12月31日係一年嘅最後一日，日本稱為「大晦日（除夕）」。喺呢日入面，日本有啲自古傳承至今必須舉行嘅儀式同風俗習慣。今次就為大家介紹大晦日（除夕）嘅由來，以及日本過除夕有乜嘢特別方式！大家記得做定功課，今後有機會去日本過年時，就可以玩得更深更盡興！
關於「大晦日」
大晦日係指每年新曆12月31日。「晦日」呢個詞語喺舊曆入面係代表「每月嘅最後一日」，而一年嘅最後一日，亦即係一年最後一個月嘅最後一日，喺日本就稱之為「大晦日」。雖然一般用新曆時唔會講「晦日」，但一年嘅最後一日就繼續沿用「大晦日」嘅稱呼。
敲響除夕鐘
除夕敲鐘係佛教儀式，會由12月31日晚上敲到新年1月1日元旦，跨夜敲鐘。喺呢段時間敲響寺院嘅鐘108次。大多數嘅寺院會都會喺新年前敲107次，然後踏入新年後敲最後1次，咁樣嘅做法亦有破舊迎新嘅意思。而喺除夕夜敲鐘，據說能夠將所有煩惱丟棄喺舊嘅一年，唔會帶到新年。點解要敲108次呢？理由眾說紛紜，當中最為熟悉嘅講法係，因為人有108個煩惱，每敲一次鐘就消除一個煩惱，所以就要敲鐘108次。
食跨年蕎麥麵
「跨年蕎麥麵」係指12月31日晚上過年前要食蕎麥麵。據說由江戶時期就有咁嘅習慣，有好意頭。點解要喺大晦日食跨年蕎麥麵呢？原來跨年蕎麥麵有好多吉祥好意頭嘅象徵。例如「蕎麥麵麵條細又長，代表長壽」、「蕎麥麵容易斷，象徵斬斷今年嘅厄運」、「蕎麥嘅成分可以去除身體內毒素」、「家族之間嘅緣分能長長久久」等等。
大掃除要喺大晦日結束前掃完
一到年尾大家都會想到要大掃除，要記得最遲除夕就要打掃得乾乾淨淨。大晦日呢日，係一年最後一次打掃，日文稱為「掃き納め」。而如果喺元旦打掃，據說會掃走福氣，為咗唔好帶埋今年嘅污髒至新年，記得要趕喺過年之前掃得乾乾淨淨。呢個日本習俗同香港嘅都幾似。
大晦日浸浴 稱為「年湯」
喺大晦日當日浸浴，被稱為「年湯」。代表洗淨一年嘅污垢之餘，仲代表要乾乾淨淨咁迎接新年，有啲人為咗「年湯」，就算屋企有浴缸都唔浸，要專登搵個大浴堂，優閒舒服咁歎個浸浴。
日本嘅「大晦日」除咗上面介紹嘅活動之外，仲會有好多人選擇喺電視機面前收看《紅白歌唱大賽》、或是近年喺澀谷大十字路口等繁華熱鬧地區，都會舉辦大除夕倒數迎新年活動，雖然唔係傳統跨年習俗，近幾年已成為新的跨年文化，如果有機會喺除夕新年期間去日本旅行，一定要體驗吓日本特別嘅過年活動啊。
Comments