日本九州大分縣大分市嘅旅遊景點相當豐富，例如以野生日本馬騮聞名嘅「高崎山自然動物園」、能夠欣賞海豚等海洋生物表演嘅「海之卵水族館」以及歷史悠久嘅建築物等等，非常值得九州之旅時逐一探索玩盡！大分市除咗可以玩得精彩，美食方面亦相當豐富。遊客有機會品嚐得到使用豐後水道所捕獲嘅海鮮、豐後牛等大分當地孕育出嘅好滋味。事不宜遲，而家就即刻跟著小編出走一遊，帶您感受大分市無窮嘅特色！
大分市必玩旅遊景點
國立公園 高崎山自然動物園
「國立公園 高崎山自然動物園」係日本國內最多野生日本馬騮群居嘅棲息地，園內約有1,000隻野生日本馬騮棲息。遊客能夠親眼觀察野生日本馬騮嘅生態與作息，被稱為「B群」、「C群」嘅唔同馬騮轉仲會輪流轉換場地聚集呢。
景點資訊
- 景點名：國立公園 高崎山自然動物園
- 地址：大分縣大分市神崎3098-1
- 交通：從JR大分站乘搭往「關之江」、「鐵輪」、「國東」等方向嘅大分交通巴士，喺「高崎山自然動物園前」落車；從JR大分站自駕約25分鐘
- 營業時間：09：00～17：00
- 門票：成人、高中生 520日圓、中小學生 260日圓、幼稚園以下兒童免費
- 官網：https://www.takasakiyama.jp/en/
大分Marine Palece「海之卵水族館」
「海之卵水族館」坐落於高崎山與別府灣之間，擁有優越地勢。您能夠欣賞到海豚、海象表演，仲可以近距離觀察海洋生物嘅生態。
景點資訊
- 景點名：大分Marine Palece「海之卵水族館」
- 地址：大分縣大分市高崎山下海岸字UTO 3078番地之22
- 交通：從JR別府站前嘅巴士站，搭往「大分站」方向嘅大分交通路線巴士，喺「高崎山自然動物園前」站落車；從JR大分站，乘搭往「別府」方向嘅大分交通路線巴士，喺「高崎山自然動物園前」站落車
- 營業時間：09：00～17：00
- 門票：成人（高中生以上） 2,300日圓、學生（中小學生） 1,150日圓、小孩（四歲以上）750日圓、3歲以下免費
- 官網：https://www.umitamago.jp/index-tc/
帆足本家富春館
帆足家1586年於大分縣戶次落成，由江戶時代擔任臼杵藩藩主（即村長）稻葉氏統治。戶次位於大野川南方出入口，大野川流經豐後國（現今大分縣）嘅中心地帶，係相當重要嘅交通要塞，因此昔日商業活動繁榮興盛。帆足家務農之餘亦有釀酒，所以累積唔少財富，順理成章地帆足家主屋「富春館」成為眾多文人墨客、風流雅士聚會交流嘅聚腳地。
帆足本家富春館承繼此傳統，現今成為文化傳播據點，企劃並舉辦各式各樣展覽與活動，例如喺主屋藝廊展示繼承日本傳統文化嘅藝術家作品之外，又提供日式點心嘅菓子處、於「LlFE＆DELI」販賣各種食品並開設餐廳供應美食。喺藝術與傳統包圍下，令人不其然想喺度優雅悠閒地渡過一段下午時光，值得用多少少時間慢慢地去欣賞呢個景點。
景點資訊
- 景點名：帆足本家富春館
- 地址：大分縣大分市中戶次4381
- 交通：
- 從JR豐肥線「中判田」站落車步行約20分鐘，自駕約5分鐘
- 從大分TOKIWA百貨公司前搭前往「臼杵」、「佐伯」、「竹田」、「熊本」等方向嘅巴士，喺「戶次郵局前」巴士站落車，徒步約5分鐘
- 營業時間：
- 藝廊 11：00〜17：00
- 餐廳 11：30〜17：00
- 菓子處 10：00〜17：00
- LIFE & DELI 10：00〜17：00
- 定休日：星期一、星期二（遇公眾假期嘅情況，順延至隔日休）
大分市必食美食
大分市美食豐富，包括大分縣與愛媛縣之間嘅豐後水道所捕獲嘅關竹莢魚・關鯖魚、大分河豚（俗稱雞泡魚）在內等等眾多美味海鮮，以及豐後牛、酸橙、香菇等等肥沃土地孕育而來嘅山珍，保證令人大食過番尋味。有機會去大分市一遊嘅話，記得一定要去食以下落嚟介紹嘅美食，即刻Mark低放入您嘅必食心水名單啦！
大分河豚
一般嚟講，河豚最好食嘅季節係9月下旬至3月下旬呢段寒冷時期。但嚟到大分，遊客卻一年四季都可以品嚐得到河豚嘅美味。除咗河豚魚生，仲有河豚鍋、炸河豚等等豐富多元食法，淋漓盡致地展現河豚誘人滋味。記得淋上大分特產嘅酸橙汁，更加能提升河豚嘅美味喔！
關竹莢魚・關鯖魚
豐後水道水流快速，加上浮游生物非常豐富，因此孕育出嘅「關竹莢魚」、「關鯖魚」魚肉肉質紮實鮮甜、爽口彈牙。2款魚種都係日本著名嘅高級魚佼佼者，美味程度難以用筆墨去形容。
豐後牛
「豐後牛」指嘅係喺大分縣生產嘅黑毛和種和牛與牛肉。喺1921年東京舉辦嘅日本全國畜產博覽會榮獲1等獎以嚟，優質嘅肉質與味道大受好評。大分縣趁著獲獎第100個年頭嘅時機，推出「大分和牛」全新和牛品牌，希望畀更加多嘅人品嘗到豐後牛細緻優雅嘅幸福滋味。
相關文章：【日本美食】入口即溶「大分和牛」豐後牛！精選5間大分和牛餐廳清單
雞肉天婦羅
「雞肉天婦羅」係以日式醬油、蒜蓉醃好嘅雞肉，裹上麵粉、雞蛋、水所製作嘅麵衣包著雞肉拎去油炸而成嘅大分縣當地鄉土料理之一。喺大分縣無論係餐廳、賣便當嘅店舖等等，隨處都會見到「雞肉天婦羅」，必定會出現喺大分縣嘅餐檯上嘅經典料理之一。
琉球丼
琉球丼係將竹莢魚、鯖魚、鰤魚等魚肉切片，用日式醬油、酒、薑、芝麻等調配好嘅醬料醃好之後，再放上蔥花、Wasabi去享用嘅地道美食。無論係放喺熱辣辣嘅白飯上面，或者以茶泡飯嘅方式去享用都一樣咁美味。
大分市交通方式
- 從大分機場至大分站：乘搭大分交通機場巴士「Airliner」，車程約1小時
- 自駕：從福岡市博多至大分市，經由九州橫斷自動車道／大分自動車道／長崎大分路線，車程約2小時
- 乘搭電車：從JR博多站搭「特急列車 音速號」至JR大分站，車程約2小時25分鐘
大分市距離溫泉勝地別府市唔遠，非常適合去一趟溫泉一日遊。喺別府市山上嘅立命館亞洲太平洋大學有來自亞洲各國嘅留學生就讀，都會喺別府市、大分市嘅酒店、旅館、餐廳等等打工，旅途中話唔定會遇到嚟自香港嘅店員為您服務，講中文都無問題，大家可以試一試。大分市仲有非常多充滿特色嘅旅遊景點及美食，規劃大分市旅遊行程時不妨可以參考以下網站。
- 一般社團法人大分市觀光協會官網：https://www.oishiimati-oita.jp/tw/
Comments