日本蔬菜同水果以高品質而聞名全球，但實際上，日本嘅農業用地佔全國土地約13%，只有約499萬公頃嘅農業用地（根據農地法第2條第1款定義嘅農地與採草放牧地）。即使農業用地面積唔多，但憑藉日本高超嘅農業技術，不斷生產出獨具特色嘅當地蔬菜、水果，以及高品質嘅品牌蔬菜、品牌水果。
今次小編會介紹去日本旅行時推薦品嚐嘅蔬菜類別，以及生產量較多嘅都道府縣。
北海道：薯仔、南瓜、洋蔥...等
截止2022年，北海道嘅農耕地面積佔全國嘅四分之一，多達114萬公頃，每戶平均經營農耕地面積達33公頃，比全國平均多約11倍。
當地利用廣闊土地進行大規模嘅耕種活動，除咗種植小麥、粟米、甜粟米，砂糖原材料嘅甜菜根，仲有南瓜（約佔48%）、洋蔥、胡蘿蔔等生產量非常高，有唔少蔬菜、水果嘅收成量都係位居日本之首。
北海道出產嘅薯仔、南瓜、洋蔥等特別受歡迎，牛油焗薯、湯咖喱等等，更被視為北海道代表性美食，深受遊客喜愛。食材特點係具有濃郁甜味，經過烹煮後會感受到鬆軟嘅口感，令人一試難忘。
青森縣：蒜頭
講到青森縣生產量居高日本之冠嘅農產品，就係蒜頭。佔國內生產量約70%，以大粒且具有香氣等優質品種，而享有良好口碑。
點解青森縣盛產蒜頭？除咗擁有適合種植蒜頭嘅土地、高超栽培技術之外，青森縣特有嘅嚴寒冬天係重要因素之一。蒜頭喺冬天時會喺雪底下慢慢累積糖分，去到春天融雪時，糖分高、甜味濃郁且極具風味嘅蒜頭便隨即之誕生。位於東北地區嘅青森縣，其嚴寒冬天係種植蒜頭不可或缺嘅重要因素。
蒜頭收成季節通常係6月底到7月初。而喺呢個時候，只有身處青森先至可以品嚐到收成後，進行乾燥處理前嘅「生蒜頭」！
「生蒜頭」係指新鮮嘅蒜頭收成後去除泥土，保持其新鮮狀態直接食用。通常喺市場或超市見到嘅蒜頭係經過乾燥處理，而生蒜係喺一年一度收成期間，並身處產地先至可以品嚐到嘅特別食材。與乾燥蒜頭有所不同，生蒜頭具有優越新鮮度和濃郁香氣，亦係其特徵之一。
山形縣：「Dadacha豆」
「Dadacya豆」（だだちゃ豆）係山形縣鶴岡市嘅特產，被稱為「枝豆之王」或「極品枝豆」。特點係豆莢表面覆蓋著棕色絨毛，具有甜味和濃郁風味，並帶有類似粟米嘅獨特香氣。
名字中嘅「Dadacya」喺當地方言中有著「父親」、「爸爸」嘅意思。據聞從前有一位熱愛枝豆嘅貴族問枝豆製作人：「今日係邊位「Dadacya」（父親）整嘅枝豆呀？」，而呢個問題便成為該名字嘅由來。
長野縣：生菜
大自然豐裕嘅長野縣以農業蓬勃而廣為人知，當中，除咗以種植提子、蘋果等水果和各種花卉聞名之外，杏鮑菇、滑子菇、鴻喜菇等菇類生產量更居高日本之冠。
提到活用長野縣涼爽氣候成長嘅農產物，就一定係生菜。長野縣擁有可將新鮮採摘嘅生菜送達至全國嘅完善系統，因此喺夏季國內市場佔有率非常高。「朝摘生菜」（朝摘みレタス）更加係日本人耳熟能詳嘅詞彙呢。
由於生菜對氣候極為敏感，所以要喺清晨3點到5點左右時間帶內採摘，並需立即冷卻儲存。採摘當日利用真空冷卻裝置將生菜發送到日本全國各地，次日即可快速上架於店鋪販售。
長野產嘅生菜口感爽脆，帶有淡淡甜味，建議可以直接生食。亦可以簡單滾燙後食用，例如生菜涮涮鍋等料理亦非常推薦！
石川縣：加賀蔬菜
加賀蔬菜係指喺石川縣嘅熱門觀光地區——金澤，所傳承下來嘅當地特色蔬菜，其歷史可追溯至1945年以前。只有經過金澤市農產物品牌協會認證嘅品種先至可以稱之為加賀蔬菜，目前已有15種品項獲得認證。
講到具代表性嘅加賀蔬菜，除咗有特徵為肉厚柔軟嘅加賀黃瓜，葉子表面為綠色、背面為紅紫色、煮熟後帶有獨特黏滑質地口感嘅金時草，仲有帶有栗子般甜味嘅打木赤皮甘栗南瓜等蔬菜。以上提及到嘅加賀蔬菜，可以喺金澤市嘅餐廳和日本料理店輕鬆品嚐得到。
京都：京蔬菜
京蔬菜係指京都府全地區所收穫嘅蔬菜。當中有一種具有悠久歷史嘅京野菜稱為伏見唐辛子，係一種甜辣椒，特點係幾乎無辣味且容易入口。其他代表性嘅京蔬菜有葉肉厚實、口感柔軟且風味極佳嘅九條蔥，仲有因口感脆爽常用於火鍋、燉菜、淺漬等各種料理中嘅京水菜，以及擁有球形外觀和甜味等特徵嘅賀茂茄子等等。
高知縣：茄子
高知縣以溫室促成栽培（10月至6月）嘅茄子栽培而聞名，冬、春季節更擁有全國最大嘅出貨量。高知產茄子皮薄肉嫩，與和式、西式、中式等任何料理搭配都相得益彰！
3月至7月期間栽種嘅「春鈴茄子」，以及以溫室促成栽培（11月～６月）為主嘅「長茄子」，皆適合煮、燒、炸等多種烹調方式，無論係作為料理嘅主角定係配角，都同樣好味道，可以稱得上係日本餐桌上嘅經典食材。
熊本縣：蕃茄
日本超市中，如果講到種類繁多嘅常見蔬菜，無庸置疑就係蕃茄！尤其係百貨公司嘅蔬菜區可以見到擺放著不同大小、形狀、顏色、產地嘅蕃茄，從迷你蕃茄、小蕃茄到大蕃茄都應有盡有。
熊本縣係日本全國蕃茄收成量最高嘅地方。令人驚訝嘅係日本蕃茄中約有五分之一都係屬於熊本產，且能全年出產並運送至全國各地。熊本擁有多樣豐富嘅地形，既有山又有海，係溫暖海岸地區，蕃茄種植期為秋天到春天。而喺涼爽嘅高原地區，蕃茄種植期為夏季到秋季，因此可以全年生產出美味嘅蕃茄。
當中特別出名嘅係「熊本鹽漬蕃茄」。呢種蕃茄係喺熊本八代海沿岸嘅高鹽分墾拓地土壤中種植，因於嚴苛環境下生長，讓其甜味變得更加濃縮，糖度竟高達8～10度！
下次去日本嘅時候，不妨親自一嚐其好滋味啦！
Comments