香港人對於「志賀島」呢個地方可能會感到陌生，但日本人就或多或少細細個就聽過「志賀島」呢個名！志賀島自古以來與朝鮮半島、中國大陸嘅來往相當頻繁，於歷史年月累積下，島上坐擁有豐富史蹟，更係全國著名水上活動勝地，例如滑浪、浮潛等等都可以一一喺島上體驗得到。從福岡市出發去志賀島嘅交通非常方便，下次去福岡玩嘅話，不妨安排一場志賀島旅程，令您嘅福岡之旅別有一番風情～
擁有悠久歷史嘅志賀島
志賀島位於福岡市西北方，由沙洲與九州本土相連，沿著海之中道就可以抵達，屬日本稀有少見嘅陸連島。從博多站揸車出發，經由海之中道，越過志賀島橋，車程約40分鐘即可抵達，交通相當方便。
一提到志賀島，日本人就一定會聯想起島嶼係出現喺歷史書裡面，曾經出土1國寶金印「漢委奴國王印」嘅地方。相傳志賀島於古代係來往朝鮮半島、中國大陸之間，提供船隻停靠休憩住宿之地。西元8世紀奈良時代所編撰日本最古老嘅和歌集「萬葉集」當中，就有16首和歌歌詠志賀島；而西元13世紀時蒙古大軍攻打日本時，志賀島則淪為戰場。種種歷史烙印令面積不大嘅志賀島於日本歷史當中佔有重要一席，島上現時仍遍佈與歷史息息相關嘅史蹟。以下就為大家介紹幾個與志賀島歷史相關嘅史蹟以及公園啦！
金印公園
金印公園所在位置就係1784年志賀島農民發現「漢委奴國王印」嘅地方。公園入口有一座紀念碑，寫著「漢委奴國王印發光之處」，園內亦有展出以志賀島為中心嘅古代地圖。
志賀海神社
志賀海神社自古以來就有「海神的總本社」、「龍之都」嘅稱號，主要祭祀日本神話中當伊邪那岐從死者之地、黃泉國返來後，祓除洗淨身軀時誕生嘅「三位神明」。「三位神明」分別係「上津綿津見神」、「中津綿津見神」、「底津綿津見神」。
參拜時間：06：00～17：30 （元旦日於凌晨12點開門）
蒙古塚
蒙古軍曾經2度攻打日本，蒙古塚係弔念並供養文永、弘安之役（1274年、1281年）下戰死嘅蒙古軍士兵，於1927年所建立嘅石碑。蒙古塚原本設置於北邊丘陵上方，但由於2005年玄界灘所發生嘅福岡地震中遭受巨大損毀，所以蒙古塚轉移至南邊，即現今所在地。
萬葉歌碑巡禮
志賀島島上有10座萬葉歌碑，歌碑上刻著多首和歌，不妨去行個圈欣賞一番，除咗可以陶冶性情，仲可以趁機呼吸一下陣陣嘅日本文學氣息。
踩單車兜風，仲可以浸埋即日來回溫泉！
志賀島一圈約10km、道路地勢平坦，各位可以踩單車踩個痛快，係絕佳嘅單車兜風路線。港口附近有一間單車店兼Café「志賀島單車」（シカシマサイクル）可以畀各位租單車，想要出發單車遊嘅話非常方便。天氣好嘅話，不妨一邊踩單車、一邊吹著海風，暢遊島內名勝史蹟。
- 費用：越野公路車 2,500日圓／3小時、保證金100日圓／每人
＊其他公路車、登山車等等車款，請上官網確認。
位於志賀島北邊「渡假村志賀島」擁有島上唯一一座嘅天然溫泉「金印之湯」，記得去感受一下浸住溫泉睇靚風景。渡假村志賀島仲有提供即日來回浸溫泉套餐，可以一嘗志賀島名產海螺等等嘅美食，不妨嚟嘆個溫泉好好放鬆，順便舒緩一下旅程中嘅疲勞。
即日來回浸溫泉服務
- 入場時間：11：00〜15：00
- 門票：成人 650日圓、小學生 330日圓、 小童（4歲〜6歲） 110日圓
跟餐即日來回行程 「海螺三吃大海香味御膳」2500日圓（未稅）／需2日前預約
跟餐即日來回行程 「海鮮丼」 1800日圓（未稅）／可當日預約 - 定休日：每月第三個星期日
浮潛與滑浪好去處
志賀島唔單止歷史氣息夠晒濃厚，仲係著名嘅水上活動景點，可謂動靜皆宜。除咗有海水浴場，仲可以進行衝浪、浮潛等等嘅水上活動，盡情享受志賀島熱情奔放嘅魅力。浮潛地點集中喺東海岸，可以一嘗零距離賞魚，「與魚同游」大海嘅樂趣。
沿途推薦景點「海之中道海濱公園」與「海洋世界海之中道」
從福岡市市區出發去志賀島嘅途中，您會經過「海之中道海濱公園」以及「海洋世界海之中道」。「海之中道海濱公園」佔地相當廣闊，園內分成多個區域，例如可以近距離接觸小動物嘅「動物之森」、一年四季都可以欣賞到美麗花卉嘅「花之丘」、「花之博物館」等等；而水族館「海洋世界海之中道」除咗有必睇「海豚海獅Show」，仲有其他精彩位可以更了解神秘海洋嘅生態，令人大開眼界。
海之中道海濱公園
- 營業時間：
- 3月1日〜10月31日 09：30〜17：30
- 11月1日〜2月底 09：30〜17：00
- 定休日：12月31日、1月1日、2月第一個星期一和隔天
＊由於自然災害等因素，在無法保障入園客人之安全狀況下，可能暫停營業。 - 門票：大人（15歲以上）450日圓、 65歲以上210日圓、中學生以下 免費
- 官網：https://uminaka-park.jp/en/
海洋世界海之中道
- 營業時間：
- 9月：平日 09：30〜17：30 、六日及假日09：30〜21：00
- 10月、11月：09：30〜17：30
- 10月30日（萬聖節晚上）：09：30〜21：00
- 12月〜2月：10：00〜17：00
- 12月24日、12月25日（聖誕夜晚上）10：00〜21：00
- 定休日：2月第一個星期一和隔天（2021年為2月1日、2月2日）連續兩日
- 門票：成人 2,350日圓（長者票1,880日圓）／高中生 2,350日圓／中學、小學生 1,100日圓／小童（3歲以上未就學）600日圓
- 官網： https://marine-world.jp/en/
前往志賀島嘅交通方式
- 自駕：從都市高速公路「香椎濱出入口」落交匯處，經海之中道大橋約30分鐘
- 西鐵巴士：從天神中央郵局前（18A）搭21A號巴士（往志賀島小學前），車程約60分鐘
- JR：從博多站至西戶崎站，車程約40分鐘，從西戶崎站搭西鐵巴士21A號巴士（往志賀島小學前）或1號巴士（往勝馬）車程約12分鐘
- 市營渡輪：從博多灣碼頭（博多灣岸廣場）至志賀島渡船場約30分鐘
志賀島除咗擁有濃厚嘅歷史氣息，仲有無敵嘅大海景與各種水上活動，景點非常豐富之餘，當您從福岡市市區前往志賀島嘅途中，仲可以順便玩埋「海之中道海濱公園」和「海洋世界海之中道」，呢個福岡之旅簡直好玩到您唔捨得走！
Comments