高達迷必到朝聖地！秋葉原GUNDAM Café TOKYO BRAND CORE體驗型娛樂主題餐廳

GUNDAM Café TOKYO BRAND CORE係一間剛於2020年7月完成店舖擴建並重新開幕嘅日本國內第5間GUNDAM Cafe旗艦店。店舖位處東京都秋葉原，不單吸引高達迷，就連日本全國動漫粉絲都爭住要嚟朝聖！現實世界與高達作品故事舞台於店內相互交錯，保證鍾意高達嘅您一定會流連忘返！

GUNDAM Café TOKYO BRAND CORE精彩節目多籮籮

GUNDAM Café TOKYO BRAND CORE由4大區域構成，以下就帶大家逐個區域遊覽，充分感受高達作品世界觀！

以宇宙戰艦為設計概念嘅餐廳內，螢光幕會放映宇宙空間內嘅機動戰士映像，身處內裡就有如從戰艦內往外眺望外太空一樣！

美食方面，當然唔少得主題餐飲！菜單已為您準備靈感源於原著戰艦食物嘅飛行員午餐，以及以登場角色為藍本嘅pizza等多款「相機食先」打卡必備料理。

同場必睇嘅，仲有可以食到由人氣角色構思嘅體驗型套餐菜單嘅特別活動。原著角色會透過螢光幕向顧客交流互動，帶領您走進主題café獨家故事。現實世界與虛擬映像互相交錯，自問係粉絲嘅您一定會睇到相當入神！（※活動必須事先預約）

將自護公國軍世界結合體驗型餐飲嘅嘅餐廳內設有2款座席為您打造「成為自護軍」嘅聲色享受。

客人用餐時，「互動投影餐墊」會模擬出戰鬥場景，而設置於店內中央嘅餐枱上，更會出現虛擬空間，盛載料理嘅碗碟上會投影出機動戰士！晚餐途中，您甚至會遇上地球聯邦軍對座位發動總攻擊，近在眼前嘅動作場面逼真得嚟亦相當動魄驚心！

體驗型晚餐另一重點，必要數到「AR任務餐墊」。基連總帥會向客人發出任務指令，而在座嘅您就需要透過AR功能挑戰。完成全部5個任務的話，就可以獲得獨家勳章當作粉絲收藏或旅行紀念品，真正「又食又拎」！

據聞隨著座席及食物不同，演出仲會有所變動，真係嚟幾多次都唔會厭！

門外嘅「FortuneLatte Cafe」係一間外賣飲品專門店。有別於一般飲品外賣，主題café出售嘅當然唔只普通caffe latte或珍珠奶茶咁簡單啦！Latte包裝或透明樽裝上會印有高達角色圖案，粉絲拎上手一刻肯定勁興奮！

慶祝角色生日嘅「Birthday Fortune Latte」或飲品上嘅高達圖案一切都係隨機，未到拎上手一刻都唔知會收到咩圖案！期待受到製成品嘅興奮心情，令到等待嘅時間都變得特別快過。

官方商店內出售多達360款限定周邊與聯乘產品，GUNDAM迷定必買到失心瘋！除咗店舖獨家限家款式以外，日本經典零食菓子及全國各地特產、與傳統工藝品合作嘅聯乘都非常值得敗家！

印有機動戰士包裝嘅周邊，又或與石川縣代表瓷器「九谷燒」嘅聯乘作品，買嚟做手信就fit晒！