阪神地區位於兵庫縣東側，鄰接神戶以及大阪，係自然與文化嘅寶庫！阪神地區有唔少私房景點，值得您一訪再訪！比如香港人耳熟能詳嘅「甲子園」、日本第一酒鄉「灘五鄉」、歷史悠久嘅「菊正宗酒造紀念館」，仲有魅力遍布全球嘅「寶塚大劇場」、「手塚治虫紀念館」等等。而且交通方便，可以輕輕鬆鬆前往！
想一探球場內部嘅秘密？「甲子園歷史館」可以滿足您嘅願望！
「甲子園歷史館」位於阪神甲子園球場外野觀眾席下方。透過影片、照片以及相關物品等，介紹以阪神甲子園為主場嘅職棒球隊「阪神虎」、高中棒球嘅歷史，以及帶您齊齊回顧知名對決勝負場面與知名選手。另外，虛擬實境（VR）影片、3D立體藝術繪畫，以及以棒球為主題漫畫嘅「漫畫甲子園」等特別展示亦值得去觀賞！
館內仲有提供超人氣嘅「球場導覽行程」，帶您行入球場內部。透過導覽員解說，可以進一步窺探平時睇唔到嘅球場內部！（導覽費用一般1,500日圓、兒童1,000日圓，含甲子園歷史館嘅入館費。）另外，紅極一時嘅電影『KANO』（日文片名為『KANO 1931海の向こうの甲子園』），描述戰前台灣「嘉義農林學校」如何奮鬥成為人氣球隊，並打入甲子園嘅故事。片中所出現嘅棒球制服亦會喺館內展示。
甲子園歷史館
- 地址：兵庫県西宮市甲子園町1-82
- 入館費用：一般600日圓、兒童300日圓
- 交通方式：自阪神電鐵「甲子園」站步行約5分鐘
日本酒產量佔全日本約25%嘅日本第一酒鄉「灘五鄉」
享有盛譽嘅日本第一酒鄉「灘五鄉」，位於西宮市今津至神戶市灘區大石沿岸約12公里地區。由東至西分別係今津鄉、西宮鄉、魚崎鄉、御影鄉、西鄉等五鄉，因此稱為「灘五鄉」。全國約25%嘅日本酒都係喺呢度製造，第一個理由係此處擁有最適合製酒嘅「宮水」湧出，水中富含鈣質、礦物質等物質，可製作出酒氣凜冽、清爽不膩嘅日本酒。第二個理由係鄰近日本酒原料嘅最頂級酒米「山田錦」產地。另外，由六甲山群山吹過嚟嘅風稱為「六甲颪」（Rokko-oroshi）。冷冽、乾燥嘅六甲嵐亦有助於調節儲藏室溫度。
灘五鄉有可供見學參觀或提供試飲嘅資料館、酒藏。另外，由2020年10月起，阪神電鐵推出以「適合四季嘅日本酒品嚐方法」等主題嘅阪神彩繪電車（預計運行兩年）。彩繪電車只有一個車廂行駛，如果可以搭到嘅話就太幸運喇！
※飲酒不駕駛，駕駛不飲酒。
※未成年請勿飲酒。
代表日本嘅日本酒品牌「菊正宗」
「菊正宗」位於兵庫縣神戶市東灘區，係代表日本嘅日本酒品牌。自1659年創業以嚟，承繼傳統嘅清酒釀造製法「生酛（きもと）釀造法 」去製酒。秉承「品質第一」嘅原則，堅持製作如優質水般口感清爽不膩嘅「正宗烈味辛口酒」。除咗清酒之外，亦有販售酒粕、點心、日本酒化妝品以及面膜、入浴劑等豐富嘅相關商品。
「菊正宗酒造紀念館」展示著多種被指定為國家重要有形民俗文化財產嘅「釀造灘酒用具 」，每年約有10萬人以上造訪。館內設有付費試飲區以及紀念品販售處，可以喺菊正宗酒造紀念館」購買紀念館限定嘅酒品、原創商品等。另外，風味香醇嘅酒粕雪糕以及使用純米吟釀酒嘅酒饅頭，係必食必買嘅美食啊。
菊正宗酒造紀念館
- 地址：兵庫県神戸市東灘区魚崎西町1-9-1
- 入館費用：免費
- 交通方式：由JR住吉站搭車至六甲LINER南魚崎站落車後步行2分鐘。或者喺阪神魚崎站落車，沿著住吉川嘅遊步道「清流之道」向南步行10分鐘。
※飲酒不駕駛，駕駛不飲酒。
※未成年請勿飲酒。
魅力十足嘅華麗歌舞表演「寶塚大劇場」
以兵庫縣寶塚市為主場，由女性所組成嘅日本歌劇團「寶塚歌劇團」為世界知名嘅劇團，亦曾前往台灣巡迴演出。以首席明星男役為主，華麗嘅歌舞秀令人睇得如癡如醉。「寶塚歌劇團」由花、月、雪、星、宙五組輪流公演，以管弦樂團現場演奏作演奏方式。寶塚大劇場唔單只可以觀賞歌舞表演，劇場內嘅商品販售處亦有原創商品等紀念品可以選購。
寶塚大劇場
- 地址：兵庫県宝塚市栄町1-1-57
- 交通方式：阪急・JR「寶塚站」落車後步行10分鐘
「寶塚市立手塚治虫紀念館」名作巡禮
知名日本漫畫家「手塚治虫」，5歲至24歲喺寶塚市度過接近20年嘅時光。手塚治虫著名嘅畫作相當多，例如《小飛俠阿童木》、《怪醫黑傑克》、《森林大帝》等，至今仍受大眾喜愛。「手塚治虫紀念館」以手塚治虫所倡導「對自然嘅愛」、「尊重生命」為主題，將青少年夢想與希望拓展到未來。現場同時展示手塚治虫嘅親筆手稿以及首刷書等貴重作品。紀念館入口大廳設計以《寶馬王子》中嘅皇宮為構思，鍾意《寶馬王子》嘅粉絲們不妨去「手塚治虫紀念館」朝聖一下！
手塚治虫紀念館
- 地址：兵庫県宝塚市武庫川町7-65
- 入館費用：一般700日圓、中學・高中生300日圓、小學生100日圓
- 交通方式：由JR寶塚線・阪急「寶塚站」落車步行8分鐘，或由阪急寶塚南口站落車步行5分鐘。
Comments