位於東京台場嘅富士電視台，已於2019年春天邁入開台60週年，可謂日本最著名嘅民營電視台之一。富士電視台總部嘅大樓內有一部分區域對外開放，歡迎各位遊客喺到體驗富士電視台嘅特色以及購買限定商品。
日本多套著名電視劇與綜藝節目皆由富士電視台出品
富士電視台過去曾推出多套著名電視劇，例如係《HERO》、《CODE BLUE 緊急救命》；而目前正於日本國內播出嘅《真的假的！？TV》、《痛快TV 爽快JAPAN》等綜藝節目亦相當受歡迎；連同大人細路都鍾意嘅動畫《ONE PIECE（海賊王）》與《櫻桃小丸子》等在內，以上多部耳熟能詳、膾炙人口嘅作品，通通都係出自富士電視台！
富士電視台開放參觀區域
富士電視台嘅總部大樓有5層樓對外開放，例如係25樓嘅球體瞭望台「HACHITAMA」與24樓球體內嘅「鬧鐘天空」，後者同時亦係資訊節目《鬧鐘TV》嘅攝影廠。7樓為可以舉辦活動嘅自由空間會場 Fujisan no Yoko、Fujisan庭園與販售多款周邊商品嘅富士電視台周邊店Fujisan；5樓Gallery則係展示出富士電視台最熱門節目、電影展示會以及富士電視台企業資訊。最後，1樓劇場大廳內更有出售只有富士電視台內先買得到嘅獨家限定商品。
建築物外牆上非常搶眼嘅銀色球體設計，係由日本代表性建築家・丹下健三親自設計，屬於大師創作後期嘅代表作品。
25F球體瞭望台「HACHITAMA」
位於富士電視台總部25樓嘅球體瞭望台，每日都會吸引大批遊客到訪，儼如富士電視台象徵。各位可以喺到欣賞到270度臨海副都心嘅風貌。
同一層樓中，仲有可以購買到HACHITAMA商品與富士電視台吉祥物周邊商品嘅「HACHITAMA SHOP」，有機會行過的話絕對唔可以錯過！
如果喺行程規劃上無法安排台場觀光行程都無問題。事關喺東京車站、東京晴空塔以及富士電視台官網「e！shop」等，都可以買到富士電視台嘅商品。
- 營業時間：11：00～17：00 ※目前縮短營業時間
- 定休日：每週一（適逢公眾假期則順延隔日）
- ※「HACHITAMA SHOP」從2020年8月份開始暫停營業
24F 球體內「鬧鐘天空」
「鬧鐘天空」係資訊節目《鬧鐘TV》實際使用過嘅攝影廠，現時已開放畀公眾入場參觀，並展示出過去曾參加錄影嘅嘉賓嘅簽名板。
※如有節目錄影等情況則不對外開放
- 營業時間：從2020年8月份開始暫停開放
7F Fujisan庭園
Fujisan庭園部分時間會變身成為活動會場，有時候又會變成演唱會舞台嘅屋頂庭園。從寬敞開放嘅庭園抬頭向上仰望，您甚至會直接見到球型瞭望台「HACHITAMA」呢。
富士電視台周邊店 Fujisan
位於露天庭園內嘅富士電視台周邊店「Fujisan」出售富士電視台相關節目、電影、動畫等相關周邊商品，部分時間亦會舉辦各種活動。
營業時間：11：00～17：00 ※目前縮短營業時間
- 定休日：不定期
自由空間‧ Fujisan no Yoko
同樣位於露天庭園範圍內嘅，仲有「自由空間‧ Fujisan no Yoko」。空間主要被使用於舉辦各式各樣當紅偶像嘅演唱會、綜藝節目錄影，以及其他清談節目、記者會、活動餐廳場地等，係一處集多功能於一身嘅空間，有唔少活動都會喺到進行～
- 營業時間：從2020年8月份開始暫停營業（詳情請上官網查詢）
5F 富士電視台 Gallery
富士電視台 Gallery係一處展出咗富士電視台人氣節目與文化傳遞嘅新設施。除咗展示平成時代(1989年1月8日 – 2019年4月30日)逢星期四夜晚10點播出嘅「119部」電視劇作品海報視覺設計之外，同一樓層嘅Gallery Shop內亦有出售原創周邊商品。此外，遊客仲可以參加社交平台宣傳活動，獲得原創周邊，活動非常豐富！
同場另外有一座「GACHAPIN與Mook博物館」，展出內容圍繞於1973年開播、目前已停播嘅兒童教育節目《打開吧！POKIKI(ひらけ！ポンキッキ) 》經典場景與珍貴佈景設計圖。最特別嘅係，內裡運用咗AR實境技術令過去曾於節目中登場嘅「GACHAPIN與Mook」再次現身，遊客可以喺合影區影紀念照～
營業時間：11：00～17：00（最後入場時間為16：30）※目前縮短營業時間
- 定休日：每週一（適逢公眾假期則順延隔日）
- GACHAPIN與Mook博物館入場費：一般（高中生以上）400日圓；中小學生100日圓
1F 富士電視台 劇場大廳
富士電視台1樓劇場大廳空間高挑開揚感十足，兩側為咖啡店露天座席，範圍內亦設有舉辦試映會等活動嘅多功能劇場。
LAWSON便利店
遊客可到富士電視台內嘅LAWSON便利店購買電視台原創限定商品。
營業時間：9：00～18：00 ※目前縮短營業時間
- 公休日：全年無休
海螺小姐 Sazae-san商店
日本唯一一間販賣海螺小姐(Sazae-san)商品嘅專賣店。內容無需多作介紹，店內早已為您準備好多款海螺小姐原創商品與甜品，而且門口仲有販賣新鮮出爐熱辣辣嘅「Sazae-san燒」啊。
營業時間：11：00～17：00（目前僅週六日、公眾假期營業） ※目前縮短營業時間
- 定休日：全年無休
恰恰特快車商店＆富士電視台吉祥物商店
鐵路CG動畫「Chuggington（恰恰特快車）」全世界唯一周邊商店，內裡設能體驗乘坐恰恰特快車嘅遊戲空間以及嬰兒尿布更換室，當然唔少得只有呢到先買得到嘅富士電視台限定商品啦！
營業時間：11：00～17：00（目前僅週六日、公眾假期營業） ※目前縮短營業時間
- 定休日：全年無休
富士電視台營業時間、入場費用與交通方式
- 地址：東京都港區台場2-4-8
- 交通方式：乘搭百合鷗線到「台場站」，徒步3分鐘；乘搭臨海線到「東京電訊站」，徒步5分鐘
- 營業時間：11：00～18：00（每週一休館 ※適逢公眾假期則順延隔日休館）
- 各設施營業與定休時間或會有差異，正確時間請上官網確認
- 入場費用：
- 基本免費(以下除外)
- 25F球體瞭望台「HACHITAMA」與24F「鬧鐘天空」需另外購買入場券，一般（高中生以上）700日圓
- 5F「GACHAPIN與Mook博物館」，一般（高中生以上）400日圓；中小學生100日圓
Comments