長崎縣「對馬」係一座位於日本九州北部玄界灘嘅島嶼。有別於九州或本州，對馬擁有一套獨特自然與文化，無論係參觀令人嘆為觀止嘅秀麗景色，以及品嘗黑鰭吞拿魚等好食又新鮮嘅海產等，都係只有喺對馬先可以體驗到！對馬可謂集日本島嶼觀光特色於一身，而家就快啲跟我哋嚟一睇發掘佢嘅好玩之處啦！
獨一無二！？向您介紹擁有豐富資源嘅「對馬」
「對馬」隸屬長崎縣，漂浮於九州與韓國之間嘅對馬海峽上，亦係日本離島中第三大島嶼（除沖繩本島與北方四島外），因距離韓國僅約50公里而成為著名「國境之島」。對馬最大嘅特色，就係島上雄偉壯觀嘅大自然。島嶼約89%面積為山地，因此亦有「山島」之稱，至今仍保存著多座未開發嘅原生林。遊客從「烏帽子岳展望台（烏帽子岳展望所）」可飽覽零星散布於海灣上嘅多個島嶼，將藍天碧海景色盡收眼底。山川壯麗嘅大自然、洗滌身心嘅美景、獨樹一格嘅文化…以上種種特色都可謂喺日本其他島嶼搵唔到呢！
山林青蔥翠綠、海景迷倒眾生，保證令您流連往返！
對馬擁有眾多大自然景觀，例如對馬代表性名勝之一嘅「淺茅（あそう）灣」就係一座谷灣式海岸，位於對馬上島以及下島之間嘅西方，由錯綜複雜海灣、陡峭懸崖斷壁、無數島嶼編織出人間仙境。
數到島上最推薦嘅景點，就莫過於「烏帽子岳展望台」。展望台位於對馬正中央海拔176米嘅烏帽子岳山頂，方便遊客俯瞰一望無際嘅淺茅灣美景。喺「瞧見異國景色的展望台（異国の見える丘展望台）」上，您更可以遠眺韓國釜山市街景，而喺「上見坂公園」則可飽覽由環繞群山嘅原生林以及汪洋碧海打造出嘅強烈色彩對比。
「對馬」曾作為繁華海上交通要塞，因此眾多大陸文化都係經由此地傳入！
由於對馬位於日本本土與內陸之間嘅位置，因此從公元前開始，此地就作為連接九州本土與朝鮮半島嘅海上交通要塞而繁榮起來。金屬器具、漢字、佛教、政治制度等來自朝鮮、中國嘅大陸文化經由對馬或壹岐傳入日本，對馬作為日本誕生時嘅「臍帶」發揮出重要作用。江戶時代，此地更被幕府指定為對朝鮮外交嘅重要門戶，負責接待、引導國家使團等工作。
天然星鰻、黑鰭吞拿魚等時令海鮮種類繁多！鹿肉、豬肉等野味佳餚亦不容錯過
對馬位處對馬海流正中央位置，一年四季漁穫量相當豐富，遊客隨時都可以品嘗到高級魚種「喉黑」、馬頭魚（赤甘鯛）、牙帶魚等時令海鮮。
此外，淺茅灣亦係日本最大型黑鰭吞拿魚養殖地，名牌吞拿魚「雪花之華（トロの華）」就出產於此。「雪花之華（トロの華）」如同天然吞拿魚般油脂豐富，魚肉堅實，高質到完全唔會令人覺得佢係人工養殖！順帶一提，對馬亦係天然星鰻嘅著名產地，漁穫量屬日本全國數一數二～
除咗新鮮魚貝類外，對馬著名嘅當地美食亦相當豐富。例如唇齒留香嘅「對州蕎麥麵（対州そば）」、將新鮮魚貝類放於石頭上燒熟享用嘅「石燒（石焼き）」，又或使用番薯澱粉製作嘅麵條料理「六兵衛（ろくべえ）」等。個肚仲有空位的話，記得仲要試埋使用豬肉、鹿肉等製成嘅野味佳餚啊！
搭船或飛機即可輕鬆抵達！馬上出發前往對馬一探究竟啦！
前往對馬嘅交通方式有兩種，分別為搭船或搭飛機。搭船的話，由博多港（博多碼頭）乘搭九州郵船運行嘅高速船，經由壹岐約2小時15分鐘即可抵達對馬嚴原港。若搭乘同為九州郵船運行嘅渡輪的話，則需約4小時40分鐘。
搭飛機的話，您可以從長崎機場乘搭ORIENTAL AIR BRIDGE（每日來回4～5班次），或由福岡機場搭乘ANA（每日來回5班次）至對馬機場，飛行時間大約為35分鐘。
心動不如行動！馬上跟隨編輯部嘅腳步，一齊前往特色多籮籮嘅島嶼「對馬」探險啦！
Comments