「原尻瀑布」係從大約9萬年前阿蘇山大爆發時噴發出嘅碎熔岩流所形成。位於田園地帶裡面嘅瀑布景色非常壯觀，可以感受到大自然嘅鬼斧神工，更被譽為「東洋尼加拉瓜大瀑布」。下次出發去日本大分旅遊嘅話，不妨將「原尻瀑布」排入行程，親自感受「東洋尼加拉瓜大瀑布」嘅震撼力！
置身於田園地帶中嘅「東洋尼加拉瓜大瀑布」
原尻瀑布闊120米，高20米，置身平原中央，被一片田園景色環繞，係大分豐後大野地質公園最具代表嘅地質景觀之一，更被獲選為「日本瀑布100選」。原尻瀑布起源於大約9萬年前阿蘇山嘅一場大爆發中，噴發出嘅碎熔岩流冷卻所形成嘅地形。除咗眼前壯觀嘅優美瀑布景緻，仲可以觀察岩壁上嘅柱狀節理等罕見嘅地質景觀，充分感受大自然嘅鬼斧神工。
於散步行人徑繞行瀑布一圈
位於瀑布下流處，有一條木造吊橋「瀧見橋」，可以從瀑布正前方親身感受瀑布嘅震撼力同壯觀景色！而喺瀑布不遠處上游有一條「沉下橋」（河川水量增加時，橋面就會沉入水面之下），行過沉下橋就會見到一條散步行人徑，可以圍著瀑布行一圈，仲可以去到瀑布水潭正面嘅河床，從各種唔同角度去欣賞瀑布嘅壯觀景緻。
欣賞完瀑布美景，想嘆返幾樣大分當地美食嘅話，推薦大家可以去瀑布水潭附近嘅道路休息站「道之驛 原尻瀑布」，除咗有豐後牛陶板燒，仲有糰子湯定食，雞肉天婦羅定食等等當地美食，可以大飽口福！
原尻瀑布交通方式
- 地址：〒879-6631 大分縣豐後大野市緒方町原尻936-1
- 從JR九州豐肥本線緒方站自駕約7分鐘
- 從緒方站乘搭大野竹田公車往「竹田」方向，車程約10分鐘，在「原尻瀑布入口」落車。
「原尻瀑布」旅程中沿途風景處處，令人目不暇給，下次計劃大分旅遊嘅話，不妨去「東洋尼加拉瓜大瀑布」感受壯觀景色。另外，如果對地質學有興趣嘅話，仲可以將附近嘅地質景觀排入行程，順便出發一趟地質之旅，親身體驗大自然嘅奧秘！
Comments