最近幾年，日本有為數不少嘅居日越南籍人士。越南人就佔咗全體居日外國人約13%，而其中最多係越南籍嘅技術實習生。
今次等我地嚟分享喺FUN! JAPAN編輯部入面工作，出身於越南嘅小編「YURINA」嘅故事。佢因為媽媽工作關係，初中時就嚟到日本，至少就經歷住有別於一般居日外籍人士嘅日本學校生活以及日本文化。
移居日本嘅契機
我喺2009年、12歲時嚟到日本。差唔多差咗12年。以前，我嘅嫲嫲曾經以技術實習生嘅身分去日本，媽媽受到佢嘅影響，亦都嘗試去日本工作，之後同日本人父親相遇，再婚後就於日本定居。我嚟日本以前，就已經鍾意日本嘅動畫，由唱動畫主題曲嚟記日文，就算唔知歌詞係乜嘢意思，都可以唱到。小學時我就好鍾意《CardCaptor Sakura》(港譯：《百變小櫻MAGIC咭》)，到而家都好鍾意呢套作品。
喺越南人眼中嘅日本
日本，係為人所熟識嘅先進國家，以越南人嘅角度嚟睇，係一個非常嚮往嘅地方，經濟方面亦有說係「第一係美國，第二係日本」。而HONDA、SUZUKI、TOYOTA等車廠品牌亦係日本嘅代名詞。仲有一點好有趣，雖然越南人唔識日文，但大家都知道調味料「味之素（Ajinomoto）」呢個產品，而且家家戶戶都有用。
雖然辛苦，但得到身邊人照應嘅中學時期
嚟到日本後，入咗市公所介紹嘅中學讀書。學校位於外國人居住區域正中間，所以學生裡面都有好多係來自外國家庭。學校嘅老師會係課餘時間1對1教我地日文。
我喺中一時，理科、社會等學科時間係用嚟上1對1嘅日文。而數學、英語、體育等學科就同班上嘅同學一齊上。升上中二之後，就所有學科都同班上同學一齊上課。但係因為中一時無上到部份嘅堂，所以就需要借日本同嘅筆記，拼命咁溫習趕返落後嘅進度。仲會喺放學後或者星期六日，去免費教授日語嘅學校學習日文。中學呢3年因為要學嘅嘢好多，亦係最辛苦嘅時期。
充滿Culture Shock嘅日本校園生活
雖然日本嘅校園生活非常有趣，但因為有好多地方同越南唔同，所以其實最開頭真係好衝擊，唔習慣。舉例嚟講，日本人通常會集體行動，體育、理科等學科時間會一齊轉課室，有時候同學會問我「要不要一齊去廁所？」而喺越南就無咁嘅習慣；仲有就係日本學校有很多活動，打掃、文化祭、體育祭等。呢啲都係越南無嘅，所以處處都會覺得同越南唔同。例如喺運動會會出現嘅「騎馬戰」，我亦唔知係乜嘢，所以最初時總係會滿臉疑問咁想話「即係乜嘢？」
希望報恩 目標成為日本與越南之間嘅橋樑
我好鍾意國際交流，所以如果有機會可以活用自己嘅語言能力，做通譯・翻譯等工作嘅話，我非常想試吓，喺大學都有揀國際研究嘅堂。而喺大學4年級嘅時候，我一邊搵工，一邊喺FUN! JAPAN做Part-Time。由中學時嚟到日本，得到朋友、義工等周圍嘅幫助，令我學識日文，仲有好多好多嘅恩惠，所以我想可以回饋返，希望成為日本同越南之間嘅橋樑。
可以入到FUN! JAPAN工作，真係太好了！
大學時我都有修讀市場營運等科目，覺得而家嘅工作都可能會用得上呢啲知識。而家嘅工作環境，有來自唔同國家嘅人，一邊可以進行國際交流，一邊從事同海外有接觸嘅工作，正正就係我想做嘅事。加上FUN! JAPAN同我呢個新畢業嘅社會人一樣，係稍為新嘅一間公司，喺呢度會面對各種嘅新挑戰、新事物，喺呢間公司返Part-Time，令我想大學畢業之後繼續喺呢間公司努力落去。
畢業後踏入社會嘅第一份工作就係FUN! JAPAN。工作內容唔止係翻譯，仲會有採訪等，公司亦畀我挑戰好多唔同嘅工作內容。原本我對旅行無乜興趣，但因為開始咗做呢份工，令我愛上咗去旅行，成日心郁郁想去唔同地方實地睇吓。公司內有來自唔同國家嘅同事，對於鍾意國際交流嘅我嚟講，真係好愉快嘅工作環境。
給考慮嚟日本嘅朋友之建議
以我遇到嘅情況嚟說，來到日本之後，非常切身感受到「唔學習就追唔上身邊嘅人」，所以一直都拚命學習。加上日本係為人熟識嘅先進國家，越南人非常嚮往。越嚟越多由越南嚟日本嘅留學生、技術實習生，不過想嚟嘅話，唔多唔少都要學吓日文，至少要要基礎會話程度嘅日文比較好；喺日本仲有一啲免費嘅日語學校，可以去上堂，多同朋友傾偈，應該都可以令日文進步。嚟到海外，一邊接觸實際嘅生活環境，同周圍對話亦係學習方式之一。而由實用方面睇，多去超市、便利店等地方，使用日語溝通，會比較容易記得。剛開始就算完全唔識日文，周圍都一定有人肯幫忙的！
Comments