宮城縣仙台位於日本本州東北地區，秋天時漫天紅葉點綴、冬天時則呈現出夢幻冰雪世界，四季自然美景令人讚嘆，難怪唔少香港人近年都鍾意去東北「追楓」！
仙台地區嘅紅葉季通常為每年10月中旬至11下旬，根據海拔與樹種，實際秋色轉變時間亦會有所差異。今次FUN! JAPAN編輯部就為大家精選出6處賞紅葉景點，下次計畫紅葉之旅嘅時候，不妨可以將以下6個地方放入行程！
仙台象徵：櫸樹林蔭道「定禪寺通」
仙台綠樹成蔭，係日本國內非常出名嘅「杜之都（森林之都）」。例如仙台市中心「定禪寺通」兩旁，就種滿高聳櫸樹，每當秋風起，道路兩旁樹葉就會染上秋色，呈現紅黃交錯嘅街頭景色，肯定唔會令您失望！另外，「定禪寺通」嘅冬季燈飾亦非常出名，如果曾經係呢度欣賞過紅葉嘅話，下次不妨可以計畫去欣賞冬季燈飾。
景點資訊
- 名稱：定禪寺通
- 地址：宮城縣仙台市青葉區
- 交通方式：從仙台站步行約15分鐘；從仙台站搭南北線至「勾當台公園」站，步行約1分鐘
- 門票：免費
瑞鳳殿：怡人景緻永伴長眠伊達政宗
以桃山時代華麗風格建成嘅瑞鳳殿，喺參天雪松環繞下，更添上一份奪目耀眼。伊達政宗係仙台藩首位藩主及著名「獨眼龍」武將，而瑞鳳殿就係祭祀伊達政宗嘅靈廟。到此一遊，除咗可以參觀瑞鳳殿範圍內嘅小型博物館，了解更多關於伊達政宗嘅歷史之外，金碧輝煌、豪華瑰麗嘅建築亦與秋葉完美配搭，演繹出火紅赤色、浪漫橙黃，顏色層次相當豐富，更添瑞鳳殿嘅莊嚴感。紅葉季期間，現場更會舉辦夜間點燈活動！
景點資訊
- 名稱：瑞鳳殿
- 地址：宮城縣仙台市青葉區靈屋下23-2
- 交通方式：搭仙台觀光巡迴巴士「LOOPLE仙台巴士」，車程約15分鐘，至4號站「瑞鳳殿前」落車，步行約5分鐘
- 門票：570日圓
- 往年最佳賞紅葉時期：10月下旬～11月中旬
秋保大瀑布＆秋保溫泉：逃離城市塵囂 迷人仙境
「秋保大瀑布」被列為國家指定名勝，亦獲選為「日本瀑布百選」之一。其所在位置位於秋保溫泉溫泉鄉附近，前往秋保大瀑布嘅沿途會先經過西光寺，再往大瀑布方向走去時，途中會見到一座瀧見台，遊客可以從展望台上瀑布從55米高處落下嘅壯觀場景。如果想更加近距離去欣賞震撼瀑布的話，則推薦您沿著樓梯行到去瀑布底部！
如果行程中安排入住秋保溫泉，就千祈唔好錯過秋保溫泉附近嘅「磊磊峽」。全長650米嘅溪谷內佈滿到各種奇岩異石，從「覗橋」上方俯瞰，您會發現岩石上有個心型水窪，因此磊磊峽有「戀人聖地」之稱。而秋保溫泉鄉嘅天守閣自然公園以及磊磊峽於11月份紅葉季時期，亦同樣會舉辦夜間點燈活動喔。
景點資訊
- 名稱：秋保大瀑布
- 地址：宮城縣仙台市太白區秋保町馬場字大瀧
- 交通方式：從仙台站8號公車站乘搭往秋保大瀑布方向嘅公車，車程約50～75分鐘不等，取決於當日交通狀況
- 門票：免費
- 往年最佳賞紅葉時期：10月中旬～11月上旬
圓通院：日本三景之一松島上嘅寺院
圓通院建立於1647年，係仙台藩第二代藩主伊達忠宗之子伊達光宗嘅靈廟，緊鄰瑞巖寺。圓通院範圍內嘅「三慧殿」，被列為國家指定重要文化遺產，除此之外，院內仲有4座仿造松島灣美景修建嘅庭園，秋天浪漫絢爛紅葉景色，襯托簡單樸實木造建築，更添一股莊嚴氣氛。每年10月下旬至11月中旬，官方會配合松島點燈活動，由夜燈高照嘅圓通院營造出浪漫迷人秋夜氛圍。
景點資訊
- 名稱：圓通院
- 地址：宮城県宮城郡松島町松島字町内67
- 交通方式：從仙台站搭仙石線，車程約25分鐘，至「JR松島海岸」站落車，再步行約5分鐘
- 門票：300日圓
- 往年最佳賞紅葉時期：10月下旬～11月中旬
仙台西公園：仙台市內最古老公園
沿著廣瀨川而建嘅仙台西公園建於1875年，係仙台市第一座公園。園內種植著非常多花卉與樹木，春天時可以欣賞到櫻花，而秋天時則可以欣賞到一大片火紅紅葉，係仙台市中心內最佳賞紅葉與賞櫻花景點，啱晒想喺城市中央呼吸清新空氣嘅遊客！欣賞完自然美景之後，仲可以順便參觀埋附近嘅櫻岡大神宮、著名雕刻家作品，以及松尾芭蕉句碑等歷史名勝。
景點資訊
- 名稱：西公園
- 地址：仙台市青葉區櫻之岡公園1-3
- 交通方式：搭地鐵東西線至「大町西公園」站落車，步行約5分鐘
- 門票：免費
- 往年最佳賞紅葉時期：10月下旬～11月上旬
輪王寺：楓葉美景猶如仙境
輪王寺原本於1441年建立於福島縣，隨著伊達家於17世紀初期移遷而最終落址於宮城縣仙台市。精心設計嘅庭園造景喺秋天火紅楓葉映襯之下，營造出一幅如詩似畫嘅日式景色，當中又以「逍遙園」為東北地區數一數二著名庭園。精心建造嘅錦鯉池、細心修剪嘅庭園造景，再配上華麗嘅寶塔，整個場面彷如京都般充滿古典氣息！
景點資訊
- 名稱：輪王寺
- 地址：宮城縣仙台市青葉區北山1丁目14-1
- 交通方式：搭JR仙山線，車程約5分鐘，喺「北仙台」站落車，步行約10～15分鐘
- 門票：300日圓
- 往年最佳賞紅葉時期：11月上旬～11月中旬
Comments