【永久保存版】先飽覽九州田園風光，再食米芝蓮一星列車便當！九州之旅必搭觀光列車「由布院之森」

「由布院之森」由JR九州特別設計，係一列旨在令乘客可以體驗一段充滿故事性嘅旅程嘅觀光列車。編輯部保證，各位下次從博多前往由布院或別府方向時，如果有幸搭到「由布院之森」將必定值回票價！此話可解？而家就等小編為您介紹「由布院之森」，帶您進入一段既獨特又充滿豐富樂趣嘅列車之旅啦！

觀光列車之先驅！一切先從設計＆故事開始…

「由布院之森」係一輔JR九州鐵路公司於1989年推出嘅列車，整體散發著一股度假村氛圍。「由布院之森」會從福岡縣博多站行駛至大分縣由布院站或別府站，全車座位皆係指定席（必須預先劃位），並中途於鳥栖、久留米、日田、天瀨、豐後森、由布院等各站停車。

JR九州鐵路公司希望乘客們可以盡情享受列車沿線行駛地區嘅當地特色以及窗外迷人風景，至今已推出多款充滿特色設計與室內裝飾、獨特主題嘅列車。而喺一系列被稱為D&S（Design&Story）系列嘅列車內，「由布院之森」正正係D&S（Design&Story）列車嘅先驅！

「由布院之森」特色

「由布院之森」採用高層式構造，將座位設置於高層，方便乘客從車窗向外望時能夠以高人一等視角享受動人景色；而車內裝飾則用上大量木材，打造出既溫馨又典雅嘅車廂。

車輛可分為兩種類型，分別係1989年登場嘅 KIHA70系（「由布院之森」3號車與4號車）與1999年3月起新增嘅KIHA72系（「由布院之森」1號、2號、5號與6號車）。KIHA70系車輛由4節車廂組成，KIHA72系則由5節車廂組成，兩種類型車內設計風格皆略有不同。

列車基本座位排列為 2列×2席，另外仲有附設大型檯嘅4人包廂席，最啱一家大細或三五知己去出遊時乘搭！

最前排與最後排嘅位置設有觀景座位，能夠飽覽眼前180度嘅明媚景色。由於前排與後排都只有四個座位，想要體驗一下頂級觀景座位嘅話，就要記得搶先提早劃位預約！

眺望車窗外雄偉壯麗景色，品嚐特色美食

乘搭「由布院之森」最大嘅樂趣，就係可以欣賞到車窗外無數嘅動人景色！從「由布院之森」車窗眺望出去，乘客可以欣賞到沿線一片遼闊嘅田園景致以及雄偉群山與玖珠川風景。

「由布院之森」喺抵達由布院之前，車廂裡面嘅公共空間將會有車廂服務員為您介紹沿途風光，對於第一次去由布院嘅人嚟講可謂相當貼心。（公共空間僅設於70系車廂）

乘搭從博多前往由布院、別府方向行駛嘅列車時，小編會建議您坐喺列車前進方向嘅右邊座位，相反從別府、由布院往博多方向嘅列車，就建議坐喺前進方向嘅左邊座位，咁就可以好好地欣賞天瀨站附近嘅知名景點「慈恩瀑布」。

慈恩瀑布一帶流傳著大蛇與龍神嘅傳說，因病受苦嘅龍神獲僧侶拯救後而得「慈恩」之名。當「由布院之森」喺靠近慈恩瀑布嘅時候，車長會減慢列車行駛速度，等乘客有足夠嘅時間，慢慢欣賞慈恩瀑布嘅迷人景色。

必check米芝蓮一星級北九州名店美食！

「由布院之森」列車設有酒吧（KIHA70系設於2號車廂、KIHA72系設於3號車廂），主要販賣輕食及飲品等等。美食包括由米芝蓮一星北九州名店「竹本壽司」主理嘅獨家列車便當，以及地道特色啤酒「由布院麥酒」，以及由布院日本茶專門店桐屋所製作嘅濃茶雪榚與臭橙（日本大分縣特產，柑橘類水果）雪榚等等，識食一定係把握機會將所有當地特色美食一網打盡！

列車上亦有販售原創毛巾、立體鎖匙扣、原創杯墊等等由布院之森周邊商品，最適合買嚟用作「由布院之森」列車之旅嘅紀念品，為旅程留低一個美好回憶。

「由布院之森」乘搭方法

要乘搭「由布院之森」前往由布院，建議購買「JR九州鐵路周遊券」。

一張「JR九州鐵路周遊券」在手，您唔單只可以乘搭由布院之森等眾多九州人氣觀光列車，仲可以無限次乘搭新幹線，非常物超所值！而且可以網上購票，想要嚟一場經濟實惠又超值嘅旅遊，可以話係最佳選擇。票券種類及價格等相關資訊，可以到官網查詢，並根據想去嘅目的地搜尋適合自己嘅旅程周遊券。