「黑川溫泉」係一處係於熊本縣內嘅人氣溫泉。狹隘山澗內多間溫泉旅館林立，濃厚溫泉秘境風情洋溢，係唔少溫泉愛好者bookmark list內一生必去嘅著名朝聖地！以下，編輯部就要為大家徹查介紹有關黑川溫泉嘅一大重點—溫泉Pass「入湯手形」，以及歷史背景、交通方法、必睇重點以及美食手信等實用資訊～
因為「入湯手形」而爆紅日本全國！黑川溫泉概要&歷史
黑川溫泉位於熊本縣阿蘇郡南小國町，四周環抱茂綠巒山、充滿日式溫泉風情。雖然地理位置距離最近嘅高速公路有一段距離，交通絕對唔算方便，不過正因為如此，「秘湯（秘境溫泉）」氛圍得以俘虜國內外大批溫泉愛好者，成為人氣朝聖地之一！狹隘山澗內溫泉旅館林立，每間佔地唔算廣闊，不過就勝在以心思搭夠。要前往部分旅館內嘅露天風呂，甚至要先過橋、爬上爬落樓梯，有如潛入迷宮般，一路上叫人難掩雀躍興奮心情！
黑川溫泉於江戶時代中期，已作為「湯治場（溫泉療養所）」而喺周邊地區稍有名氣，直至當時嚟講既嶄新又獨特嘅「入湯手形」面世，知名度就一雖傳遍日本全國！遊客只需要購買「入湯手形」，就可以任意使用黑川溫泉內任意3間旅館嘅露天風呂，現時「巡遊黑川溫泉露天風呂」已成為聲名大噪嘅黑川溫泉觀光指定動作。
出發前必知！黑川溫泉小貼士之一：「入湯手形」唔買就走寶！仲有大批優惠等著您拎？
一個「入湯手形」在手，遊客即可從黑川溫泉區內28間旅館當中，任意選擇3間露天風呂浸溫泉！手形售價為1,300日圓，於各旅館、旅館協會或遊客中心購買入手後，手持手形到心水旅館接待處交由員工為您蓋章，即可動身前往露天風呂！手形本身設計都夠晒kawaii，用完之後記得要拎走留為紀念啊！再者，到部分旅館或店舖出示入湯手形的話，更可享受各種優惠。如此著數嘅入湯手形，鍾意浸溫泉嘅您又點可以錯過！
出發前必知！黑川溫泉小貼士之二：各家旅館泉質大不同！識揀，梗係跟個人膚質嚟揀！
黑川溫泉另一大特色，就係泉質因旅館而異。如果您係屬於敏感性肌膚，咁「旅館 奧之湯（旅館 奥の湯）」或「御宿 Noshi之湯（お宿 のしの湯）」內刺激性較低嘅「單純弱酸性」就適合您；想要舒緩皮膚病症狀或燒傷情況的話，「黑川莊」或「山彥旅館（やまびこ旅館）」內有助軟化皮膚表面嘅「碳酸氫鹽」就係必浸首選。溫泉各具功效及特徵，識浸一定係根據自己肌膚狀態去選擇目標旅館啊～
出發前必知！黑川溫泉小貼士之三：浸完溫泉後再爆買掃街小食
千里迢迢嚟到黑川溫泉，又點只浸溫泉咁簡單！換上浴衣、著上下駄（木屐），到溫泉街散步亦係必做行程。溫泉街內有多款適合掃街嘅名物小食，例如「湯音」內就有售賣以黑川溫泉南小國町名物「小國Jersey牛奶」製成嘅雪糕、Jersey牛奶花林糖（かりんとう / Karintou），以及同場即叫即炸馬肉肉餅、馬肉可樂餅等炸物小食；另一方面，「白玉っこ甘味茶屋」內則有以100%阿蘇產糯米白玉入饌嘅白玉芭菲，甜品一樣不缺選擇！先浸個靚溫泉，再漫步溫泉街掃盡當地美食，寫意熊本溫泉之旅就係咁簡單～
景點資訊
- 名稱：湯音
- 地址：〒869-2402 熊本縣阿蘇郡南小國町大字滿願寺6602
- 交通：「黑川溫泉」巴士站徒歩約6分鐘
- 定休日： 無休
- 營業時間：9:00～13:00、14:00~18:00
景點資訊
- 名稱：黑川溫泉
- 地址：〒869-2401 熊本縣南小國町
- 交通：從熊本站乘搭JR豐肥本線約40分鐘，於肥後大津站落車後，轉乘「山彥號」約55分鐘前往阿蘇站。其後乘搭路線巴士「產交巴士 杖立線」約55分鐘，於「南小國町役場前」落車，最後揸車（的士或旅館接送服務）約10分鐘。
Comments