邊個話關西賞櫻只會去京都、大阪？兵庫縣內都有許多賞櫻景點，非常值專程前往！位在但馬地區「城崎溫泉」，唔單只係日本人最愛去嘅溫泉街之一，喺觀光客之間亦享有盛名。可能好多人都仲未知道，城崎溫泉亦係知名賞櫻景點。睇完文章，記得BOOKMARK低，列入下次賞櫻必訪清單，享受古老而療癒嘅溫泉和櫻花之美，順便品嚐但馬牛、松葉蟹大祭五臟廟！
一年之中觀光客絡繹不絕嘅城崎溫泉
講到兵庫縣溫泉勝地，「城崎溫泉」絕不能錯過。從奈良時代開湯至今，已經有1300年歷史。據說一開始係因為有人見到東方白鸛喺溫泉裡療傷，因而發現泉源嘅存在。除咗歷史悠久之外，城崎溫泉嘅溫泉街洋溢著一股濃濃嘅日本風情，亦係海內外遊客蜂擁而至嘅原因之一。
嚟到城崎溫泉，除咗享受溫泉旅館嘅設施之外，一定要體驗嘅就係「外湯巡禮」。溫泉街上7間公共浴場，氛圍、建築物、設備各異其趣，喺呢度來一趟「外湯巡禮」更能感受城崎溫泉嘅魅力。當地盛傳浴衣和木屐係正裝，各間旅館幾乎都會準備溫泉街散步用嘅浴衣，因此著住浴衣走動嘅遊客隨處可見。獨特氛圍和浸溫泉文化，讓城崎溫泉被評選為「最適合穿著浴衣散步嘅溫泉街」。
相機手機影唔停 城崎溫泉賞櫻景點
城崎溫泉花期約喺每年4月上旬至4月中旬。以下為你介紹城崎溫泉必訪嘅櫻花景點。
① 大谿川沿岸
大谿川位於溫泉街中心，沿岸柳樹搖曳生姿，可以體驗得到地道嘅日本風情。每到櫻花季節，炸裂嘅櫻花滿布河岸兩旁，與偶爾穿插嘅石橋構築成一幅美麗畫面，令遊客忍唔住駐足欣賞。櫻花季嘅尾聲，粉嫩櫻花花瓣散落於河面上，令大谿川變成一條粉紅色小河，堪稱難得一見嘅絕景。
② 木屋町通小路
木屋町通小路種有一整排櫻花樹。沿途有唔少古色古香嘅日式建築，以及紅色燈籠，漫步其中宛如身在日劇和電影場景！非常推薦你換上浴衣，喺呢度盡情捕捉精彩嘅每一瞬間，讓櫻花靚相全面攻佔你嘅手機、相機！
③ 城崎溫泉纜車、溫泉寺
去到溫泉街盡頭，可以搭城崎溫泉纜車上山。唯有搭纜車先可以由上而下欣賞一整片櫻花樹景致啊。你可以喺中途落車，參拜1300多年嚟守護著城崎溫泉嘅溫泉寺；或者係山頂站飲杯咖啡、欣賞米芝蓮綠色指南一星嘅美景。遇上好天氣仲可以眺望日本海。
④ 夜櫻
既然遠道而嚟，何不入住城崎溫泉歎返晚。夜晚嘅溫泉街打著柔美嘅燈光，醞釀出一股夢幻氛圍。平時已經夠迷人，去到櫻花季期間仲可以欣賞美麗嘅夜櫻。河面上嘅夜櫻倒映如像夜空中嘅繁星，熠熠生輝，展現出與白天不同嘅嬌媚姿態。
城崎溫泉必食但馬牛、松葉蟹
城崎溫泉美食多多，係不可錯過嘅饕客天堂。無論係鍾意肉食定係海鮮料理，喺城崎溫泉統統都可以品嚐得到，大飽口福。城崎溫泉位於兵庫縣北部、以盛產珍貴和牛品種「但馬牛」聞名嘅「但馬地區」，喺城崎溫泉可以品嚐到燒肉、牛扒、但馬牛可樂餅（又稱吉樂餅）…等絕品料理。
另一款必食美食就係「松葉蟹」。城崎溫泉緊鄰著日本海，有著各式各樣豐富嘅海鮮料理。尤其係松葉蟹，鮮美多汁、肉質彈牙，有唔少饕客專程遠道而嚟，就係為咗品嚐松葉蟹嘅好滋味。下次去到城崎溫泉，記得要去試一試但馬牛和松葉蟹喇！
Comments