日本人姓氏（日語中可稱為「姓」、「名字」或「苗字」）於12世紀末開始普及，直至現時，日本國民皆會以「一姓＋一名」組合登錄戶籍。基本上，所有日本國民都會繼承祖先姓名，並將「家紋（標示家系、宗派或商號嘅圖紋）」世世代代流傳。
而呢篇文章，就會帶大家解構各日本姓氏來源，以及部分常見姓氏背後隱藏嘅意思。睇完下文介紹後，大家以後再見到日本人姓氏嘅時候，話唔定會有全新睇法呢！
日本人姓氏與名字的先後次序
日本人嘅姓名，可分為「姓（family name）」與「名（first name）」，並以「先姓後名」方式排序。比起「個人」，日本人更重視「所屬團體」，因此就以「所屬團體」作為姓名開首。
日本人姓氏歷史
日本人姓氏嘅歷史，最早可追溯至9世紀。當時姓氏屬於天皇所賜之物，只有貴族、武士等極少數貴族能夠使用自己嘅姓氏，而且唔能夠隨便更改。其後，姓氏文化逐漸於庶民之間普及，慢慢演變成區別每家每戶之用。
進入明治時代第3個年頭（1870年），隨著重視戶籍制度現代化嘅大藏省掌握主導權，國民從此就開始正式各自擁有自己嘅姓氏。
直至現代，法律層面上嘅「氏」，一般都會被稱為「姓」。
日本姓氏最初由來
踏入明治時代後，日本政府引入戶籍制度，各家族從此可以正式登錄「姓」與「名」。到底當時社會百姓係點樣決定自己嘅「姓」呢？主要分法，大概有以下7種：
日本姓氏由來：源自地名
以居住地地名而決定姓氏，部分例子如下：
- 伊東（いとう）：靜岡縣伊東市
- 稻垣（いながき）：三重縣津市地名
- 香川（かがわ）：神奈川縣茅崎市地名
- 葛西（かさい）：東京都葛飾區・江戶川區附近地名
- 諏訪（すわ）：長野縣諏訪市附近地名
- 相馬（そうま）：茨城縣南部地名
- 夏目（なつめ）：長野市地名
- 長谷川（はせがわ）：奈良縣櫻井市初瀨川附近地名
- 三浦（みうら）：神奈川縣三浦半島
- 水野（みずの）：愛知縣瀨戶市地名
- 渡邊・渡部（わたなべ・わたべ）：大阪市地名（現時已不存在）
日本姓氏由來：源自地形或風景
以所居住土地地形、或從居住地望到嘅風景而得來嘅姓氏：
- 山田（やまだ）、林（はやし）、山崎（やまざき）、森（もり）、山下（やました）：源自山間或森林
- 池田（いけだ）、小川（おがわ）、川崎（かわさき）、吉川（よしかわ）、廣瀨（ひろせ）：源自河川或水池
- 濱口（はまぐち）、入江（いりえ）、濱崎（はまざき）、濱（はま）：源自大海
- 井上（いのうえ）、清水・（しみず）、石井（いしい）、藤井（ふじい）、今井（いまい）：源自打水場或取水地方
- 宮崎（みやざき）、宮本（みやもと）、宮田（みやた）、寺田（てらだ）、宮下（みやした）：源自神社寺廟
日本姓氏由來：源自方位或方角
與源自地形嘅姓氏一樣，為表明同一塊土地內各家各戶嘅位置方位，而將「東西南北」加入成為姓氏一部分。「前後奥」、「上中下」、「左右」等指示方向嘅漢字亦包含在內。
- 西村（にしむら）：推測源自村莊西方
- 北川（きたがわ）：推測源自河川北方
- 前田（まえだ）：推測源自田野前方
日本姓氏由來：源自職業
日本姓氏當中，亦有多個源自公職嘅名字。
- 犬養（いぬかい）、鳥飼（とりかい）、鵜飼（うかい）：因飼養狗隻、鳥隻、鵜鶘而得名
- 大藏（おおくら）：因管理「藏（指儲存庫或武器庫等）」而得名
- 庄司（しょうじ）、公文（くもん）：因管理莊園而得名
日本姓氏由來：繼承藤原氏之「藤」字
藤原氏曾於平安時代掌權國家，因此其子孫自此就一直沿用「藤」作為姓氏一部分，亦係日本最多擁有共同漢字嘅姓氏。
- 後藤（ごとう）
- 內藤（ないとう）
- 加藤（かとう）
- 伊藤（いとう）
- 齋藤（さいとう）
日本姓氏由來：源自佛教經典
採用佛教用語或經典內出現之字詞而得來嘅姓名。
- 釋（しゃく）
- 梵（そよぎ）
日本姓氏由來：獲主君賜封
於戰爭中取得功績時，獲主君表彰而獲封。
- 伊木（いぎ）：織田信長攻下美濃伊木山城後，向2名取得功績嘅家臣贈予
- 小粥（こがゆ）：靜岡縣市民向德川家康獻上粥品後而獲賜
- 砂糖（さとう）：江戶時代市民向貴族、主君獻上砂糖後而獲賜
日本人改名方法
有別於「姓氏」，自古以來日本人改名嘅方式都與年代與流行息息相關。從現代日本人父母為子女改名嘅習慣中，都可以見到根據該出生年分著名人士而改名嘅傾向。想知更多有關日本人近幾年嘅人氣名字嘅讀者，可參考以下相關文章，我哋將會為您以排行榜形式介紹！
Comments