位於熊本縣荒尾市嘅「三井格林主題樂園」，係九州最大規模嘅娛樂休閒設施之一。主題樂園最大特色，係遊樂設施非常多兼且玩法多樣化，除咗樂園之外，仲有酒店、購物景點等等，玩足成日都唔夠喉。今次FUN! JAPAN編輯部，就會為大家介紹呢座樂園嘅必玩特色！
特色之1：遊樂設施數目超過80種，規模屬日本國內第一！
「三井格林主題樂園」以「一切遊樂都集中晒喺呢度！」作主題，保證想玩嘅遊樂設施都應有盡有，除招牌遊樂設施之一嘅彩虹摩天輪以外，其他遊樂設施多達約80種，數目堪稱日本第一。令人心跳加速嘅尖叫刺激類型嘅遊樂設施非常豐富，當中有連外國遊客都好鍾意嘅「NIO過山車」。乘搭垂吊式過山車期間，乘客雙腳將無法著地，漂浮感並唔係三言兩語就可以形容得到！全長約700米（約2分鐘左右）嘅過程中，刺激感十足令人心跳加速，忍唔住大聲尖叫，行駛途中仲會大轉圈兩次，再加上螺旋式旋轉3次，係相當刺激嘅機動遊戲。
另外，「巨大立體迷宮KARAKURI城」係無論大人定係小朋友都可以玩得開心盡興嘅遊樂設施。巨大迷宮樓高3層，機關重重嘅房間與門搞到人氹氹轉，搵極都搵唔到出口，極具挑戰性。玩一次成功闖關，平均大概需時約20分鐘。
特色之2：餐廳、商店豐富完善！
樂園裡面大概有20間餐廳，從烏冬、蕎麥麵、咖哩等等日式口味，到地道意大利粉、西班牙海鮮飯等擁有豐富菜式嘅「吉拉達餐廳」、使用台灣珍珠製作嘅珍珠飲品店「HoneyBunny」亦相當受歡迎，另外仲有薯條、炸雞串等小食菜式多多嘅「SPICY」等等，餐廳種類豐富，美食種類多元化，完全唔使擔心會搵唔到地方醫肚！
喜歡卡通人身角色嘅您，就一定要記得去埋專賣熊本熊周邊商品嘅「熊本熊周邊商店」、集結熊本嘅「HelloKitty當地限定吊飾」嘅「療癒之森」等等朝聖，商店種類非常多姿多采。
特色之3：從遊樂園徒步只需3分鐘！官方酒店方便又抵住
從官方酒店「威爾帝酒店(Hotel Verde)」行去樂園東門入口只需要短短3分鐘步程，非常方便。訂房旅客仲可以獲得格林樂園入園兩日免費券嘅特別優惠，兼享用優惠價購買暢遊票，一票玩到底，幣明嘅您知道點做啦？酒台內仲有設置天然溫泉大浴池，玩完樂園之後即可好好咁放鬆一下，舒舒服服咁嘆返晚，啱晒一家大細嘅親子之旅，非常推薦啊！
另外，直通樂園嘅純白西洋風低樓層溫泉酒店「布蘭卡酒店（HOTEL Blanca）」氣氛亦係自在悠閒，同樣值得推薦。
景點資訊
- 名稱：三井格林主題樂園
- 地址：熊本縣荒尾市綠之丘
- 交通：
- 從博多站搭九州新幹線至新大牟田站，車程約34分鐘，轉搭的士（車資約3000日圓左右）
- 從JR鹿兒島本線大牟田站轉乘西鐵巴士約20分鐘（410日圓），於格林主題樂園站落車
- 門票：
- 入園費用：成人1700日圓、孩童（3歲～高中）以及長者（65歲以上）900日圓
- 一票玩到底暢遊票（入園費用另計）：成人3900日圓、小童（中小學生）3700日圓、幼童（3歲以下）以及長者2700日圓
- 營業時間： 09：30～17：00 （※依狀況可能調整營業時間。請上官網確認）
- 定休日：全年無休（※依狀況可能調整營業時間。請上官網確認）
Comments