長野縣為日本全國坐擁第2多溫泉數量嘅縣份，縣內溫泉數量多達210處！（資料截至2018年）。長野縣處處溫泉，但泉質、風景各有千秋，唔知應該點揀好？唔怕！呢篇文章已為您整理好必浸溫泉懶人包，跟住去就包無出錯！
長野縣溫泉及特徵
長野縣溫泉由歷史地區至絕色美景皆應有盡有，因此以下將按長野縣觀光地區分門別類，為大家介紹推薦特色溫泉！
（6大觀光地區如下：「北信濃」、「日本阿爾卑斯」、「東信州」、「諏訪」、「木曾路」、「伊那路」。）
北信州地區：①野澤溫泉
野澤溫泉係一處於700年前被發現嘅溫泉（※有關歷史至今依然眾說紛紜）。遊客可免費隨意遊覽被稱為「外湯」嘅13座公共設施、使用溫泉街上多座足湯，又或將行程進一步擴展至野澤溫泉滑雪場。即使係滑雪季以外嘅green season，您都可以盡情體驗能夠飽覽野澤溫泉景色嘅展望台、以及種有四季花卉嘅花園等各式戶外樂趣。
延伸閱讀：
北信州地區：②湯田中溫泉
於公元7世紀開湯嘅湯田中溫泉，位置鄰近屬於湯田中澀溫泉地區玄關口嘅湯田中站，交通非常方便。此處亦係日本俳人（俳句作家）「小林一茶」份外鍾情嘅溫泉地，因此溫泉街上隨處都可以見到與詩人相關嘅句碑。
鄰近觀光景點為地獄谷野猿公苑，作為全球唯一一處可以見到野生馬騮浸溫泉而聲名大躁！
延伸閱讀：
日本阿爾卑斯地區：白骨溫泉
白骨溫泉最大特色，就係溫泉水呈不透明乳白色。泉水不單可以直接飲用（※僅限指定地方之泉水），遊客們亦會趁早餐時段，一嚐使用溫泉水製成嘅名物料理「温泉粥」𠻹。
歷史約400年嘅溫泉自古以來深受眾多日本文化人愛戴，日本人普遍相信泉水有助強身健體，因此亦有唔少人會到此祈求疾病、傷患痊癒呢。
延伸閱讀：
東信州地區：別所溫泉
別所溫泉為信州（長野縣）最古老溫泉之一，起源最早能追溯至公元800年左右。泉質屬於弱鹼性，對肌膚活性化及消除疲勞等功效非常顯著。
嚟到別所溫泉，遊客指定動作必定係參觀溫泉街！手信舖、食肆餐廳雲集不在話下，您亦可以到「上松屋」或「中松屋」等旅館，租借外出用嘅繽紛浴衣，著上浴衣於溫泉街內散步。
此外，別所溫泉鄰近多座神社、寺廟、經堂等歷史文化景點，當中包括除厄觀音「北向觀音」及長野縣首個國寶「安樂寺八角三重塔」等等。
諏訪地區：上諏訪溫泉
上諏訪溫泉泉水湧出量為全國數一數二。受惠於豐富泉水湧出量，附近多間住宿設施都能夠提供掛流式溫泉，住宿可以經常都浸到最新鮮嘅溫泉水！
上諏訪溫泉另一特色，就係大大個廣闊諏訪湖絕景就喺眼前。過半數住宿設施都能夠眺望諏訪湖美景，當中甚至更有旅館與諏訪湖彷彿合為一體，住客身在其中就如置身湖內。當中又以歐陸風格建築嘅「片倉館」甚為著名，館內設有最多能夠同時容納100人浸溫泉嘅「千人風呂」，外在美與內在美兼備！
木曾路地區：木曾福島溫泉
木曾福島溫泉位處御嶽山山麓宿場町內，並以昔日前往御嶽修行嘅古人所使用嘅秘境溫泉「二本木之湯」作為源頭，泉水對割傷、皮膚病等甚有功效。
區內除咗有提供住宿服務嘅旅館，亦有多間提供即日來回浸浴嘅設施。
伊那路地區：昼神溫泉
昼神溫泉為阿智村內一溫泉地，以阿智川沿岸溫泉旅館與漫天星空絕色美景作為當地代表景色。
昼神溫泉泉質屬於鹼性單純硫黃，有助去除肌膚老舊角質，打造幼嫩膚質，而內含豐富鈉離子及氯離子則有助保濕，貪靚一族絕對不容錯過！
延伸閱讀：
尚有更多絶景溫泉待您發掘！
長野縣溫泉勝地又點只得咁少？尚有更多宏偉大自然絕景溫泉待您發掘，無論係留宿一晚或即日來回都非常適合！
延伸閱讀：
Comments