當你好鍾意一套動漫時，你會唔會好想親身去動漫中作為背景舞台嘅地方呢？
日本著名動漫《只有我不存在的城市》取景自北海道第四大城市——苫小牧市，以下就帶大家睇吓動漫中主角藤沼悟同其他角色出現過地方係喺邊度～
苫小牧市立美園小學校
藤沼悟使用特殊能力回到過去嘅小學，就係以苫小牧市立美園小學為背景，現實中嘅小學同動漫出現嘅場景係咪好相似呢？學校操場就喺藤沼悟同其他角色玩樂時出現過，甚至喺每集動漫開始前都有出現呢有幕𠻹。雖然唔可以隨便入內，但喺外面比較一下現實同動漫邊度有相同場面都幾有趣吖！
新一條通飲食店街
新一條通飲食店街係苫小牧嘅一條商店街，喺動漫第4集登場。雖然動漫中係過去場面，但現時條街仲喺度㗎！條街有唔少店舖，各位可以搵吓邊度有出現過喺動漫中～
苫小牧市科學館
呢個取景地話唔定係最有趣嘅地方！苫小牧市科學館分別喺動漫第4集同第7都有出現過。
其中一個好特別嘅場面就係藤沼悟喺呢度指住個熊標本雕像，同雛月加代講「佢係我朋友」，唔知大家又記唔記得呢？雖然個雕像本來放喺科學館展出，後來因《只有我不存在的城市》大熱，被轉讓到苫小牧市美術博物館，而且旁邊仲有展示板介紹有關動漫中出現嘅相關情節。另外，動漫中出現過1940年代嘅真空管電視機同無線電收音機設備都有喺科學館展出。
景點資訊
- 景點名稱：苫小牧市科學館
- 地址：北海道苫小牧市旭町3-1-12
- 交通：從JR苫小牧站步行20分鐘
- 開放時間：09:30-17:00（每週一及12月29日～1月3日休館）
苫小牧川河川敷
另一個唔可以錯過嘅景點就係苫小牧川河邊一帶，有唔少藤沼悟放學後同其他朋友聚集嘅場景。因為回到過去時多數都係冬天場面，所以都推薦你冬天去朝聖，影返張同動漫一樣嘅相留念啦！
有興趣嘅朋友可以Click呢度睇取景地一覽地圖，有機會的話記得親身去以上介紹嘅動漫取景地呀！
Comments