蕎麥麵（そば / Soba）係日本經典麵食之一，無論夏天或冬天都非常適合品嚐。蕎麥麵健康，價錢經濟實惠，食法亦非常豐富，喺一般餐廳或高級餐廳都會見到蕎麥麵嘅蹤影。普遍日本人心目中，都各有屬於自己嘅蕎麥麵食法—無論係喺熱騰騰嘅蕎麥湯麵上頭，擺上炸得酥脆嘅天婦羅，或者係清涼爽口嘅竹簍蕎麥麵配沾醬嘅食法，味道簡單又美好令人讚不絕口！
何謂蕎麥麵？
蕎麥麵係日本獨有特殊麵食，由蕎麥粉製作而成。日本開始食用蕎麥嘅歷史，可以追溯至繩文時代（西元前14,000年～300年），最初係以類似餃子、餅乾嘅型態；而現今所食用嘅蕎麥麵，則於17世紀初期江戶時代出現，據聞最早係誕生於長野縣！
蕎麥麵與烏冬相比，麵條比較細，富含硫胺素以及八種氨基酸，因此成為注重健康飲食嘅日本人麵食首選。蕎麥麵適合凍食與熱食，而且經常名列各地在地美食排名前方，係日本極受歡迎嘅國民美食之一。
蕎麥麵上檯速度非常快，可以極速解決一餐，而且最緊要係價格夠晒經濟實惠！有部分製造商會加入小麥粉，增加蕎麥麵口感與彈性，而傳統長野信州蕎麥麵裡面，蕎麥粉比例係要達到40%以上。
蕎麥麵學問大！製造方法、添加成分令蕎麥麵極具特色
蕎麥麵本身雖然簡單，但隨著原產地、製造方法以及額外添加嘅唔同材料，所產生嘅姿態亦千變萬化。日本國內有各式各樣蕎麥麵 ，配搭時令食材、當地特色菜餚享用時會更加美味！
手工蕎麥麵 品嘗蕎麥麵精髓
超市購買嘅蕎麥麵通常都係機器製造，但傳統蕎麥麵需要經由手工揉麵，從一開始嘅篩粉、加水、和麵、揉麵、擀麵、折疊麵糰、切麵，每個步驟都非常重要，缺一不可，先可以製作出美味嘅蕎麥麵。
十割蕎麥？二八蕎麥？
蕎麥麵主要成分係蕎麥粉，而為咗追求蕎麥麵嘅口感，麵粉與小麥粉比例會有所調整。
百分之百使用蕎麥粉就稱為「十割蕎麥」，麵條雖無黏性、亦比較無彈性與嚼勁，但香氣十足。一般常見嘅「二八蕎麥麵」，就係20％小麥粉與80％蕎麥粉製作而成，用小麥粉增加麵條黏合度，食落比較彈牙。而用新鮮收割嘅蕎麥製作稱為「新蕎麥麵」，味道更香甜。
海藻、抹茶都都可以係製作蕎麥麵嘅原料？
使用唔同嘅蕎麥品種，製造出嘅蕎麥麵亦會有所不同。比較受歡迎嘅有「鄉村蕎麥（田舎蕎麦）」，麵條粗又黑，有少少粗獷，使用成粒未去殼嘅蕎麥製作。而更科蕎麥又係另一個種類，使用「一番粉」製作。一番粉所指係最先磨出嚟，胚芽中心嘅白色粉末，不含蕎麥殼皮，製造出嘅麵條口感相當順滑，亦被視為蕎麥麵中嘅逸品。
另外，為咗改變蕎麥麵嘅顏色、口感和風味，仲會添加額外成分。大家應該都有見過綠色蕎麥麵，而綠色蕎麥麵就係加入抹茶粉嘅抹茶蕎麥麵。仲有添加海藻嘅片木蕎麥麵更加係新潟名產。另外，仲有添加野生山藥嘅自然薯蕎麥麵、添加艾草嘅艾草蕎麥麵等。
從北海道至長野 地區各有各自特色蕎麥麵
日本各地都有蕎麥麵，使用當地蕎麥製作而成，各有各自家風味，例如北海道就有來自旭川市江丹別地區嘅江丹別蕎麥麵。北海道地區蕎麥生產量佔全國約40％，由於夏季與冬季溫差極大，適合蕎麥生長，因此可製作出高品質蕎麥粉。
源自長野嘅信州蕎麥、信濃蕎麥，喺日本非常受歡迎，長野更被認為係蕎麥麵發源地。由於火山地質，土壤肥沃、氣候以及優質泉水等總總條件之下，令長野可以生產出日本最好嘅蕎麥麵而聞名。
當然，日本特色蕎麥麵唔單止得以上介紹嘅內容！下篇會為您介紹如何享用一碗美味可口嘅蕎麥麵，以及地方特色蕎麥麵～
Comments