拉麵、蕎麥麵、烏冬、粉絲...日本杯麵種類五花八門，近年更紛紛有當地拉麵店跨界推出自家監修杯麵，將店家口味完整忠實呈現，而且有唔少款式喺香港超市或DONKI都買得到，選擇多到每日食一款都食唔晒！作為無杯麵不歡嘅小編，今次就會同大家分享有關日本即食杯嘅二三事～
日本即食杯麵知多啲
「即食麵」一般用於形容以「瞬間油熱乾燥法」或「熱風乾燥法」製成嘅麵條。日文中杯麵有「即席麵」、「インスタントラーメン」等稱呼，於麵條上淋上熱水，或放落煲內煮熟後即可食用，簡單又方便，係唔少繁忙日本、香港城市人嘅醫肚救星。
日本即食麵歷史
日本即食麵歷史起源自由日清食品創辦人安藤百福於1958年發明嘅世界首創即食麵「チキンラーメン（小雞拉麵）」。將蒸過嘅麵條調味後，經由油熱乾燥過程即大功告成，其製作過程奠定速食麵製造工程技術，可謂係一款顛覆時代嘅革命性產品。
起初小雞拉麵以袋裝麵形式販售，此包其後裝成為快速擴展市場嘅即食麵標準包裝，之後更演變至多家廠商搶佔即食麵市場呢。
其他代表即食麵
除咗日清小雞拉麵之外，三洋食品「札幌一番」系列即食麵亦係另一日本國民級即食麵。
1966年「札幌一番（醬油口味）」問世以來，陸續推出「味噌拉麵」、「鹽味拉麵」等多元化口味，透過不斷新增口味擴展市場佔有率。另一廠商東洋水產亦於1962年推出「HIRAMEN（ハイラーメン）」進軍即食麵市場，不過數到東洋水產最令人熟悉嘅，就必定要數到「MARUCHAN（マルちゃん）」。
有競爭先有進步，眾多廠商進軍即食麵市場，得益嘅自然係一班消費者！現時日本即食麵種類繽紛豐富，百花齊放嘅程度甚至幾乎每日都有新口味登場呢。
點解日本杯麵咁高質？
眾多即食麵當中，「札幌一番」系列、明星食品「明星拉麵」等，將調味粉分開嘅款式速食麵尤其受歡迎，因此令到以湯汁味道融入麵條內嘅日清食品「小雞拉麵」感到大事不妙，因此就喺1968年推出麵餅與調味粉分開嘅新款—亦即係香港人由細食到大嘅「出前一丁」！「出前一丁」內更附加麻油，以此與其他公司商品作出區分。
日清「小雞拉麵」自發售以來幾十年，其他公司亦相繼進軍即食麵市場，讓袋裝即食麵市場逐漸成熟。直至1971年安藤百福再次出招，推出全新類型「杯裝即食麵」。杯裝即食麵一亮相即造成轟動，事先將麵餅與材料放於杯狀包裝裡，只要倒入熱水即可食用，比袋裝即食麵更加輕鬆，更自此成為即食麵市場主要分類！
日本即食麵、速食拉麵種類
雖然杯裝即食麵登場，但「元祖」袋裝即食麵地位依然屹立不倒。現時日本國內販售嘅袋裝即食麵種類繁多、口味相當多元化。除咗醬油、味噌、豬骨等經典口味之外，不時亦會推陳出新，酸辣湯麵、擔擔麵、什錦麵、泰式海鮮酸辣湯等充滿異國風情嘅口味亦儲落唔少支持者。而且種類亦唔再只侷限於拉麵，烏冬、天婦羅蕎麥、炒麵等通通都可以選擇，更重要嘅係，麵條種類亦相當講究，半乾麵、冷藏生麵、熱風乾燥非油炸麵、油炸麵等，百貨應百客。
袋裝麵與杯麵發展歷史
自1958年「小雞拉麵」面世以來，即食麵市場現時有如「戰國時代」，據聞日本每年有多達1,500種新商品問世，無論係知名拉麵店聯名推出嘅合作款，或與北海道利尻島利尻漁業共同組合販賣嘅「利尻昆布拉麵」等日本各地特色麵食，往往都成為遊客每次日本旅行搜購目的之一。
1971年正式登場！日清食品「CUP NOODLE（日清杯麵）
據2019年統計數字顯示，日本速食麵市場銷售大約為4,290億日圓，當中袋裝麵為750億日圓左右，杯麵則大約為3,540億日圓，反映出市場對杯麵需求之盛。
而杯麵嘅元祖，就要追溯至1971年登場嘅日清食品「CUP NOODLE（日清杯麵）」。根據日清食品歷史年表指出，安藤百福喺1966年出訪歐美視察、到訪當地超市推銷小雞拉麵時，見到當地一個買手將安藤百福帶來嘅商品樣版放入紙杯中、倒入熱水試食，因而啟發研發杯麵靈感得來！
「CUP NOODLE（日清杯麵）」普及原因
日清食品「CUP NOODLE（日清杯麵）」於市場行銷方面採取大膽行銷手法，例如產品面世當初就選擇喺剛推行無耐嘅銀座行人徒步區推廣販售，以飲食習慣尚未根深柢固嘅年輕人對象；另一方面，集團亦針對消防署、警察局等必須執行夜班嘅行業，採取穩紮穩打推銷手法，因此成功吸引社會關注目光。
睇完以上介紹，相信大家對日本杯麵又或由細食到大嘅「CUP NOODLE（日清杯麵）」都有更深認識。講起又覺肚餓，睇到呢到係咪又想淥返杯杯麵食先?
Comments