聞名國際嘅「歌舞伎（かぶき / kabuki）」係日本傳統藝術之一，當中演員所穿著嘅舞台服飾顏色鮮豔華麗，面上帶有嘅獨特妝容更加係令人印象深刻。其實「歌舞伎」演員嘅舞台服飾與獨特妝容係帶有各種唔同含義，今次要帶大家探索一下「歌舞伎」當中嘅角色妝容，從而暸解化妝嘅深層意義所在！
妝容會因角色而改變！
「歌舞伎」嘅化妝係「歌舞伎」表演中不可或缺嘅重要元素，「歌舞伎」透過化妝呈現每個角色嘅性格與身份，並透過各種妝容去營造出不同角色。
首先，同大家略略分享一下「歌舞伎」化妝當中嘅顏色小知識：「歌舞伎」演員喺化妝嘅時候，會將面部塗抹上一種顏色，白色代表好人、高貴；顏色接近茶啡色嘅話，就代表村民、壞人；紅色則代表壞人嘅手下與家臣。主角基本上會將成塊面塗抹成全白色，藉此凸顯出主角嘅存在感。
歌舞伎嘅世界大致分為「菊五郎劇團系」與「吉右衛門劇團系」，歌舞伎演員會根據家族所依歸為其中之一；。兩劇團系嘅妝容表現不盡相同，「菊五郎劇團」就算係女角色，亦無需將成塊面塗抹成全白色，反而多數會使用砥粉塗抹，畫出比較寫實嘅妝感；相反「吉右衛門劇團」就唔單止主角要將成塊面塗抹成全白色，就連配角也都要塗成「白面」喔！
歌舞伎化妝經常聽到「隈取」係咩意思？
「隈取（くまどり / kumadori）」係「歌舞伎」獨特嘅化妝法。「歌舞伎」嘅妝容基本上會喺塗抹成白色嘅面部上，再畫上眉毛、眼睛、嘴唇等等，當中，繪畫出強調面部肌肉紋路與血管嘅化妝技巧就稱之為「隈取」，更能表現出人物角色表情，令觀眾更加容易感受到當中嘅角色情感。
「隈（くま / kuma）」一詞嘅意思係「光影嘅界線」，使用「隈取」化妝方法嘅舞台主要係「時代物」嘅演出戲碼。「時代物」係指設定喺距離江戶時代平民生活相當遙遠嘅往日時代，以過去公卿貴族與武家社會為題材嘅故事內容，對現代平民百姓嚟講即係「古裝劇」。
與上述妝容一樣，「隈取」會依角色劃分顏色，紅色代表正義、勇氣、血氣方剛嘅年輕人；藍色代表冷酷、惡，多數用喺壞人、怨靈；啡色則代表鬼、精靈等等。
化妝展現演員個性
「歌舞伎」嘅妝容基本上係由演員自己親手化，因此呈現出嘅妝容往往流露出演員喜好，而童星演員嘅妝容就會請前輩幫手，學識化歌舞伎嘅妝可謂係每個歌舞伎演員嘅必經之路！聽聞有演員化妝速度非常快，只需10分鐘就可以化晒成個妝。
演員嘅上妝之前，要先塗上打底用嘅「鬢付け油（bintsuke abura）」，面部，頸部、露肩嘅部分都要仔細塗均勻，然後將面部塗白，再畫上黑色、紅色、藍色線條，基本上係用掃具、毛刷同埋手指頭去繪畫線條。
想知道更多詳細嘅上妝方式與化妝道具嘅話，記得睇埋跟著落嚟嘅相關文章：歌舞伎嘅化妝技巧與專用化妝道具完整介紹。
Comments