「職場生涯」係每個人都會經歷與煩惱嘅一項課題。有人投身社會幾年後，會突然感到方向模糊：「雖然有幾年工作經歷，但到底乜嘢先係自己嘅理想工作？」，難免會失去人生方向。呢個時候，選擇出國叉電休息一下，或者就能夠幫您搵到自己未曾諗過嘅方向！今次要同大家分享嘅故事，係FUN! JAPAN編輯部嘅台灣編輯AKANE，到底呢位主人翁又係點樣喺日本搵到屬於自己嘅人生職涯呢？
日本電影就係日本真實社會縮影
「回想仲係身在台灣嘅日子，我就已經係聽日本音樂、睇日本卡通長大，同大多數人一樣從小受到各種日本流行文化薰陶。好多朋友都覺得我好有毅力，無特別鍾意邊個偶像團體，亦無特別喜愛日本娛樂，卻可以一直住喺日本（笑）。我讀大學嘅時候係主修政治、選修日文，同時亦善用學校資源，接觸到唔少各式題材嘅日本電影，當中特別鍾意描寫人與人之間關係、社會問題、底層市民等議題嘅作品，因此就對呢個國家產生憧憬與想像，從中了解到日本社會嘅真實情況。」
大學畢業後嘅迷惘人生
「大學畢業後，我首先係去咗寫字樓做秘書，後來發現自己原來唔鍾意一成不變嘅工作內容，於是就轉換跑道投身政治公關公司，主要負責兩岸交流工作，安排客人到訪台灣嘅所有事情，包含落地所有交通、食宿、觀光以至正式參訪嘅聯絡溝通等。有時候仲會邀請政治人物演講、舉辦座談會，因此累積咗唔少策畫執行活動嘅豐富經驗與溝通上嘅柔軟度、應變能力。進入第三年後，由於想要追求突破，因此就開始思考出國。」
打工度假落榜 申請留學生專修課程渡日
「2011年東日本大地震嘅時候，台灣媒體不斷報導日本情況，我見到當時日本人即使係發生咁大災難時都依然非常有秩序、臨危不亂，於是就對呢個民族有咗更多正面想法。對日本社會有一定了解，自己識日文、地理位置離台灣又近，於是就覺得出國的話，日本會係非常適合嘅選擇！
加上我過去曾經喺政治相關領域工作過，對於政治局勢轉變特別敏感。當時預感未來幾年台灣與日本嘅交流將會加速、加深，更加堅定去日本嘅決心。起初打工度假係我嘅首選，點知未能成功申請，於是就轉換方向準備留學。」
「留學之前，我曾經去過一次東京旅行。東京變化步伐急速，所有新事物都從東京開始，明明國際化程度相當高，卻又可以與傳統並存。唔單只咁，東京內更聚集咗各式各樣嘅人種，除咗強勢日本主流文化之外，亦隨處可見與異國文化融合嘅痕跡，因此我就毫不猶豫地選擇東京，並唯一申請慶應義塾大學別科（留學生專修課程）。」
慶應別科留學生活一切都非常新鮮！
「喺收到合格通知書之前，我從來無想像過自己會有一日出國留學，因此初來報到嘅心情，一切都非常新鮮。單人房宿舍樣樣俱全，有小露台、廚櫃組合，一樓仲有澡堂。宿舍包早餐、晚餐，每日必定準時到食堂報到。甚至係朝早同日本上班族一齊逼滿員電車返學，都係一種體驗！當然，學校最重要嘅活動『慶早戰』（慶應義塾大學與早稻田大學之間嘅體育運動比賽）與『學園祭』亦唔會缺席啦。
認真讀書之外，我亦非常享受喺日本嘅一切。學校所在位置附近著名景點非常多，所以我落堂後會經常行路去東京鐵塔、芝公園、麻布十番或六本木。當然亦跑勻都內賞櫻、賞楓、花火大會等各大季節性活動！」
於日本遇上理想工作
「我鍾意寫作以及周圍發掘新事物。留學生時期曾經喺介紹日本情報嘅網路旅遊媒體打工，當時就已經覺得工作非常有趣，可以擔當台灣與日本之間嘅橋樑，同時又能將工作與興趣結合，前往各地採訪時接觸到日本人時，我都會盡責地扮演傳遞台灣文化嘅角色。」
「透過打工，我更加堅定自己未來想從事日本旅遊相關媒體相關工作嘅決心，因此結束學生身份後就轉為簽約員工，繼續於網路旅遊媒體界深耕。工作內容需要我每個月撰寫及企劃多篇文章，工作時間雖然可以自由安排，不過相對地亦會花大量時間於文章構思上，甚至有一年嘅除夕夜，我仲趕稿到最後一刻呢！但亦因為公司對於文章品質要求好高，促使我喺文筆與題材選擇方面都有極大進步。」
持續追求成長 FUN! JAPAN令我搵到更多可能性
「我了解到自己唔適合一成不變，會時常思考自己喜惡以及不足嘅地方，因此想嘗試寫稿以外嘅工作，就成為我選擇進入FUN! JAPAN嘅原因。面試時我準備咗一本作品集，最後仲同面試官講：『想要同公司一齊成長！』呢。直至而家，呢句說話嘅初衷依然無變。」
「進入FUN! JAPAN後，除咗寫稿採訪，我亦曾經帶過讀者參加日本各地活動、擔任傳譯，最近仲開始嘗試LIVE直播、拍片、主持網上料理教室等，以上種種對我嚟講都係全新嘗試。而FUN! JAPAN編輯部嘅同事國籍非常多元化，了解彼此異同亦係工作一大收穫。」
對想嚟日本工作嘅人有咩建議？
「首先，請打破對日本美好嘅想像，以及做好心理準備，因為您可能會遇到好多同想像唔一樣嘅事情。去日本旅行，同實際喺日本生活、工作係完全兩回事。好多人抱著日本夢，嚟到之後卻夢碎或者抱怨連連，就係因為無法弭平理想與現實嘅差距。無論係邊個國家，都有結構上嘅問題存在，無關好壞，差別只在於您能否接受，無法接受最後選擇回國嘅亦大有人在。
另外，就係唔好被框架束縛住。我嘅人生到目前為止兜咗唔少冤枉遠路，每個人都有自己嘅人生時間表，千祈唔好因為覺得自己年紀已經唔適合留學或出國就放棄，亦無需要規定自己幾歲就一定要做啲乜嘢，因為唔去做的話永遠都唔會知道自己鍾唔鍾意，或適唔適合。
我都係嚟到日本之後，先搵到自己嘅目標。與其盲目追求或設下不必要嘅限制，應該諗諗自己真正想要啲乜嘢，並親身感受外在變化、隨之調整，先係最重要嘅！」
Comments