拉麵絕對可以稱得上係日本代表性美食之一，從南到北每個地區都有充滿當地特色嘅湯底，從而誕生出多款獨特拉麵。事實上，近年刮起一陣「無麩質（Gluten-free）飲食」風潮，即使係以往與麩質劃上等號嘅拉麵行業，都有唔少店主投身無麩質飲食行列！今次FUN!JAPAN編輯部就為大家精選出5間提供「無麩質拉麵」嘅店舖，即使係「無麩質飲食」都一樣可以食拉麵食得健康！
咩係「無麩質飲食」？
麵粉主要原料為小麥、大麥等榖物，但係有部分人士對於穀物中所含嘅麩質蛋白呈現過敏反應，無法食用麵粉製品，包括常見嘅麵包、麵條、蛋糕等等。日常生活中必須全面避開麩質蛋白嘅飲食習慣，就稱之為「無麩質飲食」。
無麩質飲食者要避開蛋糕、餅乾等食品，盡量食用原型食材，最近亦有唔少人為咗減肥、維持身材等原因開始進行「Gluten-free無麩質飲食法」，令無麩質飲食漸成風潮。
拉麵都可以無麩質！5間推薦店舖
隨著麩質過敏群眾增加與無麩質飲食風氣盛行，日本亦有拉麵店開始推出無麩質拉麵，希望人人都可以盡情享用健康拉麵！
1. 北海道「福之樹」
位於札幌市「福之樹」拉麵店主打濃厚番茄湯底拉麵，老闆擁有藥膳師資格，而且對食材非常考究，絕不使用化學調味料，亦會開發出獨特藥膳湯底，務求大家可以食得安心又放心。除咗拉麵之外，店家亦有提供藥膳咖哩與擔擔麵任君選擇。「福之樹」無麩質美食真材實料又對身體零負擔，難怪深受當地居民喜愛。
「福之樹」最受歡迎係「海老じゃらし」，由三種鮮蝦所熬製而成嘅精華，再加入番茄湯底所誕生嘅絕妙組合，食落香醇不膩令人一試難忘，係「福之樹」嘅信心之作，加上提供蒟蒻麵與米粉麵兩種無麩質麵類任君選擇，令您可以食得更加多元化。
店舖資訊
- 店名：福之樹（福の樹）
- 地址：北海道札幌市中央區南4條西10丁目 南四條unihouse 1F
- 交通方式：從地下鐵東西線西11丁目站徒步約7分鐘
- 營業時間：
- 平日 11：30〜15：00、17：00〜21：00
- 六日及假日 11：30〜21：00
- 價錢：海老じゃらし 980日圓（麵條可更改為無麩質麵條，需另外加價100日圓）
- 無需購買餐券，不可使用信用卡
2. 東京「天空之色NIPPON＠東京站拉麵街」
「天空之色NIPPON」店主曾經喺著名連鎖拉麵店「一風堂」工作超過10年，擁有深厚拉麵知識，後來以「女性都可以單獨輕鬆進內嘅店舖」為目標獨立創立「天空之色NIPPON」。品牌除咗係大受日本女性歡迎嘅人氣拉麵店，亦係日本最早提供無麩質拉麵嘅店舖，更致力發展素食拉麵。
「天空之色NIPPON」所選用嘅無麩質麵條係玄米麵，嚟自位於島根縣山間村落中專門販賣白米加工品與無麩質產品嘅店舖「宮內舍」。無麩質拉麵菜單「グルテンフリー塩ラーメン（無麩質鹽味拉麵）」無論係麵條、醬汁、油或配料等等全部都係「零小麥」，毫不含任何小麥成分。
店舖資訊
- 店名：天空之色NIPPON＠東京站拉麵街（ソラノイロNIPPON@東京駅ラーメンストリート）
- 地址：東京都千代田區丸之內1-9-1 東京站一番街地下拉麵街
- 交通方式：JR東京站八重洲地下街直通
- 營業時間：09：00～22：30
- 價錢：無麩質鹽味拉麵 1,300日圓
- 請於餐券機購買餐券，不可使用信用卡
- 官網：https://soranoiro-vege.com/contactall/
3. 東京「麵匠 真武咲彌 澀谷店」
「麵匠 真武咲彌 澀谷店」以夠晒地道嘅味噌拉麵聞名，選用13種食材所釀造嘅秘傳味噌於加入大量蔬菜後，就成為一碗味道層次豐富嘅湯底。當拉麵上枱後，記得千祈唔好食得太急，皆因呢度嘅拉麵出晒名係「熱焫焫」超高溫！
「麵匠 真武咲彌 澀谷店」同樣地使用嚟自島根縣「宮內舍」嘅無麩質玄米麵，購買票券嘅時候已貼心顯示「玄米麵グルテンフリ（玄米麵Gluten-free）」分類，可以直接選擇超級方便。而喺咁多款拉麵當中，編輯部尤其推薦「炙燒味噌拉麵」；拉麵之外嘅選擇，則有無麩質炸雞，可以話係無麩質飲食人士嘅夢幻菜式！
店舖資訊
- 店名：麵匠 真武咲彌 澀谷店
- 地址：東京都澀谷區道玄坂2-10-3
- 交通方式：京王井之頭線、JR線、東急東橫線、田園都市線、東京METRO半藏門線、銀座線、副都心線等各線澀谷站
- 營業時間：
- 星期二～星期四 11：00～凌晨05：00
- 星期五、星期六 11：00～凌晨07：00
- 星期日 11：00～凌晨02：00
- 價錢：無麩質炙燒味噌玄米麵 1,250日圓
- 請至餐券機購買餐券，可使用PASMO、SUICA付款，不可使用信用卡
4. 大阪「MITSUKA BOSE 釀 梅田店」
「MITSUKA BOSE（みつか坊主）」係關西少見嘅味噌拉麵專門店，喺大阪有兩間分店，其中梅田分店於新冠肺炎疫情危機中將店舖轉型，成為「食材選物店＋酒吧＋餐廳」三合一嘅全新型態拉麵店。
「MITSUKA BOSE（みつか坊主）」除咗會使用世界各地嘅味噌創作出全新口味味噌拉麵之外，仲有提供5種全素拉麵，而且每款口味嘅拉麵都可以選擇將麵底換成無麩質麵條。
店舖資訊
- 店名：MITSUKA BOSE 釀 梅田店（みつか坊主 醸 梅田）
- 地址：大阪府大阪市北區大淀南1-2-16
- 交通方式：
- 從JR東海道本線大阪站櫻橋口徒步約5分鐘
- 從大阪地下鐵四橋線西梅田站徒步約8分鐘
- 從JR東西線北新地站徒步約10分鐘
- 營業時間：
- 星期一～星期六 11：30～14：30、18：30～23：30
- 星期日、假日11：30～14：30、17：30～22：00
- 價錢：素食大阪拉麵（無麩質麵） 1,480日圓
- 無需購買餐券，可使用信用卡、支援無現金支付方式
5. 福岡「秀醬拉麵TOMBO店」
「秀醬拉麵TOMBO店」店主赤峯TOMBO以前係吉本興業嘅搞笑藝人。雖然店主係從諧星行業出身，但對於拉麵嘅製作就絕不搞笑相當認真，以師承福岡拉麵老店嘅豬骨口味為基底並不斷改良創新，終於創作出擁有濃厚湯底、卻入口清爽嘅福岡拉麵。
「秀醬拉麵TOMBO店」所有口味嘅拉麵都可以選擇將麵底換成無麩質麵條。值得一提嘅係，「秀醬拉麵TOMBO店」並唔單止係一間拉麵店咁簡單，仲係一間以拉麵店＋居酒屋模式經營嘅食店，一場嚟講不妨可以嗌多幾款下酒小菜，絕對係同親朋好友相聚餐嘅好選擇。
店舖資訊
- 店名：秀醬拉麵TOMBO店（秀ちゃんラーメンとんぼ店）
- 地址：福岡縣福岡市警固2-13-11
- 交通方式：地下鐵機場線「赤阪」站 徒步約7分鐘
- 營業時間：
- 11：30〜14：00（星期六日及公眾假日至14：30）
- 19：00～24：00（公眾假日前一日至24：30、星期日及公眾假日至23：30）
- 定休日：星期一
- 價錢：所有拉麵加價150日圓即可更換為無麩質麵
- 無需購買餐券，不可使用信用卡或電子貨幣，可使用PayPay付款
Comments