當講起外星人、穿越時空嘅未來人、超能力者共同喺日本出現嘅話，您會聯想到咩呢？
日本著名動漫《涼宮春日的憂鬱》故事講述圍繞一名女高中生——涼宮春日同以上種種元素嘅故事，鍾意呢套作品嘅朋友，可以去作為故事背景地舞台嘅兵庫縣西宮市嚟個「聖地巡禮」！就算遇唔到阿虛，踏足SOS團所冒過險嘅地方都心郁郁啦，係咪？事不宜遲，立即了解一下當地有咩取景地啦！
甲陽園車站
首先你可以乘搭阪急電鐵阪急甲陽線到甲陽園車站，一到站就可以展開你嘅朝聖之旅！因為甲陽園車站正正就係主要角色之一阿虛返學校嘅落車站，出站後喺徒步距離內即可以見到另一角色長門有希所住嘅大廈，仲有一眾主角嘅學校「西宮北高校」！您可以喺外面影相留念，但記住學校係禁止外人入內㗎。
樋之池市民泳池
如果夏天時候到訪，您可以考慮去樋之池市民泳池，重溫「漫無止境的八月」中主角們陷入無限迴圈令人狂抓嘅情節！泳池從7月初開放至8月底，入場費為500日圓（自備游衣）。如果入到去，您覺得有啲畫面好似曾相識......，就即刻要搵古泉一樹幫幫你喇！
兵庫縣立甲山森林公園
動漫中SOS團為學園祭所拍嘅影片多個場面，就係取景自兵庫縣立甲山森林公園。一場嚟到，記得模仿佢哋，以影片方式拍底佢哋行過嘅足跡喔！公園內有好多獨特嘅景區，可以慢慢遊覽，睇吓自己記得幾多個長門有希同朝比奈實玖瑠嘅埸景？
神呪寺
去甲山森林公園的話，可以順便去埋附近嘅神呪寺。相信粉絲們都應該會記得，動漫第二季中涼宮春日將喺捕禪比賽中捉到嘅禪放生到山上，有種「抓住夏天的尾巴」的感覺呢！
尼崎中央商店街
最後同大家介紹嘅尼崎中央商店街比起以上幾個景點較為遠少少，需要搭車到阪神尼崎站。喺呢度可以重溫阿虛、涼宮春日同朝比奈實玖瑠拍影片嘅場景。一路沿著商店街行，您又認得幾多間店舖喺動漫中出現過呢？
睇完以上介紹，係咪好想去兵庫縣西宮市親眼睇吓喺《涼宮春日的憂鬱》出現過嘅真實場景呢？呢個地區有唔少動漫中出現過嘅畫面，帶動埋當地嘅旅遊業呢。唔知你去嘅時候，會唔會同一班「奇特嘅高中生」擦身而過呢？諗起就興奮喇！
Comments