香港於國際金融市場佔有重要地位，文化特色「東西交匯」，自英國殖民時期流傳至今嘅西方文化加上既有傳統習俗，令香港成為全球數一數二嘅多元城市。而日本文化，就更與香港有著相當密切嘅關係！今次FUN! JAPAN編輯部要同大家介紹香港編輯JACKY，係FUN! JAPAN公認時尚達人（？），馬上就嚟一齊睇睇佢同日本密不可分嘅生活與經歷啦！
滲透於香港日常生活嘅日本二三事
「從我懂事開始，日本產品就已滲透生活，打開電視就可以睇到日本卡通、日劇與綜藝節目等。尤其係以前香港嘅流行文化、音樂、電影與漫畫，絕大部分都係吸收日本流行文化而發展，例如香港流行樂壇有好多耳熟能詳嘅歌曲，就都係改編自日本歌曲。咁講法可能有啲誇張，但係我如果我無咗日本嘅產品，包括化妝水、洗頭水等日常用品在內，就完全無辦法生存（笑)。原因之一，亦要多得喺香港就可以買到日本產品嘅機會，比其他國家高好多呢。」
誤打誤撞 卻走上憧憬日本之路
「我讀嘅係香港中文大學日本研究學系。我非常鍾意日本，但喺家人嘅期望下，日本研究原本並係我填嘅第一志願。唔知算好彩定唔好彩，當年分數唔足以令我考入第一志願，於是就被分發到自己『私心』想讀嘅日文研究學系。我係讀大學後先開始學日文，大一時星期一到星期五大部分時間都係日文堂，而除咗日文之外，日本文化、歷史等科目都係必修課程。」
必修課程之一—前往日本留學！加深日後移居日本嘅諗法
「到咗大二，必修課程就係前往『日本留學』，班上好多人都係因為想留學先就讀呢個學系。我喺大學時仲未搵到人生目標（典型廢青），於是就諗住嚟日本生活一年，揀選咗購物、交通、追星都方便嘅東京，並喺留學期間順利考取N1。同學有日本人亦有外國人，日文程度好，就可以揀就同日本人一齊上堂；相反，就需要選擇專門畀交換留學生嘅日文課程。不過，我大半時間主要其實都係體驗日本生活為主，因為鍾意東京隨時都會有新事物問世，生活喺呢個環境下接觸到新嘅體驗與刺激，亦奠定了我日後要再嚟生活嘅諗法。」
大學畢業後直接赴日工作 深感能力不足再次進修
「喺香港大學畢業後，我應徵上日本嘅工作，但工作同原先想像有所不同，自覺能力不足，就想繼續進修學新嘢並決定辭職先返香港。之後，再次申請學生簽證就讀東京某專門學校嘅時尚商業一年課程，專門學校畢業後曾試著找工作，卻因為專門學校簽證只有一年，於是又再度需要先返香港。」
透過香港日本旅遊雜誌磨練自己 奠定採訪等基本功力
「屋企人喺我2、3歲嘅時候，已經經常帶我去日本旅行，一直以嚟都非常鍾意呢個國家。於是返到香港後，就去到一間介紹日本旅遊嘅雜誌工作。公司規模細，雖然咩都要做，但亦因為咁所以學到好多，從採訪、影相、撰文到編輯，有時候都需要『一腳踢』完成。實際工作之後，發現自己鍾意介紹新事物，正如之前都提過，日本隨時隨地都創造梗新流行，潮流日新月異，加上工作緣故需要經常去日本出差，因此呢段期間亦令我有更多機會日本各地嘅旅遊特色。」
選擇FUN! JAPAN嘅原因
「我從未試過長時間喺日本生活過，因此對東京仍然抱持著一份憧憬。咁啱上網搵工時，被我搵到FUN! JAPAN正招募梗廣！東！話！編輯。各位可能唔太知道，其實喺日本可以用到廣東話嘅工作職位並唔多，而且工作內容同之前喺香港份工相當接近，工作地點再換成個人非常嚮往嘅東京。幸運地，send CV後獲順利錄取，於是就有機會再次返到日本。實際嚟到公司後，發現工作氣氛同想像中嘅『傳統日本職場』唔太一樣，同事唔係日劇中嘅死板日本人，就連社長對外國員工嘅接納度都非常高，係一個十分隨和、隨性嘅職場～」
對想嚟日本工作嘅人有咩建議？
「香港人嘅母語係廣東話，加上過去曾經歷英國殖民時期，日常可以用英文溝通，再加上國語（普通話）已經非常有優勢。只不過如果淨係單靠以上三種語言，唔再多學幾種語言旁身的話，就可能好難同人競爭。我經歷過日本留學、工作生活，於日本香港之間輾轉來來回回。正如前面所講，喺日本生活，特別係東京，生活圈會有好多新體驗與刺激，每分每秒都誘惑著您想要再嚟呢！
如果您鍾意日本嘅流行時尚，期待有朝一日生活喺呢個流行國度，我會建議您多睇雜誌，從中學到更多教科書無嘅知識、情報、事物，為自己做好隨時喺呢時尚國家生活嘅準備。」
相關文章
Comments