美不勝收嘅沖繩蔚藍大海，淨係用肉眼欣賞又點會夠過癮，梗係要順便跳入大海，去玩埋浮潛、潛水等水上活動先至玩得盡興！今次小編精選出沖繩5大必去潛水景點同大家分享，有機會記得去朝聖一番，親身去探索沖繩美麗海洋嘅奧秘喔。
1. 青之洞窟
沖繩著名嘅潛水景點青之洞窟位於恩納村，係一個由珊瑚地形自然生成嘅海底洞窟。推薦早上清晨至中午前前往，事關當旭日升起時，太陽光折射下水面會呈現出閃耀青藍色，喺呢個時候潛水嘅話就可以同魚群等海洋生物一齊感受青藍色夢幻景色。即使係初心者都無需擔心，當地亦有提供無需潛水牌嘅潛水體驗；您亦可以選擇搭船或從「青之洞窟」所在嘅真榮田岬近距離接觸沖繩大海，相當過癮。
景點資訊
- 景點名：青之洞窟
- 地址：沖繩縣國頭郡恩納村真榮田469-1
- 交通方式：從那霸市市區揸車約1小時／從那霸巴士總站搭巴士約1小時30分鐘
2. 沖繩本島北部海灘
沖繩最北邊嘅國頭村有多個非常適合浮潛嘅地方，唔單止擁有透明度極高、清澈無比嘅海水，仲有天然珊瑚以及多種色彩鮮豔嘅熱帶魚，令人目不暇給。
請留意，喺淺灘附近玩嘅時候有機會被離岸流捲走、有一定危險性，記得要著好救生衣確保自身安全。而且阿丹海灘係無救生員駐守，要落海玩嘅話記得要做足安全措施「打醒12分精神」喔！
景點資訊
- 景點名：阿丹海灘
- 地址：沖繩縣國頭郡國頭村楚洲48
- 交通方式：從那霸市中心揸車約2小時30分鐘
3. 慶良間群島
慶良間群島擁有好似玻璃一樣透明清澈嘅蔚藍海水，不單海水有「慶良間藍」之稱，群島更係被世界各地潛水人士譽為「東洋第一」潛水景點。遊客從那霸出發可以即日來回慶良間群島，最適合參加當地一日遊行程，尤其係夏天嘅潛水船幾乎係坐無虛席，記得出發前一定要事先預約喔。
景點資訊
- 景點名：慶良間群島
- 地址：沖繩縣島尻郡座間味村
4. 珊瑚花園
珊瑚花園係一處位於宜野灣海濱公園，宜野灣熱帶海灘一帶嘅潛水景點，從港灣碼頭行去體驗潛水嘅地方僅係短短10分鐘步程。
石珊瑚、軟珊瑚等珊瑚種類相當豐富，簡直就好似海底嘅珊瑚花園一樣，色彩繽紛相當吸睛。成群結隊嘅珊瑚魚於淺灘上廣闊嘅珊瑚礁裡游來游去所交織出嘅繽紛鮮豔景色，絕對係到訪宜野灣時必睇！
景點資訊
- 景點名：宜野灣海濱公園
- 地址：沖繩縣宜野灣市真志喜4-2-1
- 交通方式：從那霸市中心揸車約20分鐘
5. 黃昏SUP巡遊
除咗潛水，小編仲推薦大家可以去埋體驗人氣水上活動SUP立槳衝浪（Stand Up Paddle）！
最好揀喺日落時分前往，事關可以一邊欣賞金黃色嘅餘暉灑落於海面上嘅落日美景，一邊體驗立槳SUP嘅樂趣，為全日嘅旅程劃上完美句號。由於SUP板浮力大，就算係新手初學人士都可以輕鬆體驗。下次不妨試試企喺SUP板上，喺海上眺望迷人嘅落日，別有一番風味。
景點資訊
- 地點：沖繩縣國頭郡恩納村恩納地區
- 交通方式：從那霸市市中心揸車約40分鐘／從那霸巴士總站搭巴士約1小時20分鐘
Comments