日本水果因為優質品質而廣受國際好評，但其實日本國土當中，只有12%係屬於農地！即使農地面積狹小，全國各縣依然可以生產出特定水果品種，並持續進行改良，發展並未有因為「土地問題」而受到限制！今次呢篇文章，編輯部就會為大家介紹，幾乎每個遊日旅客都需要必知・必食嘅日本各縣代表性水果！
北海道：夕張蜜瓜
於北海道出產、而又佔日本國內生產量第1位嘅，隨便數數都已經包括藍靛果、醋栗、沙棘、樹莓、木莓等多款水果。不過數到遊客必食嘅，就必定非橙色果肉嘅夕張蜜瓜莫屬！相信只要去過北海道，您都會發現當地充斥著用上夕張蜜瓜而製成嘅蛋糕、芭菲或零食手信吧？夕張蜜瓜外觀呈豐滿圓形狀、網紋立體且寬闊，拎上手時比望上去時重得多嘅就算係好貨。由於夕張蜜瓜較為早熟，為保持時令鮮度，建議食用前先將蜜瓜保存於雪櫃內冷凍2至3小時。
青森：蘋果
蘋果大家就食得多，但您又知唔知蘋果嘅品種喺全球多達約15,000種呢？日本全國現時大概種有2,000種蘋果，而青森縣內就可以搵到當中約50種。經品種改良後嘅蘋果，大部分都擁有柔和甜香。去到青森縣的話，您甚至有機會搵到黃色嘅蘋果呢！
弘前市佔有青森縣約整體4成嘅蘋果種植面積。使用蘋果製成嘅特產及手信不在話下，弘前市甚至會為遊客派發「蘋果批地圖」，為大家提供「蘋果批制霸」特色旅遊方式呢。
山形：櫻桃
山形縣佔日本整體約7成櫻桃生產量。每逢當造季節，都會有大批遊客從日本國內外蜂擁至山形縣，為求品嚐著名櫻桃！
云云品種當中，「佐藤錦」味道被視為最優質。日本櫻桃普遍都屬於高級品種嘅原因之一，就係因為每粒櫻桃都係經人手精心栽種而成。授粉過程結合放養蜜蜂與人手去絨毛等多重工序。若日光不足，櫻桃色澤就唔會靚，因此農場工人亦需要每日確保櫻桃唔會被樹葉遮擋於陰影下。收割時，更會逐粒逐粒確認色澤後，再將每粒櫻桃排好方向、整整齊齊包裝出貨。每個工序都盡顯日本人一絲不苟認真性格，名副其實「粒粒皆辛苦」！
栃木：士多啤梨
栃木縣坐擁廣闊肥沃土地以及日光、那須等天然優質水源。受惠於晝夜溫差大嘅當地氣候，栃木縣出產嘅士多啤梨份外鮮甜！本來士多啤梨嘅當造季節係春天（5月至6月），但栃木縣就憑藉各式各樣嘅技術，成功於11月至5月期間持續穩定出產高品質士多啤梨。難怪唔少遊客都從縣內、甚至海外遠卦而來，就係為咗春天期間體驗摘士多啤梨！
栃木縣士多啤梨最大特徵係甜味出眾，大粒細粒品種任君選擇，總有一款合您心水！
山梨：葡萄・提子、桃
山梨縣佔全國葡萄出產量逾25%。每年到咗收成季節，縣內隨處都會見到從國內各地以至海外各國慕名而來嘅「葡萄獵人」！與此同時，山梨縣亦係國內首席葡萄酒・紅酒生產地，生產量佔全國約50%。葡萄品種包括最著名嘅巨峰，至玫瑰露（又名德拉瓦）、貓眼、晴王麝香、羅薩里奧比安科（Rosalio Bianco）、甲斐路、甲州等多不勝數。
除此之外，山梨縣亦以桃生產量日本第一而聞名。山梨桃特徵為清甜、多汁、口感柔滑，推薦必食品種包括白鳳、淺間白桃等。
和歌山：柿、蜜柑
日本流傳著一句諺語「當柿子變紅，醫生臉色就會變綠。」 ，意即由於柿子內含豐富營養，因此日常生活中經常食用柿子的話，就可以保持身體健康。柿子內含維他命C等多種維他命，以及胡蘿蔔素、單寧酸、礦物質等。澀味源頭嘅單寧酸有助分解酒精，減輕頭痛症狀，因此對宿醉非常有效。日本人自古以來亦習慣將柿子曬乾後，製成柿乾當成日常零食食用。
與柿子並列和歌山縣日本生產量首位嘅，仲有蜜柑。縣內一處名為「有田」嘅地區係一大種植重鎮，栽種蜜柑歷史至今已超過450年。由於和歌山縣整年氣候溫暖，所在地理位置降雨量較少，因此即使係細細粒嘅蜜柑，都非常甜美多汁！
熊本：西瓜
熊本縣以日本全國第一蕃茄及西瓜生產量以為人熟知。相比起以前「西瓜體積越大越有人氣」嘅年代，現時主流則以「小玉」（細小體積）比較有人氣。縣內大部分西瓜都係喺農膜溫室內種植。要種植出優質西瓜，就必須要有高溫、強光以及晝夜大溫差，而熊本縣就擁有以上所有條件，因此熊本出品嘅西瓜絕對有質素保證！
Comments