無印良品嘅舒適豆袋梳化、空氣循環風扇又或超音波芬香噴霧器等人氣商品有幾長售唔使多講，不過編輯部今日要推薦嘅，係鮮為人知嘅隱藏性「良品」！以下幾款提升生活品質超實用小物，去MUJI就簡單買得到，原來日常生活都可以咁有質感！
隱藏版好物1.琺瑯食物保存容器
標榜異味及液體唔會外漏嘅「琺瑯食物保存容器」，玻璃製外部包裹著鋼、鐵、鋁等混合金屬嘅堅韌以及耐久性。容器打開蓋後可以直接放喺煤氣爐上或焗爐內加熱，亦可以當作一般保鮮盒直接放入雪櫃內保存。圓滑型四角設計唔單只容易清洗，要拎出拎入都相當方便。琺瑯材質耐酸、抗異味，蓋上嘅透氣閥亦可以增加食物密閉性，保存食物原有鮮味。
容器依照大小分為6個尺寸，收納時可以統一堆疊，節省空間得嚟又可以保持清爽整潔。望著潔白琺瑯質映照著五顏六色嘅食物，不單食慾大開，亦算係另一種色、香、味俱全嘅視覺饗宴吧！
隱藏版好物2.洗衣液/柔順劑
無印良品嘅洗衣液與柔順劑無添加任何香料、染色劑與漂白劑等非天然成分，主要使用椰子製成嘅棕梠油，洗完後可以自然分解，唔會對環境造成任何負擔。一如往常無印Style嘅樽身，採用最低限度包裝設計，簡約又不失時尚。連同補充裝在內，全系列洗衫商品井然有序一字排開，莫名地畀人一種氣勢磅礡嘅美感。
洗衣液適用於棉、麻及合成纖維，只需要用清水洗一次，髒油、污垢就立即會簡單洗走。因為係濃縮洗衣液嘅緣故，560ml容量溝水後可以使用約28次，CP值可以話係相當高。柔順劑則係除咗同洗衣液一樣含有相同原料外，更加入防止靜電成分，令洗過嘅衫唔會又乾又硬！
隱藏版好物3.矽膠料理湯匙
可炒、可攪拌、可用來分菜，集三項功能於一身嘅「矽膠料理湯匙」過去唔單只被多個日本電視節目及雜誌書刊大量介紹，亦憑藉時尚外觀而時常成為社交媒體上嘅料理主角！湯勺嘅耐熱溫度高達250度，把手則為180度。煮餸時，一時需要拎筷子，一時時又需要用炒菜勺，到咗上碟時又要再拎唔同湯勺分菜，淨係換煮食工具就已經花上唔少時間。而呢個時候，呢支萬用湯匙，就可以令每日廚房炊事唔再手忙腳亂。因為係黑色素材，亦唔使驚被色素過重嘅食材染色！
除咗炒餸用嘅料理湯匙外，其他矽膠系列產品都同樣大受好評。例如「矽膠果醬匙」，就可以幫您喺果醬就快用完時，可以隨著果醬罐身弧度彎曲，將內裡剩餘嘅果醬一滴不剩刮乾淨，達到毫不浪費嘅境界！
隱藏版好物4.萬能衣架
無印衣架依據功能唔同，設計亦會有所改變，其中又要數到「木製薄型衣架」與「鋁製衣架」最為實用。使用天然櫸木製成，扁薄造型、體積輕巧嘅木製薄型衣架，光滑表面方便您拎出拎入，即使未掛上衣服，木質舒適感亦彷彿可以令一成不變嘅衣櫃多一份清新。重點係衣架本身掛鉤能夠調整方向，適合隨心所欲變換吊掛位置，凹槽設計亦能夠防止衣服太過輕滑而掉落...，功能、設計都無可挑剔，您又有咩理由唔買返個先？
一體成型嘅鋁製衣架，同樣採用特殊形狀造型，令衣服唔容易滑落。尺寸分為肩寬33cm與45cm，前者適合兒童或女性窄肩衣服，後者則為男士用。改良式凹槽設計用嚟收納出街袋或吊掛肩帶式衣服都非常唔錯。
隱藏版好物5.攜帶型衣物用清潔滾輪
將尺寸縮到最細嘅「攜帶型衣物用清潔滾輪」攜帶方便，無論係大褸外套定裙上嘅毛線或黏附物，只需要輕輕一碌，衣服瞬間就會變得好似新買一樣！好物採用可拆式分解設計，尺寸僅有一部iphone6般大小，收納於手袋內都完全唔會佔用太多空間，去到邊碌到邊，隨時隨地都可以將衫上嘅惱人灰塵與髒污輕鬆搞掂！重點係好撕唔痴手，呢款去除衣物棉絮最佳神器，特別推薦畀屋企內有飼養毛孩嘅主人們！
參加重要會議或約會前，先將衫上嘅頭髮或頭皮清理一遍，維持整潔、得體外貌，保證您形象一定會更加分！
各位係咪驚覺原來無印竟然有咁多實用小物呢！？無論去幾多次都唔厭，仲要每次都驚喜連連，唔知下次又會咩「隱世」良品等著大家去發掘呢？
©妞新聞 www.niusnews.com
Comments