【日本福岡】一站式食、玩、買攻略！九州自由行交通據點—福岡博多站

位於九州地區最大城市福岡內嘅博多站，係前往九州各地嘅交通中心樞紐，因此遊客去到九州旅行嘅時候，通常都係以博多站為起點。以下就等小編帶大家網上遊用博多站，出發前往一場充實嘅九州之旅啦！

以博多站為起點規劃旅程！

博多站一直以嚟皆被稱為九州鐵道玄關口，距離福岡最繁華熱鬧嘅天神非常近。由香港飛往九州、降落福岡機場後，即可以轉乘地鐵機場線直接前往博多站，車程只需要短短5分鐘，交通非常方便！

博多站唔單只係福岡市，亦係通往九州各地嘅交通中心樞紐。前往福岡、九州旅遊嘅話，不妨多多利用博多站以及鄰近嘅博多巴士總站，開始一段美好九州之旅！

獲得博多旅遊資訊

一抵達JR博多站，遊客可以考慮先去位於車站主要通道內、中央位置嘅「福岡市旅客服務中心」。服務中心除咗有提供福岡市內旅遊介紹之外，亦有九州各縣嘅旅遊指南、福岡市交通指南、JR鐵路、博多站相關資訊、住宿資訊、以及介紹車站租車服務與協助預約服務等等，一站式服務助您輕鬆將九州相關旅遊資訊一網打盡！

於博多站兌換日幣

位於新幹線HIKARI廣場閘口附近嘅Tis博多店，係一處兌換外幣非常方便嘅地方。位於博多站前嘅福岡銀行博多站前分店亦有提供兌換外幣服務，瘋狂血拼後覺得yen唔夠使的話，不妨可以「補血」一下。

博多站內投幣式儲物櫃

太早去到博多站，又仲未到Check-In入住時間嘅話，一定係想好好利用呢段空檔，喺車站大樓品嚐美食、購物、或者去市區遊覽一番吧？呢個時候，您可以將行李寄放喺博多車站大樓內嘅投幣式儲物櫃，咁就可以兩手空空，輕輕鬆鬆咁周圍去喇。可以收納大型行李嘅投幣式儲物櫃所在地點如下：

• 中央閘票口旁
  地點：出JR中央閘票口，位於左邊
• MING名店街1樓西側投幣式儲物櫃
  地點：從JR北閘票口出嚟之後轉右，喺MING名店街入口附近
• 筑紫口入口投幣式儲物櫃
  地點：筑紫口入口旁邊
• 筑紫口戶外投幣式儲物櫃
  地點：從筑紫口出嚟之後轉左
• HIKARI廣場投幣式儲物櫃
  地點：HIKARI廣場
• JR博多城投幣式儲物櫃
  地點：AMU PLAZA B1、9F、10F、博多DEITOS B1、1F
• 3樓閘票口投幣式儲物櫃
  地點：從AMU PLAZA通往3樓閘票口嘅通道左邊

於車站大樓享受購物美食時光

與博多站直接相通嘅車站大樓「JR博多城」，由「AMU」、「AMU EST」、「博多DEITOS」、「DEITOS ANNEX」五大設施組成。從大型百貨公司「博多阪急」、「Tokyu Hands」，到日本最大規模嘅美食樓層「城市美食街Kooten」等等，內裡進駐咗非常多流行服飾、雜貨以及餐飲店舖，嚟到呢度，保證可以行到樂而忘返，搵到自己鍾意嘅美食，買到自己想要嘅商品！

JR博多城私房景點

FUN! JAPAN編輯特別推薦以四季為主題嘅頂樓庭園「燕子森林廣場（つばめの杜広場）」，以下所介紹嘅設施，無論係大人、定係小朋友都可以渡過一段悠閒時光！

• 鐵道神社
  祈求旅途平安嘅神社，表參道順序設置「星門」、「福門」、「夢門」三座鳥居。「星門」驅魔解厄；「福門」招來福氣；「夢門」結得良緣。穿過三座鳥居後，最後再祈求旅途平安啦！

• 瞭望列車區域
  距離地面達60米高，無論您係咪鐵道迷，都一定會被一架又一架停靠、駛離博多站嘅日本列車被迷住！
  
  
• 天空廣場
  天空廣場四周種植咗多種隨著四季綻放唔同嘅迷人風采花卉。小朋友可以喺呢度盡情奔跑、大朋友則可以坐低嘆返個便當，悠閒一番。
  
  
• 燕子電車
  JR九州頂級豪華臥鋪列車「七星號」設計師水戶岡銳治親手設計嘅「燕子電車」和「小黑電車」、「夢想燕子號」輪流上陣，載著大人、小朋友齊齊渡過一段歡樂時光。

• 觀景露台
  置身於60米高嘅觀景台，即可將福岡街景、博多灣美景以及群山之美盡收眼簾！

• 小黑廣場
  以JR九州列車「特急 阿蘇男孩！」當中嘅吉祥物「小黑」所命名嘅廣場。四周設有柵欄作保護，6歲以下嘅小朋友都大可以安心「放電」。

除此之外，JR博多城亦有多間鐵路相關商品專賣店，例如喺「AMU PLAZA博多」8/F嘅「POPONDETTA」可以買到N軌、HO軌等等嘅鐵路模型，又或一眾鐵路書籍與鐵路相關周邊商品。店舖裡面仲有一座巨大嘅立體透視模型擺設，絕對係鐵路模型粉絲唔可以錯過嘅朝聖地之一！

多間拉麵店與博多烏冬店聚首一堂

喺新幹線HIKARI廣場口旁邊，有一條「博多麵街道」，內有多間博多拉麵、博多烏冬名店聚首一堂。只要去到「博多麵街道」，就可以品嚐到博多名店嘅拉麵、辛辣麵等等多款麵食，選擇多到令人選擇困難症發作～

博多站唔單只係九州旅行交通中心，車站大樓本身仲係一處可以盡情購物、品嚐美食嘅好去處。喺出發去下一個旅遊景點之前，不妨利用空檔，好好享受一下博多站嘅多項設施，喺博多站行個圈啦~