為夫妻。但成為夫妻之後嘅牛郎織女，過著快樂生活卻荒廢工作，玉皇大帝因此相當憤怒，將牛郎織女分隔喺銀河兩端，唔準許兩人相見。而喺織女傷心欲絕懇求之下，玉皇大帝先同意兩人一年見一次面，而見面呢日就係七月七日。
兩人期待已久，但首次見面當日卻發現兩端並無橋幫助度過銀河，織女因而傷心流淚。一群喜鵲為咗安撫織女，承諾幫二人搭橋。於是喺七夕當日嘅雨水，就係織女所流下嘅開心眼淚；亦有人認為，7月7日當日若二人無法見面，或7月7日後因再度分開而傷心悲痛，七夕前後雨水嘅就係二人嘅傷心眼淚。
5. 金太郎
日本金太郎係一位力大無窮嘅英勇小孩，可以與動物溝通，長大後更成為一位武士。據聞金太郎係神奈川真人所改編，金太郎一角色經常出現喺日本戲劇，或多部動畫、漫畫與電玩遊戲當中。喺日本傳統節日兒童節，父母親會擺放金太郎公仔，希望自己嘅小朋友可以同金太郎一樣強壯又勇敢。
金太郎冒險故事
金太郎傳說起源為金時山，即現時神奈川縣足柄山。故事流傳各種版本，例如係金太郎被母親遺棄、母親扶養長大、或者母親喺金太郎細細個嘅時候就離開人世，但普遍故事開端都好相似。金太郎故事講述主角於森林渡過童年，成長時期漸漸愛上野外生活。論外觀，金太郎一般形象為手持斧頭、著住寫上金字嘅紅肚兜、身型圓碌碌，配上容易辨識嘅髮型。故事又描述金太郎於森林中認譜咗一班動物朋友，打敗惡鬼，仲有同熊相撲（當然金太郎總係成日贏）。金太郎長大成人之後，某日為咗渡河斬大樹期間被當地武士目擊，之後被邀請成為武士家臣，最後仲改名換姓！
Comments