台灣—一個總人口約2300萬人、2019年遊日人次佔總人口約五分之一左右（約489萬人次）嘅國家。2011年東日本大地震時，台灣更向日本捐贈250億日圓，金額屬全球捐款之冠，喜愛日本、關心日本嘅台灣人相當多，就好似今次文章主角，就係來自台灣、已經喺日本生活7年嘅Vince。
受日劇影響 開啟日文學習之路
Vince就讀高中時，因為接觸到Kinki Kids堂本剛所演嘅日劇而喜歡上呢位日本明星，之後為咗要學識唱Kinki Kids嘅歌曲而自學五十音，因而開啟日文學習之路。一直到考上大學、就讀旅遊相關學系時，眼見除咗有關觀光嘅專業知識之外，語言亦係相當重要嘅一部分，因此就喺第二外語「英語」之外，開始鑽研第三外語「日語」。經過一番努力，Vince喺短短半年內就成功考得日本語能力試驗N2資格、並再喺半年後考取N1，又於大學期間考獲英語及日語領隊資格。畢業後，Vince第一份工作為酒店櫃台職員，期間有機會接待多位日本客人，當時同日本客人對談已不成問題，加上東日本大地震發生後，喺電視上見到即使日本人遇上災難都依然有秩序，令佢相當感動，因此下定決心到日本生活...
2013年決定辭工 啟程飛往多年來一直嚮往嘅日本！
「我當初有考上一間觀光專門（專修）學校嘅全額獎學金，但專門學校學位只係副學士，因此令我有少少猶豫。最後因為有屋企人經濟支持，於是決定喺日本進修更高學歷，所以喺選擇日語學校時，就鎖定有升學班嘅語言學校『東京日本語學校(長沼學校)』。在學期間，輔導老師向我建議，如果唔想寫論文做研究的話，可以考慮日本MBA(專門職大學院)。所以我最後揀選嘅MBA，其實係無需工作經驗都可以就讀，因為有啲學校嘅MBA規定一定要有在日工作經驗先可以就讀，情況就類似台灣嘅在職進修課程。」
菜鳥VS老鳥 MBA課程就如社會縮影！？
「我對行銷有興趣，所以最後選擇就讀校舍位於東京‧表參道嘅青山學院大學。由於行銷其實無一個正確答案，掌握如何從周圍事物、流行觀察先係最重要，表參道附近正好有多個知名大牌子進駐，我覺得一定可以有助我知道最新趨勢，所以當初就完全無考慮市中心以外嘅學校。另一個選擇青山學院嘅原因係，每日落堂後可以立即去行街！結果就讀MBA嘅兩年時間，每日早上7.8點去學校，離開學校時都已經晚上10點，而且除咗星期一到五都要上堂，有時候甚至連星期六都要，仲要事先預習案例先可以喺課堂討論…加上MBA同學大部分都係已經喺職場打滾好幾年嘅上班族人，我只能夠用課餘時間努力讀書，彌補不足地方以便追上大家，同我原來想像中嘅美好學生生活完全不一樣呢。」
日本應屆畢業生搵工 要過五關斬六將！
「日本應屆畢業生搵工前都要先聽說明會（簡介會），又要經過書面審查，歷經好幾次面試，最後先會知道自己會唔會合格，過程瑣碎又冗長。而且剛入到公司時嘅工作內容大部分都係綜合職，無辦法直接從事自己鍾意嘅工作內容。不過我應徵上嘅第一份工作，從面試到錄取只不過用咗一個禮拜左右嘅時間，其實喺日本企業當中都算係非常罕見。我一開始被分到工程師部門，後來就被調派到會直接面對客人嘅諮詢部門。「
於FUN! JAPAN將大學與MBA所學專業派上用場
「後來喺MBA教授介紹下，得知FUN! JAPAN呢間公司。公司係一間主要介紹日本旅遊、觀光資訊嘅網路媒體，同我大學專科所學相同。FUN! JAPAN職位主要需要負責嘅行銷、廣告、宣傳，又同我喺MBA所學相符，加上前一份工作後來轉調到諮詢部門，跟客戶有一定溝通與接觸，既可以活用當時工作，亦可以發揮大學與MBA所學嘅專業，就決定轉換人生跑道嚟到FUN! JAPAN。」
「我嘅部門好有團隊感覺，大家互相都會分享失敗例子與成功例子，上司亦會經常跟下屬傾計，分享最近工作上有無唔順利嘅地方等。雖然工作好忙，但係就好充實。例如係採訪、寫文章等編輯部嘅工作也都要接觸，因為咁樣我哋先可以同外面客戶介紹公司嘅業務內容。」
有咩建議畀今後有計畫嚟日本工作嘅人…？
「唔好抱持著玩玩吓嘅心態，要做好覺悟。其實我喺MBA畢業後，搵工並無好順利。有一次有朋友同我講，如果淨係抱持著玩玩吓嘅心態，係一定唔會搵到好工。日本社會競爭非常激烈，加上外國人競爭對手係全部同樣身處日本嘅外國人，如果無付出一定努力，只係抱持著玩樂心態嚟日本工作的話，可能會碰到好多挫折。另外，各位亦要放棄好多事情，例如係同台灣親朋好友分開與放手安逸嘅生活，因為喺日本隨時遇上失業、錢唔夠用或被歧視等情況。仲有，人脈非常重要，俗話有云「出外靠朋友」，廣結善緣都會對自己喺海外生活非常有幫助㗎。」
Comments