沖繩縣那霸市嘅主要街道「國際通」係沖繩旅遊必去景點之一，可以稱得上係那霸裡面最熱鬧嘅一條街道，又有「奇跡一英里」之稱。「國際通」全長1.6公里，餐廳、藥妝店、手信舖林立，行入小路細巷仲可以搵到唔少特色小店、海鮮市場及居酒屋。交通方便之餘，而且仲超好買，簡直就係Shopping聖地！今次FUN! JAPAN編輯部要同大家分享，去那霸國際通之前，一定要知道嘅旅遊情報～
長約1.6公里「國際通商店街」
「國際通商店街」係一條長約1.6公里，由那霸市綜合商業設施「Palette kumoji」前嘅十字路口起延伸至安里三叉路嘅商店街。1933年時作為連接舊那霸市中心部與首里市縣道嘅最短距離一部分修建而成，戰後「恩尼·派爾國際劇場」戲院於街上附近落成，漸漸大家就開始稱呢條路為「國際通」。戰爭結束後，「國際通」喺沖繩縣縣內最快成功重建並恢復昔日繁榮，亦因爲咁，全長近一英哩（約1.6公里）嘅國際通，又被稱為「奇蹟一英哩」。
如果搭沖繩都市單軌電車，最接近國際通嘅4個車站分別係「安里」、「牧志」、「縣廳前」、「美榮橋」。沿途除咗有唔少百貨公司、餐廳、酒店，仲有好多雜貨、手信等店舖，數落大概有成600間，可以話係應有盡有。只要去到「國際通商店街」，一定可以買得盡興行得開心。國際通從頭行到尾大約30~40分鐘左右，但係一場嚟到，梗係邊行邊入舖頭行個圈、再休息一下，喺呢度悠閒漫步嘅話，大約可以行成2～3小時！
必知情報①國際通屋台村大啖嘆沖繩美食！
想要品嚐沖繩料理，就一定要去國際通屋台村。除咗有提供沖繩料理、琉球泡盛嘅店舖之外，仲有沖繩麵、琉球關東煮、琉球蝦夷前壽司等等沖繩當地特有美食，食店大概有成20間，種類相當豐富！亦有部分店家供應午餐，無論係日頭定係夜晚都可以品嚐得到沖繩美食。
景點資訊
- 名稱：國際通屋台村
- 地址： 〒900-0013 沖繩縣那霸市牧志3丁目11-16、17
- 交通方式：沖繩都市單軌電車「牧志」站步行約4分鐘
- 營業時間：依店家而異
- 公休：依店家而異
必知情報②沖繩最大規模祭典與活動不容錯過！
國際通一年從頭到尾都有大大小小、各式各樣嘅活動，當中最熱鬧就係「萬人哎薩舞（一万人のエイサー踊り隊）」，哎薩舞（エイサー）係沖繩喺舊曆盂蘭盆節祭祀祖先時獻上嘅舞蹈，「萬人哎薩舞」可以話係沖繩縣內最大規模祭典，於每年8月第一週嘅星期日登場，除咗可以欣賞到自古傳承之下傳統哎薩舞之外，仲有獨特、充滿創意嘅哎薩舞！
另外，喺10月亦有「扯大纜」大型活動「那霸大綱挽祭」，歷史相當悠久，係傳承自琉球王國時代那霸四町「扯大纜」傳統。祭典上「扯大纜」時所使用嘅拔河繩長度甚至更獲列入健力氏世界紀錄，東西兩邊用力對戰場面非常熱鬧，如果有機會嘅話一定要親眼去見證呢場激烈嘅鬥力戰！
必知情報③穿梭於小路細巷中~來場在地散步
去到國際通，記得唔好淨係顧著行主要大街，非常推薦大家走入小路細巷裡面探險一番。漫步喺狹窄小路內，話唔定會發現唔少沖繩獨有嘅特色雜貨店，仲有古民家改建嘅Café，如果身處旅遊地區，又想體驗沖繩在地生活，一定要行入小路探險，話唔定會有意外收穫呢。
FUN!編溫馨貼士提提您：國際通每逢星期日12～18點禁止普通車輛通行~
必知情報④地道食材多多！沖繩美食集中地「第一牧志公設市場」
鄰近國際通第一牧志公設市場，係沖繩公營嘅市場，販售沖繩當地特有魚類、貝殻類、肉類以及蔬菜等，可以稱得上係沖繩人嘅「秘密廚房」。特別係魚類、水果、豬肉等食材與日本本島唔一樣，販賣嘅部位或種類非常多元豐富。例如：豬腳、豬頭皮等等比較特殊嘅部位，喺呢度都可以買得到！位於2樓餐廳、可以幫客人烹煮喺市場所購買嘅食材，即煮即食！另外，第一牧志公設市場係室內市場，就算落雨都唔使擔心。如果想要去第一牧志公設市場，沿著國際通行會見到Donki激安殿堂（驚安之殿堂），而Donki隔離有寫著「市場通」嘅路標，轉入去之後好快就會見到「第一牧志公設市場」。
景點資訊
- 名稱：第一牧志公設市場
- 地址：根據2021年3月資料顯示，目前為咗準備遷移，多間店舖現正位於臨時市場營業（〒900-0014 沖繩縣那霸市松尾2-7-10）。預計於2022年結束臨時營業場所
- 交通方式：沖繩都市單軌電車「牧志」站徒步約9分鐘
- 營業時間：08：00～21：00
- 公休日：每月第四週週日（除了12月之外）、新年、舊曆新年以及舊曆盂蘭盆節※各店家而異
景點資訊
- 名稱：那霸市國際通商店街
- 地址：〒900-0013 沖繩縣那霸市牧志
Comments