【東京台場】好玩唔玩，玩屎？！象徵日本Kawaii文化新景點「東京便便博物館」

東京便便博物館，係一間全新體驗型博物館，從東京台場宣揚「MAX便便可愛世界」日本文化，向全世界提供新奇（或獵奇？）娛樂體驗。不分國籍年齡，只要係人都會「做大事」，因此東京便便博物館就決定要畀大家欣賞、觸碰、拍攝、盡情把玩便便！

關於便便博物館

東京便便博物館係一座以便便為主題嘅最先進娛樂空間。最初只於橫濱「橫濱便便博物館(目前已結束)」作為期間限定活動展出，殊不知展覽於短短約2個半月時間內，一共吸引超過10萬進場人數，因此台場便便博物館就順理成章開啟第二輪活動，2019年8月於東京台場正式開幕！

東京便便博物館由4大區域組成—從巨型便便噴泉噴發出便便模型嘅「便便廣場」；透過得意又閃耀發光便便為遊客打卡影相嘅「便便拍照區」；向參觀人士傳授世界各地便便知識嘅「便便智育區」，以及可以暢玩各種便便相關遊戲嘅「便便接觸區」。

如果一般風格嘅打卡方式已經無法滿足到您，咁呢個夠晒「省鏡」嘅打卡空間，就保證可以滿足您曬靚相嘅願望！由空中交錯飛舞嘅便便，至閃閃發光嘅便便等應有盡有，您都不妨試吓影出各式各樣嘅「便便靚相」！

遊客可以於區內暢玩體感遊戲，盡情踩踏投影於地板上嘅便便，又或參與復古風格等眾多遊戲，激發潛藏童心。就連大人都可以搵返赤子之心，盡情享受、大玩特玩！

充滿學識嘅區域絕對能夠激發您求知好奇心。您不單只可以鑑賞由知名人士繪製嘅便便，亦可以試畫專屬於自己嘅便便，或者欣賞世界各地嘅嘅便便產品。

工廠日以繼夜地製作著便便博物館內嘅各種便便，同場亦會販售博物館獨家限定便便商品。

便便競速、與便便相戀、擊沉便便…一連串遊戲真係會令人越玩越上癮！得到高分嘅時候，甚至會比便便順暢時來得更加爽快！？

由便便博物館守護神・UNBERTO所鎮守嘅區域，亦即係所謂嘅「便便Power Spot（能量景點）」。據聞守護神與神秘宇宙空間相連，會令人瞬間便意湧上心頭…？

※依當天預約狀況，亦有可能會販售即場門票（資料截至2020年10月）

如欲前往便便博物館，可以乘搭臨海線「東京電訊站」或百合鷗線「台場站」下車後徒步前往博物館。從「東京電訊站」徒步約3分鐘，「台場站」徒步約5分鐘。