從福岡市市區自駕出遊嘅話，車程約30分鐘即可抵達「絲島」，非常方便。「絲島」係面向玄界灘突出嘅半島，擁有美麗海岸線，絲島南邊係一大片名叫「背振山地」，橫跨福岡縣同佐賀縣縣界嘅山地。絲島最出名嘅景色就係西沈玄界灘嘅夕陽景緻。除此之外，置身於絲島，仲可以同時享受山林與海洋嘅休閒娛樂。絲島絕景多多，度度都係影相打卡靚位，近呢幾年特別受女性遊客歡迎！
絲島海邊旅遊景點
首先，為大家介紹絲島海邊旅遊景點，絕美蔚藍海景極度吸睛。
櫻井二見浦夫婦岩
絲島最有名嘅旅遊勝地之一。相比起位於三重縣伊勢市嘅「二見浦」睇日出非常著名，而喺「櫻井二見浦」可以欣賞到嘅就係西沈入玄界灘嘅日落景色，稱為「夕陽的二見浦」，遠近馳名！自古以嚟呢塊土地隸屬櫻井神社範圍，被認為係能量景點。而二見浦嘅夕陽美景更被獲選為「日本夕陽百選」之一！
PALM BEACH THE GARDENS
位於櫻井二見浦夫婦岩附近有間渡假購物中心「PALM BEACH THE GARDENS」，裡面除咗有烹調嚴選當地自給自足嘅食材嘅「PALM BEACH」餐廳、夏威夷風味「SURFSIDE CAFE」、仲有意式雪糕店「ALPACHINO」等等店舖。從「PALM BEACH THE GARDENS」漫步去沙灘嘅路上，會見到一幅特色牆壁，牆上畫咗一對巨大天使翅膀。當您企喺呢幅特色牆前面影相嘅時候，驟眼望落去自己就好似真係擁有翅膀嘅天使一樣，非常夢幻！係超人氣嘅打卡景點。
Beach Cafe SUNSET
另外，同樣位於二見浦嘅「Beach Cafe SUNSET」都非常值得推薦畀大家，可以一邊眺望眼前遼闊蔚藍大海，一邊品嚐以當地食材製作嘅美食同飲品，非常寫意。從「Beach Cafe SUNSET」越過馬路，正前方有一個以流木所建造嘅涼亭，充滿藝術風格，搭配美麗海景，亦係人氣嘅打卡景點。
芥屋大門
另外一個必去景點就係「芥屋大門」，沿著海岸線嘅兜風路線「落日大道」奔馳，途中就會見到呢個景點。芥屋大門係日本最大玄武岩洞，高64米、洞深90米、正面闊約10米洞窟，同佐賀縣「唐津市七釜」、兵庫縣豐岡市「玄武洞」齊名，合稱「日本三大玄武洞」。六角形、八角形玄武岩形成柱狀節理，佇立於海上嘅姿態非常雄偉壯觀！
每年3月中旬至11月可以搭遊覽船，從芥屋漁港出發，運氣好嘅話風平浪靜咁遊覽船就會駛入洞窟裡，可以近距離欣賞蜂巢狀洞頂，感受洞窟內嘅神秘。
絲島山林旅遊景點
白絲瀑布
位於絲島市南方有一座羽金山，「白絲瀑布」位於呢座山羽金山嘅山腰，被選為福岡縣指定名勝。瀑布就好似白絲咁白皙絲滑，從岩壁流落嚟景緻相當優美，令人感動！而喺瀑布附近嘅「白絲瀑布交流之里」，有茶屋可以悠閒品茶，亦有賞景展望所，山女鱒嘅釣魚池等，設施完善，可以悠哉享受山林時光。
綻放四季之美嘅季節景點
絲島喺5月黃金週會舉辦「山女鱒釣祭」，每逢呢個時期，可以品嚐到人氣美食「流水素麵」，清涼開胃。6月下旬至7月會有10萬株繡球花盛開，浪漫又夢幻。
前往絲島交通方式
- 搭電車
・福岡機場出發，從福岡市營地鐵「福岡機場」站搭電車，經由「姪濱」站，JR筑肥線「筑前前原」站落車。
・博多出發，從福岡市營地鐵「博多」站搭電車，經由「姪濱」站，JR筑肥線「筑前前原」站落車。
・天神出發，從福岡市營地鐵「天神」站搭電車，經由「姪濱」站，JR筑肥線「筑前前原」站落車。 - 搭巴士
・博多出發，從博多巴士總站搭高速巴士「いと・しま号（絲・島號）」，「前原」站落車。
・天神出發，從天神四丁目搭高速巴士「いと・しま号（絲・島號）」，「前原」站落車。 - 開車自駕
・行駛九州高速公路，經由福岡都市高速公路，西九州高速公路「前原I.C.」出口。
大家對絲島又有咩感想呢？文章裡面介紹嘅只係一小部分，絲島其實有更多充滿魅力嘅景點等緊大家去探索。從福岡市市區、九州天空大門—福岡機場就可以輕鬆前往絲島，擁有美麗海洋、魅力無窮嘅旅遊景點，亦可以品嚐美食。下次去日本九州玩嘅時候，不妨將絲島排入行程，去享受一場走入大海、森林秘景嘅旅程！
＊照片提供：（一社）絲島市觀光協會
Comments