一場嚟到九州福岡旅行，又點可以唔去頭號地標—福岡塔！登上123米高嘅福岡塔展望台，您即可以360度全方位將福岡靚景色盡收眼底。福岡塔裡面，有多項翱翔天空嘅娛樂設施，仲可以一邊食飯一邊眺望美麗夜景，玩法多多！如果想要打造專屬兩人嘅浪漫時刻、為另一半送上意想不到嘅驚喜，福岡塔亦有特別點燈服務為您實現心願～
登上展望台3樓 飽覽福岡360度美麗景色
福岡塔係為咗紀念1989年「亞洲太平洋博覽會」而興建，係一座高達234米嘅電波塔，地理位置靠近福岡市海濱地區。
展望台3樓距離地面123米高，從360度全景落地窗望出去，可以一次過將福岡街景、博多灣景色飽覽無遺，非常受福岡市民與遊客歡迎！同層仲有「SKY Walk 123」區域，您可以透過VR望遠鏡，觀賞實際由無人機拍攝嘅影像，景點包括能古島海島公園、馬林麥瑟福岡（Marine Messe Fukuoka）等眾多福岡知名人氣景點，如幻似真地翱翔天際，令人有如踏上一場福岡天空之旅，逼真緊張又刺激！
3樓仲有儲印仔活動，只要搵齊6大人氣旅遊景點、集齊所有印仔，就可以於「Sky Cafe＆Dining Refuge」空中餐廳用餐時享有折扣優惠。
與天空相關嘅娛樂設施SKY Play 116
位於展望台1樓嘅「SKY Play 116」區域內設有多項娛樂設施，保證可以畀您玩個夠！
「天空扭蛋」巨型得就連大人都要抬頭望先可以望清佢嘅全貌！呢部超巨型扭蛋機內裝滿九州當地吉祥物，一共有七款，大家不妨去扭一扭，睇睇自己會扭到邊一吉祥物啦～
而「抽籤彈珠台」則採用新穎抽籤方式，彈珠台會向天空發射彈珠，彈珠彈出嘅同時，隨即會響起博多祇園山笠參加者嘅呼喊聲。彈珠會喺福岡知名景點之間彈嚟彈去，彈中嘅詩籤並以博多方言寫成，係一部別出心裁嘅抽籤機～
同場嘅VR窗口「Happening Window」，則會喺您望出窗外街道嘅時候突然跳出UFO以及機械人！極寫實街景配上VR影像打造出虛擬科幻嘅假想現實，凡係現場睇過嘅人都必定大讚夠晒特別！
「SKY Play 116」內則設有一個巨型心心拱門，啱晒「打得火熱」嘅情侶們！喺福岡街景背景映襯下，最適合就係影相打卡留下美好回憶，然後將喺巨型心心拱門四周掛上福岡塔原創愛情鎖—「誓約欄」。福岡塔有一個傳說，據聞只要將寫上姓名、日期與留言嘅愛情鎖並掛喺誓約欄上，兩個人就會永遠喺埋一齊。愛情鎖可以喺同一層嘅自動販賣機購買，而掛喺呢度嘅愛情鎖於上鎖兩年後就會被拎去神社供奉，保佑兩人愛情長長久久。
而「來自月亮女神的訊息」（Msessage from the goddess of the moon），則提供占卜情侶命運嘅服務～
夢幻燈飾製造浪漫驚喜
展望台3樓「SKY Illumination」地板鋪滿夜光石，入夜後就好似天上繁星咁閃閃發光。
燦燦耀眼嘅地板再配上被選為「夜景百選」嘅福岡夜景，如此浪漫動人景色唔單只係其他地方難以體驗，更係福岡縣首屈一指夜景拍攝景點。
夜晚行到攰，編輯部會推薦您去展望台2樓「SKY Café & Dining Refuge」醫肚。遊客可以從離地120米高嘅餐廳悠閒自在地欣賞眼前一片令人陶醉嘅360度無敵夜景，一邊嘆返杯紅酒、Cocktail，喺醉意微醺之下一邊欣賞窗外迷人景色。（營業時間為11:00～21:00）
晚上嘅福岡塔因應唔同季節舉辦各種點燈、霓虹藝術燈飾活動。除此之外，官方仲有準備每日限定一組嘅服務，喺福岡塔上點上兩個人專屬嘅愛心與顏色。服務一共提供兩種方案自由選擇，價錢為3萬日圓（含稅），非常適合想要求婚、慶祝生日或紀念日等重要時刻，送畀心上人一個永生難忘嘅驚喜。點燈時間雖然只有短短五分鐘，卻保證係畢生難忘回憶！
請注意，點燈時間只會去到22:00。有興趣嘅讀者，可以到預約網站選擇自己心水日期，並以信用卡付款。
下次去福岡旅行時，不妨登上福岡塔欣賞日夜兩種特色各異嘅靚景啦～
福岡塔
- 交通方式：
- 從博多巴士總站6號乘車處，乘搭西鐵巴士306號，於「福岡塔巴士站」落車。
- 從天神巴士中心前1A乘車處，乘搭西鐵巴士W1、302號，於「福岡塔巴士站」落車。
- 從地鐵機場線西新站落車，徒步約20分鐘；於西新Palace前轉搭西鐵巴士，於「福岡塔巴士站」落車。
- 營業時間：09：30 〜21：00
- 門票：成人800日圓、中小學500日圓、小童（4歲以上）200日圓
- 可用信用卡、QR碼行動支付
Comments