日本天馬航空（Skymark）與《Pokémon》聯手合作，從2021年6月起重磅推出「飛翔比卡超企劃」，並發行限定彩繪飛機與一系列機上週邊，就連登機證同沖繩那霸機場自助check-in櫃檯，都加入繽紛可愛比卡超元素。將來去沖繩旅行時，仲可以順便坐埋彩繪電車（或巴士），再找搵埋當地限定Pokémon坑渠蓋瘋狂打卡影相！
飛翔比卡超企劃亮點① 限定比卡超彩繪飛機
由天馬航空與《Pokémon》聯手打造嘅「飛翔比卡超企劃」（そらとぶピカチュウプロジェクト）以日本沖繩為地標，企劃最大亮點必屬「限定彩繪飛機」（航班JA73AB）！機身使用鮮豔黃色配搭身綁著氣球嘅比卡超，設計吸睛又可愛。往返航線為沖繩那霸或下地島機場，預計服務期間為5年，絕對有足夠時間搭多幾次！
飛翔比卡超企劃亮點② 沖繩那霸機場限定設施
沖繩那霸機場同期換上限定主題自動check-in櫃檯，鮮豔黃色相當吸睛，絕對唔驚搵唔到！完成報到後，粉絲朋友們仲可以到機場2樓（國內線）RYUBO百貨選購沖繩風比卡超週邊，限定商品除咗公仔、各種袋款之外，更有特定包裝手信，小心買到失控！
飛翔比卡超企劃亮點③ 限定登機證與行李標籤
限定彩繪飛機唔單只有外在美，更有內在美，皆因登機證同行李標籤都換上特別設計！登機證印著使用黃色線條勾勒比卡超以及雲朵；行李若內含易碎物品，託運時地勤則會貼上以精靈球為造型嘅標籤。
飛翔比卡超企劃亮點④ 機上裝飾＆紀念禮物
比卡超彩繪飛機內部可謂由內到外都可愛度100分。先有機艙每個座位都放上限定枕頭紙，再有機艙服務員會換上特別圍裙，而使用嘅飲品紙杯與贈送嘅Kitkat餅乾都紛紛使用主題包裝，乘客亦可於機上購買登機紀念章、飛機造型阿加力膠立牌、海綿鑰匙扣等週邊，簡直係要將大家荷包完全收服～
飛翔比卡超企劃亮點⑤ 限定塗裝大眾交通工具
彩繪飛機以外，連接那霸機場與浦添市嘅沖繩單軌列車，以及那霸市巴士都同步換上限定塗裝，其中東洋巴士、琉球巴士交通、那霸巴士與沖繩巴士車身皆採用唔同主題設計，一共有森林、大海、天空等6種風格。
飛翔比卡超企劃亮點⑥ 沖繩Pokémon坑渠蓋
為紀念飛翔比卡超企劃正式登場，那霸市、沖繩市、宜野灣市、宇流麻市特地推出4款全新Pokémon坑渠蓋，屆時可用「相機」收服奉神犬、太陽珊瑚、啪咚猴、蘭螳花、大隻牛等精靈。
飛翔比卡超企劃亮點⑦ 粉絲必買限定週邊
身綁氣球嘅比卡超公仔、可愛手巾與收納包等週邊上架（週邊詳情點我），7月開始仲會喺沖繩世界、沖繩美麗海水族館、海洋博公園、古宇利海洋塔等觀光景點推出限量貼紙，疫情過後絕對要去！
Source: famitsu、poke_times@Twitter
© 妞新聞 www.niusnews.com
Comments