所謂嘅「日本犬」，係指祖先嚟自日本嘅犬隻種類，就算對日本唔算太熟悉嘅人，應該都會有聽聞過柴犬與秋田犬啩？以上兩種都係源自日本嘅品種，除咗呢兩種一定要介紹之外，您又知唔知仲有邊幾種狗狗係源自日本呢？北海道犬、土佐犬、日本狆…，今次FUN! JAPAN編輯部就會為大家介紹源自日本嘅5種不同品種狗狗！
秋田犬
曾經去過澀谷嘅話，就一定有見過忠犬八公嘅銅像，而主角忠犬八公正正就係秋田犬！忠犬八公嘅故事傳遍全世界，甚至被改編成荷里活電影《秋田犬八千》。俄羅斯溜冰女選手札吉托娃（Alina Zagitova）贏得2018年平昌冬奧金牌後，日本秋田縣更特別送上一隻可愛嘅小秋田犬，恭喜札吉托娃（Alina Zagitova）贏得冬奧金牌，令秋田犬呢種毛茸茸嘅日本特有犬隻品種，再度成為關注焦點。秋田犬除咗喺日本，喺美國、台灣，香港等地都相當受歡迎呢。
秋田犬歷史
1630年代，日本東北地區將秋田犬當成獵犬飼養。秋田犬原本屬於中型犬，但當時為咗振奮士兵士氣而被當做鬥犬，最終進化成更大型嘅犬隻品種。
秋田犬特徵
秋田犬擁有一副強壯體格，係日本最大型嘅犬隻品種之一，不論係外表、步伐或動作都非常渾然有力。喺《秋田犬八千》電影當中，就可以睇得出秋田犬對主人忠心耿耿。秋田犬個性冷靜沈穩，係一種非常好養嘅犬隻品種。重點係要每日幫佢哋梳毛，多多鍛鍊體能，就算係短時間都唔緊要～
秋田犬毛色
秋田犬毛色有四種，分別係赤色、虎紋、白色以及胡麻色。
柴犬
近年「柴犬風潮」幾乎無停過，得意可愛嘅外型加上獨特個性，成日會做出一啲令人估佢唔到嘅驚人舉動，總係令主人們又愛又恨，真係「有養過先會明」！唔單只萌爆亞洲地區，喺外國社交媒體上都成日見看到「Shiba Inu」嘅字眼出現。前文提到《秋田犬八千》電影當中，主角雖然係一隻秋田犬，但其實拍攝細細個嘅「八千」時，係用柴犬去拍攝。而呢隻可隻柴犬，就成功喺海外觀眾心裡面留低深刻印象，令柴犬亦成為人氣之選。另外，柴犬喺2012年嘅英國狗展裡面亦曾獲得第一名，因此令大家對柴犬嘅了解變得更加多喔。
柴犬歷史
柴犬喺1936年被認定為日本天然紀念物，最初被發現喺日本本州四國山區，屬於小型犬。
柴犬特徵
柴犬擁有穩健身軀，但動作非常輕盈又可愛。原本生活喺深山野外地區，表示柴犬個性相當有耐心，而且無所愄懼，對於四周環境擁有一定程度嘅警戒心，係幫手睇門口嘅好幫手。雖然望落同秋田犬好似樣，但身型比較矮。另外，各位主人亦要記得每日幫佢哋梳毛，多多鍛鍊身體喔。
柴犬毛色
柴犬毛色分五種，分別係赤色、黑褐、胡麻、黑胡麻、赤胡麻。
北海道犬
日本電訊公司Softbank廣告當中飾演爸爸角色「お父さん」嘅，就係北海道犬！
北海道犬歷史
北海道犬係北海道地區原住民嘅獵犬，但受廣告影響，目前北海道犬一般皆被視為家犬。
北海道犬特徵
北海道犬可以話係起源最早嘅犬隻品種之一，厚重毛皮之下，北海道犬臉上掛著一副單純可愛表情，善於戰鬥、個性英勇而且非常小心翼翼。北海道犬忠於主人，由於最初係獵犬，因此對主人以外嘅人或動物會展現出輕微攻擊性，意味著由佢哋細細個開始就必須要好好訓練服從紀律。
北海道犬毛色
北海道犬嘅毛色亦為5種，分別係胡麻、虎紋、赤、啡黑與白色。
土佐犬
當同日本人提到土佐犬時，佢哋喺腦海裡面最先浮現嘅第一個印象大概會係嚴肅外表與龐大體型。其實，土佐犬實際上有兩種唔同類型，就等我哋一齊去睇睇土佐犬兩種唔同類型之間有咩分別啦！
土佐犬歷史
土佐犬最原先係嚟自四國土佐（現稱為高知縣），因此也被稱為「四國犬」。土佐犬原本係一隻好似狼嘅中型犬，曾經有好一段時間被用作為鬥犬，幫助日本武士振奮精神，亦因為咁而開始變得越嚟越強大。經過同英國獒犬、鬥牛犬與大丹犬等外國品種交配後，逐漸演化成而家我哋所見到嘅土佐犬模樣。
土佐犬特徵
土佐犬體格健壯、強壯、威武，擁有龐大體型；頭骨寬闊，配上黑色或啡色大鼻哥，又以又細又薄嘅耳仔為特徵。一般家庭環境雖然可以養土佐犬，但由於佢哋天生擁有一副「戰鬥格」，需要用一段時間先可以獲得佢哋嘅信任，因此最好每日都要抽時間好好鍛鍊佢哋。
土佐犬嘅毛色
土佐犬毛色通常係胡麻、赤、黑褐三種顏色，最近見得比較多嘅係白色與虎紋色。
日本狆
日本狆擁有一個短短嘅鼻哥仔，長相獨特。體型方面，體重一般淨係得3公斤，細細粒非常適合都市生活，或無庭院嘅家庭。日本狆姿態優美、舉止優雅，亦因爲咁而令佢哋喺世界各地都非常受歡迎。
日本狆歷史
日本狆係喺所有日本犬嘅犬隻品種當中，歷史最為悠久，相關紀錄可追溯至西元8世紀（奈良時代左右），係日本第一隻作為改良犬隻品種並獲得全球認可嘅品種。日本狆由一開始就係被當作寵物犬飼養，佢哋通常都好安靜，唔會太過於興奮，非常適合喺室內飼養。
日本狆特徵
日本狆對非常黐主人，聰明又友善。面孔以外嘅全身毛髮充滿光澤又美麗，由於毛髮容易打結，因此每日嘅梳毛程序就變得非常重要。順帶一提，日本狆唔太需要成日去戶外活動喔。
日本狆毛色
日本狆毛色分布唔均勻，大部分係白色與黑色，有時會見到紅啡色。好多人都鍾意佢哋兩邊對稱嘅面孔，通常會與毛色相匹配。
Comments