東京嘅有明地區有個亞洲最大的微型博物館「SMALL WORLDS Miniature Museum」（東京迷你世界博物館），於2020年作為東京新景點開幕，並於2023年3月進行翻新。小編為探索翻新後嘅升級亮點和人氣「秘密」，決定去進行第二次採訪！即刻睇睇魅力滿載嘅「SMALL WORLDS Miniature Museum」有咩必睇精彩位同點玩先玩得盡興啦！
順帶一提，有明地區鄰近台場、豐洲等東京知名旅遊景點，下次去東京旅行時，可以順路去埋朝聖啊。
「SMALL WORLDS Miniature Museum」翻新重點
「SMALL WORLDS TOKYO」於2020年開業，樓高三層，總面積達7,000平方米。設施希望大家能享受自己發掘新事物的喜悅以及同人分享的樂趣，以「讓人發現、發掘」的博物館為概念，將其升級為亞洲最大型嘅「SMALL WORLDS Miniature Museum」。
今次，小編再次造訪「SMALL WORLDS」，距離上次已經有三年時間。為咗令人可以更加集中觀賞微型（迷你模型）作品，微型博物館整體以黑色作為基礎色調。以下介紹一下小編去完之後體驗到翻新後有咩唔同咗！
- 館內每一個細節位都有升級，各處增加多個迷你模型嘅展示同「探索！」體驗，亦調整觀賞微型作品嘅角度和距離感，可以更迎距離欣賞作品。
- 使用CG技術提高影像投影品質、由日本聲優進行旁白配音、使用實際現場錄音嘅音效等，皆為室內型博物館特有嘅演出效果，增加真實感令人可以更投入微型世界。
3種享受「微型世界」的玩法
博物館內處處都設有精彩嘅迷你模型，等待您嚟發現無數驚喜。可以與同伴一同欣賞、瘋狂拍攝等，玩法多多！
來探索吧！
「SMALL WORLDS」嘅展品當中其實隱藏著無數人物、動物等等迷你模型，當你逐一發掘去搵出嚟時都幾有樂趣㗎！另外，透過影像和音效令光線產生變化，每個區域嘅早、午、晚「場景」從而轉換，令人可以喺同一個地方體驗到不同場景。
而且，唔單止可以欣賞迷你模型世界中嘅建築，仲可以仔細啲望埋立體人物模型等，幻想一下人物同佈置相關嘅「故事」，絕對別有一番樂趣！
來攝影分享吧！
運用唔同角度去拍攝迷你模型，話唔定可以影到好似跳入咗微型世界入面咁嘅相同影片，創作屬於自己獨一無二嘅「作品」！然後將呢啲吸睛作品開心「Share」到社交媒體，打卡「呃Like」！
來體驗並享受吧！
結合尖端科技製作成「活動式迷你模型世界」、「不妨試試按下按鈕」等令人驚喜嘅互動元素，無論係大人抑或係小朋友都可以盡情享受親身體驗嘅樂趣，唔只用肉眼觀賞。另外，仲可以製作自己嘅「3D人物模型」、「迷你模型製作工作坊」、「按主題尋找被隱藏的迷你模型」等有趣活動，提供多樣化嘅體驗型互動娛樂。
若要參觀所有展示作品，建議預留約2小時時間，但如果想仔細品味或拍攝自己喜愛嘅迷你模型作品，建議預留4至5小時來充分享受呢個小小世界啊。
歡迎來到「SMALL WORLDS Miniature Museum」的迷你奇幻世界
博物館共分為3層，1樓設有售票處和賣店「Museum Shop」，2樓設有供享用美食嘅咖啡店「Museum Café」以及展覽廳「Gallery B」，而3樓則為主要展覽廳「Gallery A」，可以喺度欣賞到8個不同主題嘅迷你模型世界。
此外，仲會舉行期間限定活動以及由專業迷你模型藝術家創作嘅作品展示。無論去幾多次，呢度總係充滿著令人驚喜嘅精彩位，絕不厭倦！
即刻開始今趟迷你世界之旅啦！從1樓穿過「縮小」隧道，彷如從現實世界進入比例為1/80嘅微型迷你世界，然後從3樓嘅「Gallery A」開啟呢趟「小」旅程！
可以觀賞到火箭發射的壯觀場景！「太空中心」區域
踏入3樓展示區時，一個神奇空間將展現於你眼前！1960年代阿波羅計畫時代與未來嘅太空中心，同時存在於此。當中，絕不能錯過嘅就係觀賞1960年代區域「土星五號火箭」嘅壯觀發射，以及喺未來區域觀賞「太空梭」嘅發射！可以體驗到發射前嘅準備過程等，並睇到火箭發射時煙霧彌漫、大地震顫嘅震撼效果，仿如身臨其境。另外，仲有管制塔、各時代嘅火箭和衛星展示，以及未來太空港等無數精彩位！
此外，你仲可以將觀賞火箭發射嘅觀眾席上人群當做背景之一嚟拍攝充滿創意嘅相片，為照片生色不少呢！
真實與幻想的「世界之街」區域
如果想置身於亞洲和歐洲嘅背景下，體驗現實與幻想嘅融合，仿如置身於虛構世界中，就要去擁有瑞士風、德國風等不同城市風貌嘅「世界之城」區域朝聖一番。當中，有一條與龍等虛構生物共存嘅街道，每個建築和細節位都製作得非常精緻。
另外，融合香港和上海風格嘅街道上，當夜幕降臨時，可以欣賞到被霓虹燈光點亮嘅景致。當中，各處都設有按鈕，按下就見到單車或龍等喺你面前郁，好得意㗎！大家不妨自己嚟親身體驗一下啦！
尋找角色人物！「美少女戰士 Sailor Moon」區域
可以欣賞到成為作品舞台，1990年代麻布十番嘅街道風貌，以及30世紀未來都市「水晶東京」嘅區域。可以深深咁體驗得到「美少女戰士 Sailor Moon」嘅世界觀，絕對係粉絲們不容錯過嘅區域！而且，呢度更加係全球唯一擁有官方認證嘅迷你模型場景啊！
嘗試於街道中尋找作品中嘅角色人物，亦係其中一種樂趣呢！
觀察飛機升降「關西國際機場」區域
飛機會不斷交替著起飛和降落，每約15分鐘就可以見證到機場嘅全日運作。此外，唔同飛機嘅引擎聲都會唔會㗎。
另外，機場大廳和廣播等細節位，都以極高嘅精確度重現關西機場實際情景。如果你曾經去過關西機場，一定會對其精細重現嘅真實度讚嘆不已！
翻新後新設置咗中央洞口，企入去時就好似令人身處機場跑道入面嘅角度觀賞飛機！尤其當飛機起飛時，直程會喺你面前行過，臨場感十足！
親身感受作品中的世界！「新世紀福音戰士 格納庫」&「新世紀福音戰士 第3新東京市」區域
「新世紀福音戰士」嘅格納庫中發射場景於「新世紀福音戰士 格納庫」區域重現！可以欣賞到初號機等裝置發射，粉絲們絕不可錯過！
最後介紹嘅係「福音戰士」主人公——「碇真嗣」等人居住嘅「第3新東京市」區域。呢個區域有近景，亦有遠景。
遠景處嘅「第3新東京市」伴隨著使徒襲擊，背景音樂轉變成警報聲，城市被存放於地下，然後呈現擁有先進災害對策嘅未來世界。
近景處嘅舊市區就有「福音戰士」中嘅經典場景，被精心重現於迷你世界之中。當你細心睇展品時，可能會發現似曾相識嘅場景，到時絕對會忍唔住激動地講「啊！係呢個場景啊！」，真係好有趣㗎！
欣賞到獨具日本風情的夜景「Nightlife in Japan（日本之夜景）」區域
2樓有「Museum Cafe」，提供同活動聯辦製作嘅限定菜式，以及各種餐飲小吃嘅餐廳。另外亦有「Gallery B」嘅「Nightlife in Japan（日本之夜景）」區域，當中重現工業區、漁村、梯田、城堡等「日本夜景」，仲有櫻花和紅葉等四季風光嘅迷你模型。可以坐喺吧檯位置，一邊享受美食，一邊近距離欣賞眼前令人驚嘆嘅迷你景觀。
另外，大家亦可以企入洞口入面伸出頭，咁就可以360度俯瞰整個迷你景觀模型。呢種猶如置身迷你世甲嘅感覺，從不同角度欣賞「日本之風景」，非常有趣！
製作自己的3D迷你模型！
「SMALL WORLDS Miniature Museum」提供新穎的娛樂體驗，大家可以喺館內進行全身3D掃描，將其姿態製成立體模型，然後喺迷你模型世界中選擇一個區域，入住一年。此外，購買「新世紀福音戰士 格納庫」區域居民權的話，仲可以穿著「NERV工作人員制服」進行拍攝，對於粉絲們嚟講係不可錯過嘅機會啊！
除咗1/80嘅尺寸之外，制作1/35尺寸嘅立體模型亦非常受歡迎。小編採訪當日亦製作咗一個迷你版小編！製作時可以擺出唔同「Pose」（姿勢）進行全身掃描，日後就會透過郵寄方式收到非常逼真，自己嘅迷你版3D模型。臉部表情和服裝亦精細重現，幾乎同自己一模一樣啊！另外仲可以喺「Museum Shop」購買其他迷你小模型，裝飾一下就可以齊齊擺喺屋企當裝飾品啦！
「Museum Shop」都有好多限定商品
充分欣賞完迷你模型世界之後，不妨去「Museum Shop」爆買一下紀念品啦！
除咗有拍攝迷你模型嘅指南書、可以做手信嘅迷你模型，仲有同「新世紀福音戰士」、「美少女戰士水手Sailor Moon」合作推出嘅限定商品、原創商品，另外仲有充滿日本風格嘅迷你扭蛋機添。簡直令人花多眼亂啊！
設施情報
- 設施名稱：SMALL WORLDS Miniature Museum（東京迷你世界博物館）
- 地點：東京都江東區有明1丁目3ー33 有明物流中心
- 門票價格：成人（18歲以上）2,700日圓、青少年（12〜17歲）1,900日圓、小童（4〜11歲）1,500日圓
- 營業時間：請查看官方網站以確認營業時間
- 交通方式：百合海鷗號（Yurikamome）「有明網球之森站」步行約3分鐘/ 臨海線（Rinkai）「國際展覽場站」步行約9分鐘
- 從台場出發嘅場合
- 百合海鷗號（Yurikamome）「台場站」到「有明網球之森站」約11分鐘
- 臨海線（Rinkai）「東京電訊站」到「國際展示場站」約2分鐘
- 從豐洲出發嘅場合
- 百合海鷗號（Yurikamome）「豐洲站」到「有明網球之森站」約需5分鐘
Comments