※本篇文章為刊登於2017年1月之版本※
長野簡介
長野市為座落於四通八達嘅日本中部地區嘅長野縣縣中心。起初因境內坐擁眾多信徒嘅善光寺（Zenko-ji）而聞名，近代則因為被選作1998年冬季奧運嘅主辦地而更加聲名大噪。市內有多個地方都為舉辦冬奧而獲重新改建，此外亦有競速滑冰體育館M-Wave及游泳場館Aqua-Wing等多座為冬奧而設置嘅建築物與運動設施仍被沿用至今。正因為如此，如果您係一名運動愛好者，呢到一定會係您要嚟朝聖嘅日本運動勝地，順便仲可以浸浸溫泉、享受山景及更多風景區或觀光景點𠻹！
來去長野：
由鄰近嘅東京出發的話，您可以乘搭火車或巴士就輕鬆到達長野。
其中一個最快嘅交通方式，就係您可以從東京乘搭子彈火車，亦即係所謂嘅「新幹線」到長野。舊稱為長野新幹線嘅北陸新幹線單程票價為7,970日圓，來回車程大約為2-3小時。
另外，從名古屋駛至長野嘅信濃鐵道亦可以為您提供另外一種欣賞沿路風景嘅交通選擇。車程約3小時，票價則為7,130日圓。
如果時間容許的話，您甚至可以乘搭從新宿或池袋出發嘅巴士。從東京到長野嘅車程時間大約係3.5小時，單程車票大概為4,000日圓，您亦可以花7,200日圓購買來回車票。
當然您亦從大阪或京都出發、乘搭開往長野嘅巴士。日頭車程時間大約為7小時左右，夜行巴士乘車時間則大概為9小時。票價可以分為單程5,300日圓或來回票價10,000日圓。
觀光景點：
善光寺（Zenko-ji）:
大概係呢個城市內最著名嘅景點之一－從7世紀以來就已存在嘅善光寺。善光寺因為供奉著非公開嘅佛陀，亦即係所謂嘅秘佛（hibutsu）而聲名遠播。秘佛每六年先會因開帳儀式而對外公開，因此如果適逢開帳儀式年度，全日本大批佛教徒都會一窩蜂到此朝聖。
小秘訣：
寺廟附近有多間手工藝品店任您選購幸運符或護身符，作為造訪長野善光寺嘅紀念品！
加賀井温泉一陽館（Kagai Onsen Ichiyoukan）:
如果您想要體驗有別於一般風味嘅傳統澡堂或湯屋，咁就一定要到長野加賀井温泉一陽館行一趟。一陽館以茶色溫泉而聞名，一大特徵為獨特細窄長方形狀嘅浴池。如果您有勇氣的話，仲可以嘗試戶外傳統男女混浴浴池，入場費用為300日圓。
西之門（Nishi-no-Mon）:
座落於善光寺附近嘅西之門係以生產日本酒為主嘅釀酒廠。全國最著名嘅日本酒至今仍然係由呢間傳統工廠蒸餾製作，其酒齡就同酒品本身被蒸餾嘅時間一樣長！您可以喺呢到參觀日本酒釀造過程以及欣賞眾多唔同時期嘅釀酒廠歷史照片，另外仲有直屬釀酒展示館歡迎遊客免費進場參觀。
長野縣信濃美術館（Nagano Prefectural Shinano Art Museum）:
如果您鍾意藝術，咁您就一定要前往長野最優質嘅美術館。館內唔單只收藏咗大批日本傳統藝術大作，仲設有著名嘅東山魁夷館，可以畀您一覽多幅令人歎為觀止嘅風景日本畫（nihon-ga，膠彩畫或東洋畫）或傳統筆觸嘅風格作品。
M-Wave競賽場館：
M波浪（M-Wave）係1998年被興建當作冬季奧運嘅競速溜冰競賽場館，現時則被改建為長野奧林匹克博物館用作來推廣運動之用。如果您有興致喺冰上大顯身手的話，場內亦有溜冰場可以畀您滑個痛快！
免稅輕鬆購：
八幡屋礒五郎（Yawataya Isogoro）:
長野縣一大著名購物勝地，實為一間店齡高達280歲嘅老字號。全店只賣一種商品－「七味粉（shichimi）」，顧名思義，即係一種有七種味道嘅綜合調味料，主要係由辣椒粉混合其他香辛料調製而成。日本人通常都會將之用作蕎麥麵調味料。
最佳到訪時節：
冬季
如果您對於曾經係冬季奧運舉辦地嘅地方有所期待的話，長野絕對係您冬季旅遊嘅好去處。冬天時您唔單只可以目睹風景如畫嘅降雪美景，仲可以參與各式冬季運動，又或參觀遍佈城市各處嘅暖入心溫泉、溜冰場以及其他賞雪名勝。如果您仲想要再深入探索長野地區，您亦大可前往捕捉冬季難得一見景象－泡浸於溫暖溫泉內取暖嘅馬騮！
Comments