九十九島係指，位於長崎縣佐世保到西北部平戶約25公里嘅廣寬海面上嘅無數形狀各異、大細不同嘅島嶼群。九十九島觀光方式層出不窮，您可以喺觀景台睇靚景、或者搭船享受巡航之旅，仲可以大啖嘆當地出名嘅蠔！今次，FUN! JAPAN編輯部將會為大家介紹九十九島嘅精選玩法，就算係第一次去玩嘅人都可以盡情享受九十九島嘅樂趣！
關於佐世保 九十九島
長崎縣九十九島由地勢複雜嘅沈降海岸，配搭不同大細嘅島嶼群，交織出一幅如詩如畫嘅美麗景緻，幾乎整個區域都被指定為「西海國立公園」。此外，島嶼密度亦堪稱日本第一，雖然名為「九十九」，但實際上島嶼嘅數目居然有成208個咁多！「九十九」其實係意指「多到數之不盡」，因而命名為九十九島。
佐世保 九十九島 玩法之一：從觀景台眺望無數島嶼醉人景色！
佐世保市內有諸多景點能夠眺望得到九十九島，當中最為人知嘅就係「展海峰」。置身於觀景台上，180度全景遼闊景色映入眼簾，因此此處亦係相當知名嘅拍拖勝地！而位於觀景台下方嘅園地，春天開放油菜花（3月下旬～4月上旬），秋天再交由大波斯菊（又名秋櫻）10月中旬～10月下旬盛開美景接棒，一年四季遊覽都不愁無節目～
其他景點仲包括「弓張岳展望台」，遊客能夠將佐世保港全景與九十九島自然美景盡收眼簾，夕陽西下時所構成嘅美景自然不在話下，夜景更加係靚到難以用文字形容！另外，「石岳展望台」亦係不可錯過嘅觀景台之一。此處曾經係電影《最後武士》取景地，因此成為熱門話題，大大個佐世保港一覽無遺！
景點資訊
- 名稱：展海峰
- 地址： 〒857-1232 長崎縣佐世保市下船越町399
- 交通方式：從佐世保車站前搭乘往「展海峰」方向嘅路線巴士，車程約40分鐘
- 門票：免費
- 公休日：全年無休
佐世保 九十九島 玩法二：搭遊覽船享受一趟巡航之旅！
除咗喺島上眺望美麗嘅景色之外，其實搭船去觀賞島嶼美景亦非常吸引。擁有純白典雅豪華船身、以海上女王為形象設計嘅「九十九島遊覽船 珍珠皇后號」，又或以海盜帽為外觀設計嘅「九十九島海盜遊覽船未來號」等等，有唔少淨係外觀已經拎滿分嘅豪華遊覽船任司選擇。有機會嘅話，可以試吓搭遊覽船，乘著海風，出發一趟九十九島巡航之旅喔。
景點資訊
- 名稱：九十九島遊覽船（九十九島珍珠海洋遊覽區內）
- 地址：〒858-0922 長崎縣佐世保市鹿子前町1008
- 交通方式：從JR佐世保站搭乘往「珍珠海洋遊覽區、九十九島水族館」方向嘅巴士（班距約30~40分鐘），車程約25分鐘
- 費用：九十九島遊覽船 珍珠皇后號 1,500日圓、九十九島海盜遊覽船未來號 1,500日圓 ※無論邊一艘船都會有一般船班和日落觀光遊。
- 公休日：全年無休
※出航時間等詳細資訊請參考官方網站 https://99cruising.jp/zh_TW
佐世保 九十九島 玩法三：冬天味覺享受，品嚐九十九島蠔滋味！
冬天去到九十九島玩，必食美食當然就係「九十九島蠔」！九十九島出產嘅蠔養分豐富，吸收鄰近沈降海岸線群山、順流而下嘅大地精華後，隻隻都肉質鮮美，爽口彈牙鮮美！雖然望落稍為細隻，但食落清爽就無多餘味道。每逢10月至3月盛產季節，海邊沿岸嘅「牡蠣小屋」總係大排長龍，而喺11月與2月嘅星期六日與公眾假期，九十九島珍珠海洋遊覽區仲會舉辦碳燒蠔活動「九十九島牡蠣美食節」，期間會有多個燒蠔攤位林立，呢個時期到訪就可以盡情品嚐蠔滋味，絕對係蠔迷們必食，千祈唔好錯過喇。
活動資訊
- 名稱：九十九島牡蠣美食節
- 舉辦地點：九十九島珍珠海洋遊覽區大草坪（長崎縣佐世保市鹿子前町1008番地）
- 交通方式：乘搭佐世保車站站前開出嘅快速巴士（佐世保站前⇔九十九島珍珠海洋遊覽區）
- 舉辦期間
- 秋季：11月星期六日及公眾假期
- 冬季：2月星期六日及公眾假期
Comments