「東京御台場 大江戶溫泉物語」係東京都內一間元祖溫泉主題樂園。集天然溫泉、提供多款美食嘅美食區、江戶風情「緣日」（指與神佛有某種緣份，用於進行供養及祭祀嘅日子）主題區於一身，就算玩足一日都唔會厭！以下馬上為大家介紹，適合即日來回嘅溫泉設施嘅玩樂攻略！
東京御台場 大江戶溫泉物語推薦必做清單
東京御台場 大江戶溫泉物語內設有採用天然溫泉嘅風呂及足湯、能夠體驗日式祭典氣氛嘅「緣日」主題區，以及雲集多間食店嘅美食廣場等，玩樂方式無限大，非常適合情侶拍拖，又或約埋三五知己一齊入場玩足成日！
温泉
首先要介紹嘅，一定係浸溫泉！多種特色風呂溫泉包括「大江戶溫泉」內被稱為「黃金之湯」嘅必浸褐色溫泉，又或由日本著名景觀設計師負責設計露天風呂嘅「江戶之庭」等，各位「名泉之友」一定要把握機會浸個夠本！
另一方面，歡迎入場人士著住浴衣、於廣闊日本庭園中浸腳嘅足湯亦係必做to-do list！例如花瓣飛舞嘅「花彩足湯」(僅限週末舉行)，就係場內一大代表性「打卡」皇牌景點。庭園於入夜後，更會點燈，呈現出夢幻氛圍。
美食料理
美食廣場內，則雲集著和食、甜品等多款特色美食專門店，由正宗日本料理、至適合浸完溫泉後小酌一杯嘅居酒屋，又或提供可麗餅（crepe）及班戟等甜品都一應俱全，總有一間啱您心水！
緣日體驗
遊客只要嚟到東京御台場 大江戶溫泉物語，就一年365日都有機會可以體驗「緣日」！巨型「櫓」由燈籠裝飾，著上浴衣於屋台林立嘅「廣小路」內散步，想要感受最地道嘅日本風情就係咁簡單！
官方已為各位準備好款式豐富嘅浴衣與腰帶，有機會的話記得一定要揀返套心水浴衣瘋狂打卡影相～
住宿設施
遊客如有需要，亦可選擇下榻於東京御台場 大江戶溫泉物語內附設嘅住宿設施。房型由男性限定嘅膠囊太空艙，至和室、雙人床洋室、附帶露天風呂嘅特別室等都應有盡有。雖然您亦可以於場設置嘅休息處（深夜2:00後使用的話需要另外追加2,000日圓(不含稅)）過夜，不過如果想好好唞返晚的話，編輯部都係推薦入住住宿設施會比較好呢！（一般情況下必須事先預約）
東京御台場 大江戶溫泉物語營業時間與入場費
東京御台場 大江戶溫泉物語營業時間為早上11時至翌日早上9時。入場費為成人平日2,380日圓、週末及公眾假期2,580日圓、特定日子2,680日圓（※資訊截至2020年10月、以上價格全為不含稅價格）。晚上6時後入場費會較為便宜，因此亦推薦為東京一日遊劃上完美句號！
東京御台場 大江戶溫泉物語交通方式
如欲前往東京御台場 大江戶溫泉物語，遊客可以選擇乘搭免費接駁巴士或鐵道電車。當中以免費接駁巴士最為方便，巴士往返東京站・品川站・新宿站・錦絲町站・淺草站・上野站・東京Teleport站・江東區等地出發，無需要轉車就可以直接抵達御台場大江戶溫泉！
景點資訊
- 名稱: 東京御台場 大江戶溫泉物語
- 地址: 東京都江東區青海2-6-3
- 交通: 乘搭免費接駁巴士、或東京臨海新交通百合海鷗號「電信中心站」徒步約2分鐘
- Wi-Fi: 有
- 對應語言: 英文・中文・韓文 ※館内小冊子形式
- 購票方式: 無需事先預約、於離開時一次過付款
- 信用卡: VISA, Mastercard, JCB, Diners Club, AMEX, 銀聯
※恕不接受身上有紋身或彩繪圖案人士進場
※開放時間或會因新冠肺炎疫情而作出變動，出發前請先參閱官方網站最新資訊。
Comments