推薦您一個衝擊力滿分嘅影「呃like」相打卡勝地「鬼之架橋」！「鬼之架橋」位於兵庫縣丹波市，橫跨喺天空上嘅巨岩非常壯觀。鬼之架橋靠近山頂處，想要近距離欣賞雖然要付出多少少時間，但係成功登頂之後欣賞到嘅動人絕景定會終身難忘！鐘坂公園嘅櫻花以及周邊觀光景點魅力無窮，即刻跟著小編腳步去遊山玩水喇！
何謂鬼之架橋？
「鬼之架橋」位於兵庫縣丹波市與丹波篠山市交界處嘅金山山頂附近。岩石傾倒於兩個大石頭之間，遠望似一座橋，彷彿隨時都有可能會倒塌，令人心驚膽戰。坊間自古流傳係由鬼怪去架設嘅橋，所以被稱之為「鬼之架橋」。實際上大約喺15世紀中期，據說係因地震而坍塌嘅巨大岩石偶然變成此模樣。
江戶時代嘅浮世繪畫家「歌川廣重」嘅浮世繪作品『六十餘州名所圖會』中，亦有描繪鬼之架橋嘅景致。四圍有唔少巨大嘅岩石，企喺岩石上可以將群山、丹波市街與鐘坂嶺等一覽無遺。
鬼之架橋點去？
由於鬼之架橋位於山上，所以必須事先確認交通方法。入山有兩種方法，一係由丹波市柏原町，另一個係由丹波篠山市追入前往。前者因登山距離比較長，所以推薦由後者追入入山比較方便。
前往登山入口嘅追入神社，可以選擇租車或搭車由柏原站前往，車程約11分鐘。租車前往嘅話，車輛可以停泊喺登山口旁。由追入神社往下行約80公尺處附近嘅雙燈籠就係登山口。「金山登山口」嘅告示板映入眼簾，宣布正式開始登山！途中，仲要打開防止動物嘅柵欄先可以前行，千祈唔好唔記得順手閂門啊！再往上爬無耐就會到園林寺遺址。登山至此，離鬼之架橋嘅距離大大拉近。由登山口到鬼之架橋大約步行40分鐘，提提大家路面可能會濕滑，記得要著上登山鞋啊。另外，落雨嘅隔日或者係落雨當日都需要特別小心注意，以免滑落。
周邊推薦景點1：鐘坂公園嘅櫻花
「鐘坂公園」以賞櫻景點聞名，由鬼之架橋嘅金山登山口出發，往丹波市側大約行15分鐘即可抵達。公園位於鐘坂嶺下，連接著明治、昭和、平成三條隧道，為紀念明治隧道開通而種植嘅櫻花。每年3月下旬至4月上旬大約有300棵櫻花盛開，4月上旬舉辦櫻花祭時，明治隧道巡遊健行活動亦會一齊舉行。除咗櫻花，秋天仲可以賞楓！
鐘坂公園
- 地址：兵庫県丹波市柏原町上小倉
- 交通方式：由JR柏原站出發車程約5分鐘
周邊推薦景點2：黑井川沿岸嘅櫻花
由鬼之架橋山腳下嘅鐘坂公園駕駛約20分鐘，就可以到達另一個賞櫻勝地「黑井川」。沿著福知山線鐵軌流淌嘅黑井川，沿岸種植咗大約500棵櫻花。賞櫻季節一到，前往賞櫻嘅遊客眾多，非常熱鬧。日頭可以一邊漫步街頭一邊賞花，夜晚就可以欣賞燈籠光影倒映於黑井川中，醉人景色相當如夢如幻，令人陶醉不已。賞櫻最佳時期係每年3月下旬至4月上旬，有機會嘅話，一定要嚟行個圈啊。
黑井川沿岸
- 地址：兵庫県丹波市春日町黒井
- 交通方式：由JR黑井站步行5分鐘
Comments