馳名海外嘅溫泉地「城崎溫泉」，位於兵庫縣北部但馬地區嘅豐岡市。豐岡市以被稱為「但馬小京都」嘅出石為首，有可以體驗各種活動嘅「神鍋高原」，因火山噴發而形成嘅國家天然紀念物「玄武洞」等人氣景點滿載。遊覽城崎溫泉後，非常推薦您到豐岡市一遊！
擁有「但馬的小京都」之美譽嘅出石城下町
「出石町」自古以來因作為城下町而繁榮，並以「但馬小京都」之稱譽為人所知曉。有著出石城遺跡、出石家老屋敷、宗鏡寺等歷史悠久嘅觀光景點，時以至今傳統嘅町屋仍散佈喺町內各處。另外，建於明治初期（19世紀後半期）嘅日本古老鐘樓「辰鼓樓」係出石町嘅象徵，受到大家喜愛。出石町古色古香嘅街道被指定為「重要傳統的建築物群保存地區」，特別推薦著住和服喺充滿江戶風情嘅街道上漫步。
去到出石町，「出石皿蕎麥麵」又點可以錯過！將蕎麥麵分裝到細碟上供客人享用，呢種食法非常獨特，喺日本全國亦好罕見。一般嚟講，5盤係一個人嘅分量，將一碟又一碟嘅蕎麥麵擺滿成張枱嘅情景，係咪好想即刻影低再放上社交媒體同親朋好友開心SHARE呢？「出石皿蕎麥麵」嘅食法係，首先將醬汁倒入稱為「蕎麥豬口」（蕎麦猪口）嘅蕎麥麵專用杯裡面，然後一邊加入各種辛香料，一邊享用每一碟蕎麥麵。喺出石町有大約50間蕎麥麵店，推薦您邊行邊覓食，制霸唔同嘅蕎麥麵店非常過癮！
一年四季都可以玩到興起嘅神鍋高原
位於豐岡市西南部嘅神鍋高原，係被大自然所包圍，關西屈指可數嘅度假勝地。「神鍋高原」係由火山活動所形成，周圍環繞著以神鍋火山為首嘅6個火山。另外，神鍋高原係聯合國教科文組織世界地質公園認定嘅山陰海岸地質公園之一，其地質和地形嘅珍貴性唔單只喺日本國內，喺全世界亦受到極大關注。
神鍋高原四季都可以享受得到唔同嘅景緻。另外，除咗具有研究價值相當高嘅地形和地質之外，仲有各種唔同嘅活動、利用當地食材所製作嘅美食、身心都可以得到治癒嘅溫泉等，自然景色和觀光魅力非常豐富。春天踏青健行，夏天滑翔翼和露營，秋天紅葉和瀑布巡遊，冬天著上雪鞋去踏雪健行和滑雪等等，神鍋高原一年四季都可以玩個唔停。另外，神鍋高原有「UP神鍋滑雪場」、「奧神鍋滑雪場」、「萬場滑雪場」三個滑雪場，由初學者到上級者嘅滑雪場都有，無論您係咩好手定初心者都可滑得盡興。而且，神鍋高原更係西日本歷史最悠久嘅滑雪場啊。
國家天然紀念物 玄武洞
「玄武洞」係160萬年前因火山噴發而形成嘅洞穴。噴火嘅岩漿冷卻後，形成規則排列嘅裂縫。排列整齊嘅六角形石柱被稱為「柱狀節理」。高寬數十公尺嘅玄武洞，企喺玄武洞前就可以感受到大自然嘅宏偉，扣人心弦。玄武洞呢個名係江戶時代（1807年），由幕府官員柴野栗山所命名。除咗玄武洞之外，仲有「青龍洞」、「白虎洞」、「南朱雀洞」、「北朱雀洞」，呢5個洞窟合稱為「玄武洞公園」。
「玄武洞博物館」位於玄武洞入口旁邊。呢度仲設有餐廳、咖啡店、菓子工坊、但馬嘅手信特產&博物館、各種體驗設施。另外，博物館裡面展示著各式各樣嘅寶石、礦物、化石等，可以一邊遊玩一邊學習各種豐富知識啊。
Comments