對馬觀光特色數之不盡！嚟到對馬，遊客唔單只可以享受被山海環繞嘅絕景展望景點以及對馬海流孕育嘅海鮮美食，仲可以體驗乘搭遊艇等活動。今次要為您介紹嘅「對馬・淺茅灣黃金路線」，就特別準備咗大型遊艇包船及巴士包車服務，帶大家踏上一趟與別不同嘅海陸觀光之旅。事不宜遲，馬上帶大家啟程，體驗將水陸兩地一網打盡嘅全新觀光路線！
目不暇給美景輪流登場！「黃金路線」精選必睇景點逐個數！
從尾崎港出發！尾崎地區自由散策＆參觀黑鰭吞拿魚養殖場
首站行程先從淺茅灣尾崎港出發。尾崎地區係日本最大型黑鰭吞拿魚養殖地，亦係名牌吞拿魚「雪花之華（トロの華）」嘅生產地。
越過棲息著只生存於尾崎漁港到對馬之間嘅「對馬山貓（ツシマヤマネコ）」嘅山嶺後，下一站大家將會嚟到鄉崎燈塔附近嘅「都都智（つつち）神社」。潮漲時，鳥居將會沉入海中，上演一幕「海中鳥居」神祕奇景！
隨後搭船前往黑鰭吞拿魚養殖場，參觀餵魚等養殖過程。運氣好的話，您仲可以體驗丟魚餌或參觀從魚池捕獲黑鰭吞拿魚嘅過程呢！
於尾崎地區享用當日朝早捕獲嘅漁夫海鮮飯午餐！同場再勁擦黑鰭吞拿魚＆爆買血拼
今日午餐，就決定用由定置網捕獲得來、由當日朝早新鮮上釣海鮮製成嘅漁夫飯以及黑鰭吞拿魚醫肚！所謂「漁夫飯」，即係漁夫們於捕魚期間或捕魚後返到港口，享用剛捕獲得來嘅新鮮魚貝類而得名。喺對馬品嘗不經任何加工處理嘅當地新鮮食材，先至算係最識嘆！遊艇將會於尾崎漁港靠岸，因此喺船上大大啖狂擦新鮮魚貝類就啱喇！食完午飯後，記得仲要盡情選購名牌黑鰭吞拿魚「雪花之華（トロの華）」嘅加工水產做手信啊。
午後時光從陸地開始，遊覽各大必睇景點！
食飽飯後，中午於陸上繼續行程，第一站先搭巴士前往「萬關橋」參觀。萬關橋係一條架設於淺茅灣與三浦灣之間嘅運河「萬關瀨戶」上嘅橋樑，參觀後再到位於淺茅灣北岸、可360度俯瞰山下風景嘅「烏帽子岳」、「和多都美神社」等名勝觀光。「和多都美神社」本殿正面五座鳥居中有兩座佇立於海中，隨每日潮退潮漲，予人印象亦會有所不同，散發出一股神秘氣氛。
從仁位港乘搭遊艇前往珍珠養殖場＆由海上參觀大吉戶神社
之後再次乘搭觀光船進行海上觀光。對馬除咗因黑鰭吞拿魚而聞名之外，其實亦係養殖珍珠名產地，因此路線會帶大家先參觀珍珠養殖工場以及珍珠筏！養殖場所在嘅地區附近一帶海浪平穩，最適合養殖細緻且高質珍珠。其後再參觀40米高嘅巨大火成岩「鋸割岩（のこわきいわ）」、「大吉戶神社」、突出於淺茅灣上嘅半島以及於城山（海拔276米）上築城嘅「金田城跡」等景點。圍繞金田城跡嘅護城石長約2.2公里，亦係此行必睇重點之一！
於長板浦港解散後，夜晚於嚴原港區內酒店休息＆試勻當地美食
完成一日行程，傍晚返到長板浦港解散後，夜晚就喺嚴原（いずはら）港地區內酒店悠閒休息並把握機會試勻當地美食。嚴原港位處嘅嚴原町係對馬市役所在地，可謂對馬嘅中心地帶。遊客除咗可以到小店餐廳品嘗新鮮海產外，亦不妨可以考慮到提供特色當地美食「對馬漢堡」嘅店舖探究一番喔！
前往對馬嘅交通方式
遊客可從福岡或長崎出發前往對馬，文通方式為乘搭渡輪、高速船或飛機。由博多港（博多碼頭）乘搭高速船（九州郵船）經由壹崎，需要約2小時15分鐘；乘搭渡輪（九州郵船）的話則需要約5小時50分鐘。
搭飛機的話，可從福岡機場乘搭ANA，或由長崎機場乘搭ORIENTAL AIR BRIDGE至對馬機場，單程飛行時間大約為35分鐘。
黃金路線已為您準備咗多個精彩海、陸景點，保證您一定會對對馬嘅觀光旅遊畢生難忘！各位旅人，立即嚟加入我哋嘅觀光行列啦！
●對馬觀光物產協會
→ https://www.tsushima-net.org.t.ij.hp.transer.com/
●對馬・淺茅灣黃金路線
→ https://www.tsushima-net.org.t.ij.hp.transer.com/golden-route/
→ https://www.tsushima-net.org.e.ij.hp.transer.com/golden-route/（English）
Comments