週刊少年JUMP暢銷作品《銀魂》，於2006年動畫首播，從漫畫到電視動畫，再去到大銀幕，無論係動漫電影抑或係「神還原」真人版電影，都令人睇得非常過癮。
故事雖然已經正式劃下完美句點，但相信仍然有唔少粉絲依依不捨作品嘅完結，戀戀不忘《銀魂》帶嚟嘅歡樂爆笑以及熱血感動場面。今次FUN! JAPAN編輯部就要為大家介紹《銀魂》粉絲必去經典場景－位於北海道洞爺湖町嘅洞爺湖越後屋。下次有機會去日本北海道嘅話，一定要去洞爺湖越後屋打卡朝聖，以另一個角度感受《銀魂》嘅熱血沸騰！仲要買返把《銀魂》坂田銀時木刀，為《銀魂》嘅完結創造最美好紀念回憶！
洞爺湖：洞爺湖町日本第三大火山口湖
洞爺湖町位於北海道西南部，以日本第三大火山口湖「洞爺湖」而命名，亦係相當著名嘅溫泉勝地。對於《銀魂》粉絲嚟講，除咗欣賞洞爺湖迷人嘅景致之外，仲有一把不可錯過嘅「洞爺湖」木刀！
《銀魂》主角坂田銀時隨身佩帶嘅木刀上面刻著「洞爺湖」三個字，呢把阿銀木刀對於《銀魂》粉絲嚟講有一種深層嘅意義。據聞係主角坂田銀時去北海道中學修學旅行時，於洞爺湖所購買，仲要係透過電視購物節目所購買，因而令到洞爺湖聲名大噪，成為《銀魂》必去景點之一。去到「洞爺湖」點都要買返把阿銀木刀，感受另一種樂趣！
洞爺湖越後屋
洞爺湖越後屋係一間販賣充滿傳統日式風情木刀兼手信嘅商店，據聞坂田銀時嘅木刀就係喺呢度購買。洞爺湖越後屋擁有30年歷史，所製作嘅手工木刀細緻精美，充滿江戶時代濃厚氣息，與銀魂時代背景簡直係完美搭配。店內所販售嘅商品除咗有各式各樣嘅刀劍、傳統木製人偶、仲有多款新奇有趣嘅商品令人大開眼界，大家可以喺度慢慢Shopping購物一番。
對於熱愛《銀魂》嘅粉絲嚟講，喺洞爺湖越後屋可以搵到各式各樣豐富嘅《銀魂》周邊商品，最令人熱血沸騰嘅莫過於坂田銀時所用嘅洞爺湖木刀！店外仲擺著一架銀時所騎嘅小綿羊電單車同埋安全帽！運氣好嘅話，可以騎上去影返張靚相，化身成為「萬事屋」經典角色，絕對可以影到一張最美好嘅打卡紀念相。
下次去日本北海道，不妨出發一趟洞爺湖之旅，深入探索《銀魂》嘅世界！仲可以入住溫泉酒店，邊浸溫泉邊欣賞洞爺湖美景，再去洞爺湖越後屋朝聖，將心儀嘅《銀魂》周邊商品通通帶返屋企！
洞爺湖越後屋
- 地址：北海道虻田郡洞爺湖町洞爺湖溫泉71
- 交通：從室蘭本線洞爺站乘搭巴士約15分鐘
- 營業時間：09：00～20：30
Comments